CNF/CNA hi tuan tein an lung rak fim sehlaw NCA luklak ah an rak tlau hnga lo!

CNF/CNA hi tuan tein an lung rak fim sehlaw NCA luklak ah an rak tlau hnga lo!
=======
CNF/CNA hi tuan tein an lung rak fim sehlaw NCA luklak ah an rak tlau hnga lo. Kum 33 dothlennak a tuahmi CNF/CNA nih CDFs bantukin hriamnam zalh piak an herhmi zoh tikah anmah nih an sining an i theih ko lai. Kum khat ah meithai zun 100 in khong hna sehlaw nihin ah bawmh haulo an si hnga. Atu cu CDFs he tlukceo bak an si. Cukhabangia ti hlah u. Milaka lawngte kan si.

Chin ram huap lawng hin cun kan pa le nih an ngamh deuh lo si rua hlah maw ti hna ka ruat. Kawl ram huap in kan doh zong ah kawl pa nih a kan bawm hlei kho lo i CHIN ram huap hin doh usih law kan fah hlei nak ding ka thei lo. Ram that lio i a cunglei ra mi bawh phun hin NUG hi ramdang nih cozah ah a pom khawh sual ah hriamtha hna a kan pe kho hnga maw? ti ruahchannak hi a um rua ka ti.

Kawlram huap nak in CHIN ram huap lawng in doh usih law mipi tampi zong an i biatak deuh kho tiah ka ruah cun kan hnu kan hmai TiDim lei le Rakhine lei zong hi a can um lio te ah can pek a fawi deuh lai. Tahchunnak ah CHIN ram huap in kan doh ah cun nelrawn lei khi buai tuk rih a hau lai lo le humhak hmunhma a kauh deuh khawh nak ah Thantlang hna khi biatak deuh in hriamtlai kip nih care deuh a si hnga tiah ka ruat.

Nain tih nung mi pakhat cu CHIN ramhuap lawng kan ti hin CDFs fa tete le ramleng bawi fa tete hi NUG or hriamtlai dang he hna hawikom a tuah kho mi an si. A țha bik mi cu MiPi hi kan lungfim hmasa i bawmh a herh bik mi CNA hi kan bawmh a biapi cem ko.

Chin ram calawng ah doh ding, Aruang cu Chin ram hi Afganistan ram bantuk kan si. Hriam tha kan ngeih ah cun vanlawng pawl hi zeihmanh aa hmang kho huaha lo. Pahnih nak Kawl miphun nih hin kawl ram chung ah base an ngeih ve lo ah cun, Tlang Cung hriamtlai pawl sin ah an um kho zungzal lai lo. Zumh awk tlak miphun zong an si lo, cucu kan kawl rak tuanbia nih a hmuh sak mi si ko.

President Zung Order No. 5/2022 HAKHA PENG CHUNGAH SATIL LUHPI ON THANNAK! 1. Hakha peng ah khuate (71) kan um. Lothlawh le satil zuatkhalhnak in paw aa cawmmi kan si. Khuate lei khua a sami kan mizapi nih satil zawtnak a chuah caah satil luhnak phihkhampiak dingin an rak chuahpi caah 10 November 2022 in Hakha peng chungah satil luhpinak cu phihkham a si.

2. CDF Hakha Council nih phihkham sawhsawh lawng si loin, satil zawtnak umtu ning siseh, khuate lei satil sining cu hlathlai le zohfelnak tuah colh a si. 3. Cu zohfelnak le hlathlainak tuahmi in hmuh khawh ningin satil a zaw cia mi zong an dam pah cang timi hmuh khawh a si pin ah a thi mi zong an um ti lo. Cucaah 9 November 2022 President Zung Order No. 4/2022 i chuahmi cathanh cu 12 December 2022 in kan hnawh than.

4. Hakha peng chungah satil luhpi phihkhamnak cu 13 November 2022 thokin a dang thawngthanhnak tuah than hlan tiang on than a si cang tiah thawng kan in thanh hna. 5. Cheu khat khua ahcun anmah khua zulhphung ningin an khuaram chungah satil luhternak a phitkham mi an um kho rih. Khua nih an khuaram caah an tuahmi zulhphung cu satil cawk/zuarnak a tuahtu hna nih upatnak nan kan pekpiak naklai theihternak tuah kan duh chih.

6. Caan karlak phihkhamnak chungah satil caw/zuartu hna nih rammi tha nan sinak nan langhter ii nan kan zulhpiak caah kan i lawm. Hmailei zongah kan dihlak ca thiltha riantuannak ah nan kan dirhkamh zungzal naklai kan in sawm rih hna. President, CDF-Hakha Council.

CDF- Paletwa Ralkap Pakhat A nunnak Liam! CDF- Paletwa ralkap Salai Khat Pyaung(kum 25) cu December 11 kahdohnak hmaisuang hmun pakhat ah a nunnak a liam. Ram le miphun caah nunnak a petu Salai Khat Pyaung cu upatnak sangbik kan pek. Tantak mi a chungkhar kan ngaihchiatpi hna tiah CDF Kanpetlet nih December 13 ah cathanh an chuah.

Nanchaung Khua Biakinn Telh In Inn 19 SAC Ralkap Nih An Khangh. Sagaing ramṭhen, Kalay peng Nanchaung khua cu December 12, zinglei ah SAC ralkap nih an luhhnawh i Biakinn telh in inn 19 an khangh tiah CNO Upper Chindwin Committee nih cathanh an chuah.

Nizaan December 12, zinglei ah pyusawhṭi le SAC ralkap hna cu Saedaw Oo khua in Nanchaung khua ah an lut i tualchung hriamtlai phu hna he kaphnih kar kahdohnak a chuak tiah theih a si. Kahdohnak kong he pehtlai in a thi mi an um le umlo fiang in theih a si rih lo.

Kalay PDF Nih Mizapi Sin Ah Ralrin Peknak Cathanh An Chuah. Kalay pengchung ah kahdohnak a um caah Doewaichaung – Yesakyo nitlak chaklei lampi cu mizapi nih zulh le hman rihlo ding in Kalay PDF nih nawlnak cathanh an chuah. Cathanh chuahmi cu nawl zullo in a ummi hna cung ah harnak le thil pakhatkhat a can ah cun Kalay PDF nih ṭuanvo kan la lailo tiah nihin December 13 ah ralrin peknak cathanh an chuah.

Kanpetlet-Saw lampi Hmankhawh A Si Cang. December 13, zinglei in Kanpetlet-Saw lampi cu ahlan keel tein kalkhawh le hmankhawh a si cang tiah CDF-Kanpetlet battalion 3 nih theihternak cathanh an chuah.

Kanpetlet – Saw lampi cu 2022, December 12 zinglei suimilam 8:00 in caan karlak chung kan phih tiah Kanpetlet peng zatlang uktu phu nih cathanh an rak chuah. December 13 in cun cu lampi cu caankel ten hmankhawh a si ṭhan cang tiah CDF-Kanpetlet battalion 3 nih cathanh an chuah.

Aung San Su Kyi Taza Cuainak Kong Ah Pu Henry Van Ṭhio Cu Tehte Ah An Auh. Rampi ruahnak petu Aung San Su Kyi cu eihmuarnak case in SAC nih taza an cuai caah Vice President hlun Henry Van Ṭhio nih December 12 ah tehte dirhmun in bia a chimpiak, tiah biaceih zung he naihniam in a ummi hna sinin theih a si. Kokek harnak kong ah runvennak committee tangka in Helicopter cawknak le hlannak ah Aung San Su Kyi nih eihmuarnak a tuah, tiin SAC nih taza an cuai hi a si.

Cu caan lio i Helicopter cawknak le hlannak ah nawlngeitu bik cu Henry Van Ṭhio a rak si, tiah theih a si. Aung San Su Kyi ca ah tehte in a dirmi Henry Van Ṭhio nihcun Helicopter cawknak le hlannak kong he pehtlai in upadi ning le zulhphung ning in ka phuan, tiah a chim. Aung San Su Kyi cu case number 46, 47,48,49 le 50 case a ngei i nihin December 12 ah case 46, 47 le 48 an check piak dih, case pahnih a taang rih, tiah Henry Van Ṭhio nih cun a chim.

SAC nih nawlngeihnak an lak hnu in NLD hruaitu upa vialte cu SAC ralkap nih an rak tlaih dih hna i, Henry Van Ṭhio tu cu a rian tlaihmi Vice President dirhmun in a um ko i an tlai lo, tiah theih a si. Aung San Su Kyi cu case 19 in SAC nih taza an cuai i case 14 ca ah kum 26 thong thlak dingin bia an khiahpiak, tiah theih a si. Credit; The Chin Post