Congratulations; David Stanley cu Minung 16 ah thim a si ve!

Congratulations; David Stanley cu Minung 16 chungah thim a si ve!
=========
Bawipa thawng in Lafayette kan inn te zong ah caan zei maw zat cu ka um manh. Na in, atu cu Prague (Europe lei, Czech Republic khuapi) ah a um mi FAMU sianginn ah kal ka thawh ve cang.

Hi sianginn hi film sianginn asi i, vawlei cung a ttha bik mi lak ah a tel mi asi. Hi program kal nak ding ah hin, minung 16 thim kan si. Mah chung ahcun ka tel kho ve. A ra lai mi caan ah hmanthlak tam pi in thlak leh share khawh ka rak i zuam te lai!

Yale University ka kai chung ah hin, film tawi (short films) tete hi tam ngai ka tial/direct. Award zong Bawipa thawng in tam ngai ka hmu kho. Na bel tein, zapi sinah (a hlei in, kan Laimi sinah) ka langhter mi cu nan thei tuk lai ka zum lo. Mah lawng si lo in, kan Lai holh hrim hrim in ka thlak mi hi a um rih lo.

A liamcia kum nga chungah, duhsah huamsam tein ka tuanbia chim daan (voice) le film ka zeih daan (style) zong hi kaa fiang chin thluahmah. Fidi, fidlaw he film thlak nakin KAN miphun tuanbia pawl chimphai caan a si cang tiah ka ruah.

Hi ka film tawi hi, keimah pumpak tuanbia…a muru in a chuak mi asi. Na bel tein, kan Laimi (a hlei in kan mino pawl) chung in aa hrawm kho mi tampi nan um lai tiah ka zumh. Mah nih cun, ka lung a ka lawmhter. Hi film tawi a chuah hlan zarhkhat ah tam deuh in ka tial tthan te lai. “Pumpak pehtlaih tuanbia hi sersiam ttamhmoih a dawh bik a si”.

Hi ka capar hi a tawifian nak in ka ṭial khawh nak ding ah suimilam pahnih chung caan ka rak pek nain ka lung a tling kho lo. Cucaah ka lungthin dih lak in a thar in ka ṭial ṭhan. Ka chungkhar kong lam tlawmpal tein zong ka rak ṭial chih.

A hmasabik ah ka nu paw chung ah ka sem kaa in nihin ni tiang thluachuah a ka pe tu Bawipa cung ah ka lawm. Kan Laiholh tein ka thlak mi short film (baisikup tawi) “The Box” hi ka nun chung ah ka dirh khawh mi khan tung (milestone) pakhat a si. Pathian nih sunparnak co ko seh.

Ka thlak mi short film (baisikup tawi) caah script kha February thla in, thla hnih chung ka rak ṭial. Ka ṭial lio ah Martin Scorsese nih a rak chim bal mi bia te pakhat cu ka thinlung chung ah a rak um zungzal. A chim mi bia cu “Pumpak peh tlaih tuanbia hi sersiam ṭamhmoih aa dawh bik si” ti si. Thla thum a rauh hnu ah kan Laiholh tein a hmasabik ka thlak mi short film (baisikup tawi), “The Box” cu mipi sin ah hmuhsak a si cang.

Hi short film (baisikup tawi) cu hringtu Ka Nu le Ka Pa upat pek nak caah a si. Ka Nu le Ka Pa sin in a ra mi thazaang pek nak ruang in hin hi Short film (baisikup tawi) chung i fidi le fitlaw pawl nih an chim mi bia siseh, an cawlcawnghnak siseh, hmanthlak siseh, a nekcok tiang in a tlamtling kho dih. A tulio lawng ah si lo in a hlan lio ah ka rak thlak cang mi video (muicawl) le film (baisikup) vial te zong Ka Nu le Ka Pa thawng in ka rak thlak khawh mi hna an si.

Zahan zan ah ka Nu Le Ka Pa ka hmuhsak hna. Mah ka short film (baisikup tawi) i a muru cu kan innchungkhar tuanbia a si i feeling tam pi a um. Medical line a duh mi ka nau le video (muicawl) le film (baisikup) thlak nak lei ah duhnak lungthin a ngei mi keimah caah hmai lei ah kan duh mi rian cio kan tuan khawh nak hnga ding lam kan sial nak a hramthok nak tuanbia a si.

Ka Nu le Ka Pa cu miphun hawi a tampi khuasak, cingla rualchan pawl an umnak hmun ah va thutdir i khuasak an duh caan zong an ngei theu tawn ko lai. Fimthiam nak kan cawn nak caah chawva lei ah si seh, a dang dang lei in siseh harnak an ton caan zong a um tawn ko lai. Zeitluk in harnak tong ko hna hmanhseh lungdong lo tein, zeitluk in duhnak a dang ngei ko hna hmanhseh an duhnak cu ngol tak in an fale kan caah thazaang a pe zungzal tu dawtu Nu le Pa i tuanbia cu a si.

Mah short film (baisikup tawi) hi keimah pumpak tuanbia si ko hmanhseh law keimah pumpak ca lawng si lo in Chin mi seino vial te le hawikom vial te ca zong ah a si. A hlei khun in thil dawh ser thiamnak (creative arts) pahrang a ngei i cu pahrang pawl hman in a paw a cawm hnga ding mi u le nau hna caah a si.

Hi bantuk line (career) nan zulh ruang ah nan ton hnga ding mi harnak, hneksaknak, nihsawh nak, soisel nak le kan miphun hawi sin in nan theih hnga ding mi bia le hla pawl cu keimah nih ka rak ton, ka rak theih bal dih cang. Zeibantuk thil nan ton zong ah nan tuah mi thil cu nan lungthin dinlak in tuah ko uh, hmailei ah nor chin ko uh law fimthiam nak nan cawn mi kha zei tik hmanh ah rak ngol hlah uh. Zuamnak chung ah nangmah he aa zuam mi cu nangmah pumpak lawng lawng hi a si ko caah na tumtah mi kha a sang bik ah rak chia zungzal ko.

Keimah pumpak zong hi ka tumtah nak hmun he aa naih nak hmun hmanh ah ka phan kho rih lo i ka phanh nak ding zong ah ka lamthluan cu a sau pi zulh ka hau rih ko. Palhnak kan tuah sual tawn ah cu kan i palhnak cu kan caah cawnnak a si tawn. Cu caah hmailei ka nunnak lamthluan ah fimthiam nak le ṭhancho nak kha duhsah in kaa chap chin lengmang nak hnga palhnak tampi ka tuah sual lai ding zong ka thin a phang lo.

A tu nak in a ṭha chin lengmang mi tuan bia chimtu, a ṭha deuh mi caṭialtu le a ṭha deuh mi baisikup thlaktu uktu (director) ka si nak hnga ding cun tu hnu kum nga maw si lo ah kum hra dah ka rau kho ko men. A donghnak ah cun kan Pathian nih sunparnak vial te cu a co dih lai i a ka cawisang ko lai tiah zumhnak ka ngei.

Cun keimah nih ka rak thok i ka chungkhar nih nihin ni tiang pehzulh tein kan tuah mi phunglam pakhat a um. Mah phunglam cu keimah nih ka thlak mi muicawl (video) siseh, film (baisikup) si seh, a dang dang zeizong vial te ka lim le cangka in Ka Nu, Ka Pa le ka nau kha a hmasabik ka hmuhsak hna. Nihin ni thawk in pahnihnak ka chungkhar a si mi nangmah (Ka miphun a si mi Chin mi nu le pa, u le nau vial te, Yale University ah sianghleirun kaiṭii mi hawikom vial te, siangsangrun (high school) kaiṭii hawikom vial te le vawlei cung khuaza ramkip i hawikom vial te) he phunglam a thar pakhat ser ka duh.

Nihin ni thawk in hin ka thlah/ chuah mi film (baisikup) vial te he aa pehtlaih mi lamthluan ka kal nak ah nangmah pumpak hrim hrim nih na ka tel pi nak hnga ding hi ka saduhthah pakhat a si.

Zeitin in dah na ka tel pi khawh lai? Ka thlak mi film (baisikup) cu zoh law, nangmah le film (baisikup) cu selfie ii thla, a siloah muicawl tawi (short video) zong thlak khawh a si. Cu na thlak mi hmanthlak si lo ah muicawl (video) cu ka film (baisikup) kong he pehtlaih in chim na duh mi biatawi te ṭial chih buin social media ah ka account pawl kha “tag” khawh ka si. david.stanley@yale.edu zong ah email in kuat khawh ka si ṭhiam. Cu hmanthlak vial te cu ka fim lai i hmailei ah cun hmanthlak ngan pi pakhat in ka chuah ṭhan te lai. Mah hmanthlak cu rian ka ṭuan nak innkhan (studio) chung ah ka thlai te lai. Ka chunmang pakhat a si.

Cu caah cun a tu ka chuah mi Laiholh in a hmasabik ka thlak mi short film (baisikup tawi), “The Box” in thok hna uh sih! Ka YouTube channel ah ka tar mi, “The Box” cu va zoh uh law chimh kan duh mi bia te kha va kawl uh tiah chimh kan duh hna. Nan zapi tein Bawipa nih thuahchuah nak in pe ko hna seh. Credit: David Stanley

Be the first to comment

Leave a Reply

Your email address will not be published.


*