Good; Kum 4 tang ngakchia, Mi velh an hmannak a ruang 3!

Zeiruang ah ngakchia nih mi mi velh an hman i zeitin kan ṭhinhter hna ning a si lai? (Kum 4 tang ngakchia; MI VELH AN HMANNAK A RUANG 3)
===========
Pawngkam minung zia an i cawn: Ngakchia hna nih mi velh an hman tawnnak hi an pawngkam minung hna ruang ah a si ṭheo. Nulepa nih an ngakchiat tein rak velh an ton tawn ruang maw asilole nu le va i velh an hmuh ruang maw, asilole mi velh a hmangmi he an i komh ruang tibantuk.

An lungthin an uk kho rih lo: Minung nih hin thinhun khawhnak, ngaihchiat khawhnak, i nuamh khawhnak, ingpuan khawhnak tibantuk (emotion) hi kan i chuahpimi a si, nain kha pawl uk khawhnak kha kan i chuahpimi a si lo. Kan chuah hnu tuin duhsah in uk khawhnak cu kan cawnmi a si. Cucaah ngakchia cheukhat cu an thinhun ah thil hlonh, thil hrawh asilole mi velh tibantuk an hman tawnnak a si.

An lung ummi langhter an thiam lo: Ngakchia hna hi holh leiah tampi chambaunak an ngeih caah an thinlung chung a ummi hi bia in langhter an thiam rih lo. An duhloning in thil a kal ah siseh, an thinhun ah siseh bia in an langhter thiam lo i kut thlaknak tuin an langhter ṭheo. Cun mi velh hi a ṭha lo ti zong an i fiang rih lo.

ZEITIN KAN ṬHINHTER HNA LAI? (tampi chung in 3 te ka hun langhter lai) Ngakchia hi pawngkam zia rang tukin aa cawn khomi an si caah innchungkhar ah i velhnak a um lo hi a herh. Velh a hmangmi nulepa tangah a ṭhangmi ngakchia hi velh a hmang lomi nulepa tangah a ṭhangmi ngakchia nakin velh an hmang deuh tuk. Cucu hlethlainak nih fiang tein a langhtermi a si. Mi velh an rimnak dingah tiah velh hrimhrim hna lo ding. Kan chimmi an ngaihnak dingah kan velh hna ahcun kha ruahnak kha an i lak ve i an chimmi an hawile/nau nih an ngaihnak dingah velh an hmang ve.

An duh loning in thil a kal caan ah khin mi an velh hna lo caan a tampi. Khi caan te ah khin tampi in conglawmh colh hna ding. Mi tampi cu kan fale nih an tuah lo ding an tuah caan lawng ah kan sikcaak hna i an tuah awk a simi an tuah caan ah conglawmh kan hmang lo, mah khi a palh tukmi a si.

Kan duhmi tuah lengmang hna seh ti kan duh hna ahcun kan duhmi an tuah caan ah conglawmh hrimhrim hna ding ti a si. Upa hmanh nih thil kan tuahmi an kan conglawmh ahcun tuah chin lengmang kan duh. Cucu minung kan saikhaw kalning hrim a si.

Bia in duh lonak langhter hi kan cawnpiak hna zong a herh fawn. Na duh lomi an tuah ahcun ka duh lo, tuah hlah, na ti hna lai tibantuk. Cun an tuah chih ahcun na kaltak hna lai asilole upa/nulepa na kan chimh lai, tibantuk hna khi kan cawnpiak hna a herh. Cun mi velh a ṭhat lonak (tahchunnak ah kan velh hna ahcun an taksa a fak, hmailei ah an kan kom duh lai lo tibantuk) zong khi an ngakciat tein kan chimh hna a herh.

Note: Mi velh a hmang cangmi hna hi an i ṭhinh dingin kan cawnpiak hna tikah chikkhat te ah an ṭhinh colh lai lo. A thla, a kum zong a rau kho. Asinain an hun upat deuh cun an ṭhinh ko lai. Lungtawi in A ṭhinh hlei lo i tiah kan ngol a si ahcun an upat pi tiang an ṭhinh thai lai lo i thil poi ngantuk zong an tuah kho.

Cucaah lungsau tein chimhcawnpiak hi i zuam ko hna usih. A har tuk ko lai, nain cawnpiak lo tu khi hmailei ah a har te deuh ding a si. Credit: Roro Fambawl

Be the first to comment

Leave a Reply

Your email address will not be published.


*