Paletwa Peng Ah Kahdohnak Voi 5 A Chuak, SAC Ralkap 16 An Thi
=========
2023, January thla khat chung ah Chin ramkulh, Paletwa peng CDF-Paletwa battalion 2 hmunhma ah SAC ralkap le CJDC – Special Force, CDF- Paletwa, CNA kar kahdohnak voi 5 a chuak, cu kahdohnak chung ah cun SAC ralkap 16 an thi, hliamhma tuar an tam tiah theih a si. SAC ralkap an thlahmi hriam ruang ah sualnak ngei lo tualchung mi pakhat a nunnak a liam tiah theih a si.
Kahdohnak chung ah CDF-Paletwa nih MA-1 pakhat an laak khawh, mipi lei ralkap 2 nih hliamhma fak an tuar. Kahdoh a chuahnak hmunhma ah SAC ralkap nih an duh tik caan paoh ah rallam sial in kahdohnak an tuah khawh caah mizapi nih ralringte um cio ding in CDF-Paletwa nih February ni 4 ah cathanh an chuah.
Myanmar Ram Pumpi Huap Nikhat Chung Ah SAC Ralkap 54 An Thi. Myanmar ram pumpi huap February ni 4, nikhat chung ah SAC ralkap 54 an thi tiah tualchung hriamtlai phu hna nih cathanh an chuah ning in le an chim ning ah theih a si.
Nifatin SAC ralkap a thimi cazin cu Yangon Khit Thit Media nih khomhsuat in cathanh an langhter. Cu an thanhmi ah cun SAC ralkap a thimi zat langhtermi hi tualchung hriamtlai phu hna nih cathanh an chuahmi le an chimmi cu funtom in cathanh chuah chin a si tiah an langhter.
2023, February ni 4, nikhat chung ah Sagaing ramṭhen in SAC ralkap 42 an thi, Chin ramkulh Matupi ah SAC ralkap 10, Yangon ramṭhen ah 1 le Mandalay ramṭhen ah 1 tiin SAC ralkap 54 an thi. Mon ramkulh Ye peng ah SAC ralkap pakhat tlaih a tong tiah an langhter.
Mingaladon Peng Sang 5 Cu SAC Hmunhma Tiin An Hrawhpiak Hna Caah Umnak Ngei Lo Mipi 300 Leng Mah Umnak Cio Kir Ding In An I zuam! Yangon ramṭhen, Pyinmapin khua komh sang 5 cu SAC nih kan hmunhma si tiin an thawnter hna, an hrawhpiak hna hnu ah umnak ngei lo mipi hna nih an umnak hmun kir khawh ṭhan ding in thlacamnak an ngei tiah theih a si.
2022, November thla ah SAC nih Mingaladon peng sang 5 ah khuasa tualchung mi hna an umnak inn, phungki sianginn, phungki nu sianginn hna cu ṭheng (Bulldozer) in an hrawhpiak hna. Santamadi sang cu SAC nih fak tuk in an rak hrawhpiak hna caah umnak ngei lo tualchung mipi 300 leng cu mah umnak hmun kir khawh ṭhan ding in an i zuam lioah SAC ralkap le palik nih an kham hna tiah theih a si.
“Nihin February ni 5, zinglei in mah umnak cio um khawh ṭhan ding in an hmunhma cu an fuh nain sang chung ah SAC ralkap nih an ṭhawl hna caah lamkam ah dai tein an ṭhu, SAC ralkap nih kapkhatlei in meithal he an hngah hna. Inn hlan chom khuasak ding in an tlamtlin cio lo caah minung 200, 300 hrawng nih an umnak hmun ngah ṭhan ding in an i zuam” tiah tualchung mi pakhat nih a chim.
Hramhram uknak a la tu SAC ralkap nih 2022, November thla chung ah Mingaladon peng, Pyinmapin khua komh Myae Myan Aung sang(မြဲမြံအောင်), Dalapala(ဓလပါ လ), Santamadi(စံသမာဓိ), Gonhnginni(ဂုန်ညှင်းနီ) le Myawady sang tiin sang 5 ah inn 10,000 hrawng an hrawhpiak hna caah minung 50,000 hrawng umnak ngei loin an um.
January Thla Chung Hpapon Pengkomh Ah Kahdohnak Voi 209 A Chuak, SAC Ralkap 40 Leng An Thi. KNU hmunhma Hpapon pengkomh January thla chung ah kahdohnak voi 209 chuak, SAC ralkap le ramri hngak BGF lei in 47 an thi. SAC ralkap lei a thimi hna chung ah ṭatkhuaihmu rank le bawi deuh hna zong an i tel tiah Mutraw Media nih nihin February ni 5 ah a thanh.
Cun, SAC ralkap le BGF chungtel 55 nih hliamhma an tuar leng ah motor pakhat zong hrawhpiak an tong. SAC nih Hpapon pengkomh chung ah van lei kahdohnak voi 24 tiang an tuah, sualnak ngei lo mipi 14 an nunnak a liam, 11 nih hliamhma an tuar tiah an thanhmi ah an langhter.
SAC ralkap nih kahdohnak an tuah ruang ah inn 50 leng a rawk i, siikhan le biaknak lei inn telh in tualchung mi hna umnak inn tampi a ciam. SAC nih tualchung mipi umnak hmunhma cu tinhchih in kahdohnak a tuah, hmunkip ah hramhram in thil sual an tuah tiah an thanhmi ah cun an langhter chih.
Wetlet Peng Kahdohnak Ah SAC Ralkap 5 An Thi. Sagaing ramṭhen, Wetlet peng kahdohnak ah SAC ralkap 5 an thi tiah GZ Special Task Force – Wetlet phu in ṭuanvo ngeitu pakhat nih a chim. February ni 3, ah Wetlet peng nitlaklei Makyitone(မန်ကျီးတုံ) khua in Takaungmin(တကောင်းမင်း) khua lei ah rallam sialtu SAC ralkap cu GZ Special Task Force – Wetlet nih hriamngan in an kahdoh hna caah kaphnih kar kahdohnak a chuak tiah theih a si.
“Zinglei suimilam 11:00AM hrawng in kaphnih kar kahdohnak a chuak, SAC ralkap lei 5 an thi. Tualchung hriamtlai phu lei hliamhma tuarnak um loin hnu kan tolh kho ṭhan” tiah GZ Special Task Force – Wetlet in ṭuanvo ngeitu pakhat nih a chim. SAC ralkap hna cu GZ Special Task Force – ṭatkhuai 4, Mine Bilu ṭatkhuai, Yekyat phu le Daung Bayin phufonh hna nih an kahdoh hna tiah theih a si.
Mon Ramkulh Ye Peng Ah SAC Ralkap Ralbawi Pakhat Tlaih A Tong. Mon ramkulh, Ye peng ah SAC ralkap nih an zulhmi private motor pakhat cu YGF nih an kahdoh hna, SAC ralkap bukyi pakhat kan tlaih tiah YGF-Ye pahkahphah in ṭuanvo ngeitu pakhat nih a chim.
February ni 4, chunhnu suimilam 2:30PM ah Mon ramkulh Ye peng Kaninkamaw(ကနင်ကမော့) le Aungtaya khua kar lampi ah SAC ralkap nih an zulhmi Mark 2 motor pakhat cu tualchung hriamtlai phu hna nih dir ding in an kham hna lioah, dir loin an motor cu an khalh chih caah YGF – Ye pahkahphah phufonh nih minutes 30 hrawng kulh in an kahdoh hna tiah theih a si.
Tualchung hriamtlai phu kahnak ruang ah SAC ralkap zulhmi motor cu lamkam khor ah a tla i motor chung cuangmi ralkap 5 an zaam, tualchung hriamtlai phu nih an dawi hna caah SAC ralkap bukyi rank pakhat tlaih a tong, a dang minung 4 cu an zaam manh tiah theih a si.
SAC ralkap nih an i citmi motor laak ding in timhtuah lioah SAC ralkap ah-mah-ṭah 317 nih hriamngan in kah an bawmh hna caah motor cu laak manh loin kan khangh tiah tualchung hriamtlai YGF-Ye pahkahphah in tuanvo ngeitu pakhat nih a chim. Credit: The Chin Post
Leave a Reply