Good News: Hakha le Falam kar kahdohnak ah ralhrang a thi mi cu an tam kho taktak!

Falam-Hakha karlak kahdohnak ah SAC ralkap 60 an thi cang!
==========
Chin ramkulh, Falam in Hakha lei ah a rak kaimi SAC ralkap le Chin mipi hriamtlai phufonh karlak ah July 8 thok in kahdohnak a fak i SAC ralkap 60 leng an thi cang tiah CNF biachimnak nawl ngeitu Salai Htet Ni nih Khonumthung Burmese ah a chim.

Thazang 200 hrawng a simi SAC ralkap pawl cu mawṭaw 27 in Hakha lei ah an kal i CNA, CDF le CNDF phufonh hna nih July 8 thok in an kah lengmang hna i July 11 tiang ah SAC ralkap 60 an thi cang i mipi hriamtlai lei in pakhat a nunnak a liam tiah theih a si.

“Anmah lei in hma a pumi cu fiang tein theih a si lo nain kahdohnak ni 5 chungah ralkap 63 hrawng an thih cu fehter khawh a si, kanmah lei in pakhat nih ram le miphun caah a nunnak a pek i 10 hrawng an i hliam. Pahnih/thum hrawng an hma a fak, kahdohnak hi a dih rih lo” tiah Salai Htet Ni nih a chim.

SAC ralkap le Chin mipi hriamtlai phu hna hi Falam-Hakha karlak Taal, Tlangzaar, Ramthlo hna ah kahdohnak voi 8 a chuak i Chin mipi hriamtlai hna nih bom le hriamngan in voi 4 an kah hna. “An ratnak lam ah kanmah lei thazang chap in kan bawmh hna.

Khuachung ahcun kan kap hna lai lo tiah kan i ruat ko nain an khangh cianak khuachung an luh cun karceh in kan kah hna. Bom le hriamngan zong in kan kah hna caah a thimi an tam” tiah Salai Htet Ni nih a chim. SAC ralkap pawl cu nizaan ah Ramthlo in Dokthek lei ah an len i Chin mipi hriamtlai nih kah ruangah hmai kal kho ti loin Ramthlo khua ah an kir ṭhan.

SAC ralkap pawl cu mawṭaw 27 in an raa ko nain mawṭaw 4 cungah innsaknak thilrii an phor i minung 40 hrawng nih mawṭaw hmai ah lam an hmuhsak hna. Falam-Hakha lamcung ah a ummi Taal le Tlangzaar khua mipi inn 35 hrawng an khangh tiah thawng theih a si.

Tlanglei Kalay kahdohnak ah CNDF hriamtlai 1 a nunnak a liam. Thlanglei Kalay, Hakhalay pawng, July 11 ah SAC ralkap le mipi hriamtlai phu pawl karlak ah kahdohnak a fak i cu kahdohnak ah CNDF hriamtlai 1 a nunnak a liam tiah theih a si.

Kahdohnak ruangah CNDF hriamtlai lawng si loin adang mipi hriamtlai 3 zong hliamhma an tuar i Ranger Kalay Defend Force in pakhat zong aa tel tiah Zalen nih a langhter. A nunnak a liammi CNDF hriamtlai hi kum 37 a si i fa 4 a ngei tiah theih a si. Ranger Kalay Defend Force hriamtlai pakhat a phei pahnih le Private hmunhma bomci nih a khen caah aa thlopbul lio a si tiah theih a si.

Matupi peng kahdohnak ah SAC ralkap 4 an thi. Chin ramkulh, Matupi peng, July 11 ah kahdohnak aa peh i SAC ralkap 4 an thi, 2 nak tlawm lo nih hma an tuar tiah CDF-Matupi nih a thanh. July 11 zinglei sml 10 ah Matupi peng Sawnghti khua le Lungtam khua karlak ah kahdohnak a chuak tiah theih a si. Kahdohnak chungah CDF hriamtlai pawl him tein an kir kho tiah a thanh.

Cun, Matupi peng ah July 6 in kahdohnak aa thok i ni 6 chungah kahdohnak voi 4 a chuak tiah CDF-Matupi nih a thanh.
July 6 ah kahdohnak voi 2 a chuak i SAC ralkap 5 an thi, hliamhma a tuarmi zong an um. July 7 kahdohnak ah SAralkap 2 an thi i 6 nak tlawm lo nih hma an tuar tiah theih a si. Cucaah zarkhat deng Matupi peng kahdohnak ah SAC ralkap 11 nak tlawm lo an thi i hliamhma a tuarmi zong an um.

SAC ralkap pakhat hriam he CDF-Mindat sin ah CDM a tuah. SAC ralkap pakhat cu bom telh in hriam tling he SAC chuahtak in CDF-Mindat sin ah CDM a tuah tiah theih a si.

Chin ramkulh kahdohnak ah aa telmi LIB 512 in ralkap Zin Lin Aung cu July 10 ah CDF-Mindat sinah aa fonh hi a si.
Ralkap Zin Lin Aung cu MA 1 zunnkhat, kuan bawm 3, kuan 123 le bom 2 he CDM a tuah tiah theih a si. Culawng si loin, Karen ram ah SAC ralkap 5 cu CDM an tuah i Ohkayithta sakhaan kahdohnak bawmh ding in thlahmi an si i KNLA sin ah an i fonh tiah theih a si. Credit: The Chinland Post

Be the first to comment

Leave a Reply

Your email address will not be published.


*