Good News; Hakha Le Thantlang kar um Ralhrang kong thawngpang update!

Good News; Hakha Le Thantlang kar um Ralhrang kong thawngpang update!
======
Tiṭa Le Thantlang Kar Kahdohnak Ah CDF Thantlang Commando Nih SAC Ralkap Firmi Thilri Mansung An Langhter. October 19, Tita le Thantlang kar kahdohnak ah SAC ralkap nih Thantlang dawr an bauh i thilri mansung an firmi cheukhat cu CDF Thantlang nih an lak khawh ṭhan tiah theih a si.

SAC ralkap nih Thantlang mipi an firmi thilri cheukhat cu CDF Thantlang Commando nih kan lak khawh ṭhan, tiah an langhter i an firmi thilri lakah sui kutdonghrolh le suiṭhi tampi an i tel. Mifir pawl hna cu laithi hna khi zei ah hme i tuah sih an ti hnga.

October 13, Thantlang le Tita kar kahdohnak zongah SAC ralkap sin in MAbox 16, 60MM 3, Nam te 3, Phone -lung 5, MPT sim – 8, Khetan box 5, Ball pen box 3, USB card 4, suimilam 3 le Phasa bawm – 1 zong an rak lak bal cang. CDF Thantlang Commando

Hakha Cawbuk Sang SAC Ralkap Check Gate Kah An Tong, 5 An Thi! Chin ramkulh Hakha khua chuahnak Cawbuk check gate cu October 21 ni ah CDF- Hakha Battalion 2 (Senthang) nih kalhnawh in an kahdoh hna caah SAC ralkap 5 nak tlawmlo an thi tiah theih a si.

Hakha peng Buanlung khua ah ralhrang nih drone hmang in bomb thlaknak a tuah ruang ah a nunnak a liammi Pa Jame Siang Za Uk, Pa Henry Bawi Za Lian le hma pu mi Nu Nancy hna bia kan kamh hna bantuk in kan ralkap a si mi CDF-Hakha battalion 2(Senthang) nih 21 kan kah hna i, ralhrang lei 5 nak tlawmlo an thi i, hliamhma pu mi an tam caah phu kan hlam khawh hna.

A thimi hna ruak cu motor ngan 2 le a hmemi 3 in an rak lak hna. Kan ralkap hna cu Pathian umpinak thawng in tluang tein an rak kir kho tiah Senthang Council nih cathanh an chuah tiah theih a si.

Matupi Khuachung Ah SAC Ralkap Nih Khuami Pakhat An Tlaih. Chin ramkulh Matupi Lawngvang sang ah a um mi Thaeboi khuami U Joshua cu SAC ralkap nih October 20, zaanlei suimilam 4:00 hrawng ah an tlaih tiah theih a si.

U Joshua cu khuate lei in a rak kai mi hna he thilri thlen ding in a kal lio ah SAC ralkap nih checkhlatnak an tuah i khua lei ah a kuat dingmi dat-khe, dahmei, cauk le zeidang thilri hna cu SAC ralkap nih an duh lo caah lunghrinh in an tlaih hi a si.

SAC ralkap hna nih khualei in a rak kai dingmi pahnih hna cu tlaih ding in an i zuam nain, cu pahnih hna nih cun SAC ralkap hna cu an hmuh hna caah an zaam manh caah an tlai kho hnalo tiah theih a si. U Joshua cu khuachung ah amah pumpak chawleh chawhrawlnak riantuantu a si. Matupi khuachung thawngpang a leen ningah cun U Joshua cu SAC ralkap nih fak ngaiin an hrem tiah theih a si.

SAC Ralkap Nih Inn Kip Ah Kal In Sianginn Kai Ding In An Forh Hna. Matupi ah fimcawnnak zung lutlai thah a ton hnu buaibainak ruang ah siangakchia hna cu sianginn kai le kailo ding kong an fianlo caah sianginn kai loin an um tiah theih a si.

Sianginn a kailo mi siangakchia hna cu SAC ralkap nih inn kip ah an kalhnawh hna i” kanmah kan um, zeihmanh ṭih hlahuh, sianginn rak kai uh” tiah sianginn kai ding in an forh hna tiah tualchung mi nih an chim tiah theih a si.
Matupi khuachung ah SAC ralkap nih No.1 siangsangrun le No.2 siangsangrun an on tiah theih a si.

Kanpetlet Kahdohnak Ah SAC Ralkap 2 An Thi, Khuami Nih Bomb Khur I Cawhcia Ding In CDF-Kanpetlet Nih Forhfialnak An Thanh Ṭhan. October 21, zinglei suimilam 9:50 hrawng in chunhnu suimilam 12:00 tiang, Kanpetlet khuachung Rural office pawng le Myomah palik sakhan thlang ah SAC ralkap le CDF-Kanpetlet kar kahdohnak a chuak i SAC ralkap bo kyi reng pakhat le ralkap pakhat tiin minung 2 an thi, 3 nih hliamhma an tuar tiah theih a si.

CDF-Kanpetlet lei hliamhma tuarnak umlo in hnu an tolh kho i fakngai in hliamh a tongmi SAC ralkap hna nih khuachung ah hriamngan le hriamhme tamtuk an thlah tiah theih a si.

Atu ah SAC ralkap nih Kanpetlet le Kyindwe ah vanlawng in minung thazaang chapnak an tuah leng ah mipi cung ah hriam thazaang i bochan in tlerh khonhnak an tuah caah CDF-Kanpetlet nih a lamkip in kahdohnak kan tuah lai caah mizapi nih ralrinnak ngeihcio ding in le bomb khur i cawhcia ding in ralrin peknak an thanh ṭhan tiah theih a si.

Dohthlennak Ah Ramchung Ramleng Kan Ṭuanvo Thleidan Thiam A Herh. Tutan khuapau dohthlennak ah ramchung ramleng in mipi kan tho dih. Phundang cun dohthlennak ah aa tel lomi kan um lo ti khawh a si. Kan i telnak zawn tu aa dang cio. Tutan dohthlennak ah ramchung ramleng kan ṭuanvo hi thleidan thiam a herh tuk tiah ka ruah. Ṭuanvo cu kan ngei dih, asinain kei ka ṭuanvo zeidah a si ti thleidan thiam lo ahcun a poi tuk lai. A tlangpi in ramleng kan ṭuanvo hi pali a um.

Pakhatnak: Tangka thawh, tangka hawl! Nifatin in meithal le bomb puak lakah tangka kawlhawl awk a ṭha lo. Cucaah ramleng nih tangka kan thawh, kan kawlhawl a herh. Asinain tangka a thawhtu kan si ruangah duhpaoh in a aukhuang ding kan si lo. Duhmi paoh chim i aukhuan len kha kan ṭuanvo a si lo.

Pahnihnak: Fimthiamnak in bawmh! Ramleng nih kan tangka lawng thawh a za lo. Kan fimthiamnak zong kan thawh rih a herh. IT chan a si bantukin tutan dohthlennak ah IT fimthiamnak hi hmual a ngei tuk. Seh lei thiamnak (mechanic) zong a herh tuk fawn. Ramleng ah mifimthiam tampi kan ngei cang hna. Cu hna nih an fimthiamnak kha dohthlennak ah an hman ve hrimhrim a hau, tampi an hman cangmi zong a um.

SAC nih Russia le China in IT thiamnak tampi aa lak caah Drone zong duh ningin kan hmang kho rih lo. Phone ah kan hlonh (deleted) cangmi zong an hmuh khawh caah tlaih a tongmi an tlawm ti lo. Cucaah IT lei, hriamnam sernak le seh lei fimthiamnak ah ramleng nih biatak tein kan i tel a biapi.

Pathumnak: Thazang pek! Ramchung cu thinphang le thlalau in nifatin caan an hmang. Khatlei ah lungretheih le vansannak aa phua! Hriam a tlaimi si hna seh a tlai lomi si hna seh an taksa le thinlung a ba. Cu caah ramleng lei thazang peknak an herh tuk. Cu ee, kha ee tiah kan vuivai tawnmi khi cu an lungretheihnak a zualtertu an si. Ramchung a ummi hna, a bik in hriam a tlaimi hna caah thazang pek khawh tu i zuam cio a herh.

Palinak: Khuakhan lairelnak ah bawmh! Dohthlennak ah ramchung lei khuakhan lairelnak lawngin tlamtlin a har caah ramleng in biaknak le zatlangbu hruaitu, mifimthiam kan pa/nu le hna nih khuakhan lairelnak ah a si khawh chungin bawmh an herh. Amahbelte a bawmtu kan si ti kha theih peng a hau, bia a khiaktu ah kan i ruah sual lo ding a biapi! Tangka a thawhtu pei kan si cu tiin nawlngeih i timh hi China lungput a si. China nih cun ram sifak hna kha tangka tampi a pek/cawih a hna i a hnuah sal bantukin a duhmi paoh a tuahter tawn hna. Cu lungput cu kan hrial a herh.

Ramchung lei ṭuanvo hna cu chim len hmanh a hau lem lo. A biapi tuk tiah ka ruahmi pahnih bel a um. Pakhatnak cu ramleng in thawhmi tangka hna hi a herhnak zawn ah felfai tein hman ding! Atu tiangah ramleng lei thawhmi tangka a vaivuanmi le a zawn a si lomi ah hmanmi a um len. A zawn teah hmualngei tein kan hman ahcun ramleng lei zong an tha a bat ko hmanh ah an i hne kho lai. Pahnihnak cu ram le miphun caah nunthap in aa thawhmi le retheih a tuarmi na si ruangah upatnak le thangṭhatnak bia na hmuhmi kha i porhlawtnak le uahnak ah hman hrimhrim lo ding. Zuam chinchin nak tu ah hman ding a si. Salai CP Lian

Be the first to comment

Leave a Reply

Your email address will not be published.


*