Good News: Mipi ralkap nih RPG bak in ralhrang an phomh ve cang hna!

Kathar Ah SAC Ralkap Motor Pakhat RPG In Kah A Ton Caah Ralkap 15 Leng An Thi!
=========
Sagaing ramṭhen, Kathar peng chung ah SAC ralkap motor pakhat cu RPG in kah a ton caah ralkap 5 nak tlawm lo an thi, tiah theih a si. June 9 zanlei sml 2:45 hrawng ah Kathar peng PinMaLut(ပင်းမလွတ်) khua in a chuakmi SAC ralkap motor pathum cu, meng 8 an phanh ah Kathar PDF Battalion 1, thiamhlei Companny nih lamhruang in RPG in an kah hna caah motor pakhat a rawk, tiah Kathar Pah Kah Pha nih cathanh an chuah.

A thimi le hliamhma pumi hna cu zanlei ah Kathar in mizaw phorhnak motor in a rak laak hna. SAC ralkap 15 nak tlawm lo an thi i, tam ngai hliamhma an pu, tiah an langhter. “Kathar peng chung ah thawng petu kan ngei hna. Thawng fiang a kan pekmi ning in SAC ralkap 15 nak tlawm lo an thi,” tiah Kathar sang No. 5 ummi pakhat nih a chim.

June 9 Kathar khua chaklei, WayKyi khuakomh chung ah Kathar Pah Kah Pha le ṭangṭi phu nih SAC ralkap cu bomb an puah hna hi a si. June 9 chun sml 12:30 hrawng ah Kathar khua in a chuakmi SAC ralkap motor 3 cu, lamhruang in Kathar pengkomh PDF le ṭangṭi phu hna nih bomb an puah hna nain an bomb a puah lo caah kaphnih kar kahdohnak a chuak, an langhter.

Myaung Peng Kahdohnak Ah SAC Ralkap 15 Hrawng An Thi. Sagaing ramṭhen, Myaung(မြောင်) peng lei ah a kalmi SAC ralkap pawl cu, nizan June 9 zinglei ah kan kah hna i SAC ralkap 15 hrawng an thi, tiah Myaung Peng PDF- CDSOM ṭuanvo ngeitu nih a chim.

Myaung peng ZaYetNi(ဇရပ်နီ) khua pawng ah zing sml 6:00 hrawng ah kahdohnak a chuak. Cu kahdohnak ah bomb hri an pah caah lung thum an puak i a thimi an tam, tiah a chimchap. “SAC ralkap cu zing sml 6:00 hrawng ah ZaYetNi khua in an ra. Sml 7:15 hrawng ah kan kah hna i SAC ralkap 10-15 kar an thi. Kan kahnak hna ni pe 300 hrawng hlat in kan kah hna,” tiah CDSOM ṭuanvo ngeitu Bo Min Ya Khah nih a chim.

SAC ralkap nih 60 mm le 40 mm hriamngan in an kah hna caah PDF ralkap pakhat phei ah a khen ko nain hnu kan kir kho, tiah a chimchap. Kahdohnak a daih in rallam a sialmi SAC ralkap pawl cu, ZaYetNi khua inn 2 an khangh pin ah Myuang peng MinHla khuami 3 zong an tlaih hna. MinHla khua phungki umnak ah umhmun an khuar i, hliamhma pumi SAC ralkap cu an thlop hna, tiah CDSOM nih an langhter.

Cu kahdohnak ah CDSOM phu, Myaung PDF, Myaung Union Army(MUA)၊ PDF TALOKE၊ GGG၊ MGM RANGER၊ MGM TIGER 35၊ MGN 21 le SHWE OH phu hna i bawm in an kah hna, tiah theih a si.

AlayHkung Khua Pawng Kahdohnak Ah SAC Ralkap Tam Ngai An Thi, 5 Nak Tlawm Lo An I Hliam. Sagaing ramṭhen, Banbalu peng Kutaung(ကိုးတောင်) hmunram, AlayHkung(အလယ်ခုံ​) khua pawng kahdohnak ah SAC ralkap tam ngai an thi i, 5 nak tlawm lo hliamhma an pu tiah Banbalu PDF nih cathanh an chuah.

SAC ralkap hliamhma pumi laak ding ah SAC ralkap le Pyusawthi an rat lioah nizan June 9 zinglei sml 8:00 hrawng ah Tatkung(တပ်ကုန်း) pawng in PDF nih an bawh hna i bomb an puahhnawh hna, tiah theih a si. Cu kahdohnak ah Banbalu PDF lei in ralkap 2 an nunnak liam ve, tiah Banbalu pengkomh Battalion(2) sin in theih a si.

Cu pin ah June 9 chun 12:30 hrawng ah Hkywin Hla(ကျွန်းလှ) khua in ChetThin(ချပ်သင်း) khua lei a kalmi SAC ralkap motor 6 cu ṭangṭi phu hna nih kan kah hna caah SAC ralkap tam ngai an thi, hliamhma pu mi zong an tam tiah, Banbalu PDF nih an langhter.

Myaung Le Yesagyo Kahdohnak Ah SAC Ralkap 15 Hrawng An Thi. Myaung peng le Yesagyo peng kar ah rallam sialtu SAC ralkap hna cu tualchung hriamtlai phu hna nih June 9, zinglei ah a thli in an kah hna i, bomb zong an puahhnawh hna caah SAC ralkap 15 an thi, tiah Myaung peng CDSOM phu sin in theih a si.

SAC ralkap hna cu Yesagyo peng in Myaung peng an kal ah tualchung hriamtlai phu nih zinglei suimilam 6:00 hrawng ah a thli in an kah hna i, cu kahdohnak ah cun SAC ralkap 10 leng an thi tiah theih a si. Lampi i kah an ton caah SAC ralkap hna cu vaivuan in an tlizaam hna i, cuti an tlikzaam lio ah cun bomb puahhnawh an tong chap i SAC ralkap 5 hrawng an thi ṭhan tiah theih a si.

SAC ralkap lei nih hriamngan 60mm le 40mm cu pehtlai in an puah caah tualchung hriamtlai phu lei pakhat nih hliamhma a tuar, tiah theih a si. Cu kahdohnak ah cun PDF Taloke, MGN Ranger, MGN Tiger, MGN 35, MGN 21,Shwe Oh (CDSOM) le Bu Gya Tit hna i fonh in, kahdohnak an tuah tiah theih a si. SAC ralkap hna nih cun Zayat Ni khuachung ah inn 2 an khangh i, Myaung peng Minhlah khuami pa 3 cu an tlaih hna, tiah theih a si. Credit: The Chin Post

Be the first to comment

Leave a Reply

Your email address will not be published.


*