Good News: Tun Myat Naing caah thawngpang tha tuk a si cang!

SAC Ralkap 100 Renglo Cu AA Sin Ah An Zaam!
========
Arakan Army (AA) sin ah SAC ralkap100 renglo an rak zaam tiah nihin June 14 ah an tuah mi Press conference ah AA chimnak nawlngeitu Khine ThuKha nih a chim. A rak zaam mi SAC ralkap hna cu kan si khawh chung in zuanruahnak he bawmh khawh kan i zuam i an umnak hmunhma zong kan tawlrel piak hna tiah AA chimnak nawlngeitu Khine ThuKha nih a chim.

SAC ralkap in a rak zaam mi hna a minung zat tu cu dikthlir in chim ka tim lo tiah a chim chap. SAC ralkap hna cu ram pumpi huap in mizapi vengtu ralkap, tlangcung hriamtlai phu hna he kahdohnak tampi a um i cu kahdohnak ah cun a thimi le hliammi an tam.

SAC ralkap kuttang ah um an duh ti lo caah tlangcung hriamtlai phu he fonhmi an tam bantuk in NUG sin ah pehtlai in mipi sin ah a dor mi ralkap le palik 10000 hrawng an si cang tiah NUG Union Prime Minister Mann Win Khaing Than nih a chim.

Paletwa Peng Ah Arakan Army( AA ) Nih Datsi Tank 70 Leng An Laak. Chin ramkulh, Paletwa peng ThaHpiaTaunh(သံဖျာတောင့်) khua pawng ah seh tilawng in datsi phormi cu, AA nih June 11 ah an tlaih, tiah tualchung mi sin in theih a si.
ThaHpiaTaunh khua cu Rakhine peng Kyauktaw khua in Chin ramkulh Paletwa khua kar ah a ummi a si.

Ti lawng cu Kyauktaw in Paletwa lei a kai lio ah atu bantuk in AA nih an tlaih hi a si. Datsi a ngeitu hi Rakhine rammi a si, tiah theih a si. Atu lioah Paletwa khua datsi man hi 1 litter ah 5000 tiang a phan. Thilman a kai tuk caah datsi cawknak tangka zong a har tuk, tiah tualchung mi sin in theih a si.

Ann Khuapi Um SAC Ralkap Officer CDM A Tuah; Rakhine ramkulh, Ann( အမ်း) khuapi nitlaklei Military Headquarters, No. 946 Construction Division (Engineer) in a chuakmi SAC ralkap Officer pakhat cu mizapi he hmunkhat ah ṭangṭi in CDM a tuah tiah Loikaw – PDF nihin June 14 ah a langhter.

Cu SAC ralkap Officer cu a luancia May thla ah PDF- Loikaw sin ah pehtlaih nak a tuah i CDM a tuah hnu, nihin ah mizapi sin theihter nak cathanh an chuah hi a si. SAC ralkap officer hi Loikaw – PDF Battalion nih a herhmi eidin thilri zapi cu tuanvo kan lak lai caah ram thumnak kal a duh a si zong ah kan tawlrel piak ko lai tiah mizapi ralkap phu nih an langhter.

SAC ralkap nih mipi cung ah phungning lo in tlaihkhih, hremnak, kahthah nak cu pehzulh in an tuah nak ah i tel duh ti lo in le an zoh kho ti lo caah a kenkip ah kal in nifatin titluk in CDM a tuahmi an um ko tiah an langhter.
Hramhram nawlngeihnak latu SAC ralkap dohnak caah hmual a ngei bik mi cu CDM tuah hi a si caah mipi cung ah harnak fak a petu SAC ralkap hi kaltak in CDM nan tuah nak lai kan in nawl hna tiah LoiKaw – PDF nih cathanh ah an langhter.

Myanmar ramchung ah SAC ralkap nih nawlngeihnak an lak hnu kumkhat leng chung ah SAC ralkap kaltak in CDM a tuah tu Ralkap le palik 10000 leng an si cang tiah April thla chungah an tuahmi NUG cozah i kumkhat tlin nak cathanh chung ah an langhter. 2021 February 1 hramhram nawlngeihnak an lak thok in kumkhat leng chung ah SAC ralkap nih meiduah in an hrawh mi mipi inn 20000 hrawng a si cang tiah Data For Myanmar nih cathanh an chuah.

CDM Siangngakchia 30,000 Kan Thim Cang Hna Tiah Kaung For You Federal Private School Nih Thanh. CDM siangngakchia 30,000 kan thim hna hnu ah sianginn apnak kan cohlan cang, tiah NUG fimcawnnak zung kuttang Kaung For You Federal Private School nih, nihin June 14 ah cathanh an chuah.

Siangngakchia thimmi hna hi CDM siangngakchia an si lai, a dang siangngakchia an cohlan lonak kong zong an langhter. Atu tiang siangngakchia 30,000 an cohlan mi hna chung in 22,000 hi sianginn fund caah an pek. 8000 hi a lak in kan chim hna lai, tiah an thanh.

Kaung For You Federal Private School ah a kai ding siangngakchia hna nih, SAC kuttang sianginn he pehtlaihnak ngeih lo ding le kai lo ding in an thanh. A kaimi an um ahcun sianginn chuah an si lai, tiah theih a si. Kaung For You Federal Private School ah aa apmi siangngakchia hi sing 200,126 an phan. Tuan ahcun siangngakchia 10,000 lawng an rak cohlan nain 30,000 tiang an cohlan ṭhannak a si.

Kaung For You Federal Private School ah NUG fimcawnnak phung ning in KG in Grade 11 tiang online in an cawng lai. 2020 cawnnak thar ning in an chimh hna lai. Singapore an cawn ning le Kanaan cu Japan siangniamrun cawn ning in an cawng lai. Sianglairun le siangsangrun zong an cawng lai. Cambridge mirang ca zong an cawng chih lai, tiah an langhter. Credit: The Chin Post

Be the first to comment

Leave a Reply

Your email address will not be published.


*