Good News; US Cozah nih Ukraine mipi cu a dirkamh taktak cang hna!

US nih Hriamnaam Ngan Ukraine Bawmhding Ati!
========
Donbas i Russia nih a thapi chuah in hma a lak chin lengmang cang caah, lamhla kah khawhnak hriamnaam Ukraine nih Western ram sinah bomh a hal hna. High-tech medium-range rocket system tlawmpal kuat dingin Tuesday ah khan Biden cozah nih thawng a thanh, tiah theih a si.

Cu rocket system cu US nih $700 millions man in bomh a timhmi chungah ai telmi a si. Cu chungah cun helicopters, Javelin anti-tank hriamnaam, raltuknak mawtaw, spare parts le a dangdang thilri an i tel, tiah US senior official pahnih nih an chim. Wednesday ah khin phungning tein cu hriamnaam pawl cu zapi hmuh in langhter an si te lai, tiah officials nih an chim.

Russia ram a chunglei pi tiang kah khawhnak rocket systems Ukraine nih an hal ko nain, cutluk taitai cu US nih pek a tim rih lo, a laiva tu pek dingin a tu bantukin biachahnak a tuah hi a si. Amah Ukraine ram chung i kahdohnak hmunhma pawl thatein a kap khotu advanced rokets system tu ka kuat hna lai, tiah Tuesday zanlei sang ah The NY Times ah Biden nih a chim.

“Russia a chunglei pi tiang a kap kho mi rocket systems belte cu ka kua kho hna lai lo. Ukraine an ramri he ai naihniamnak Russia khua le ram tham cu zeibantuk hriamnaam zong nih a phak khawh dih ko cu ta,” tiah Biden nih Monday ah khan a chim. Wednesday i zapi hmuh in an langhter te dingmi hriamnaam tom cu medium-range rocket systems an si i, meng 45 tiang an kah khawh, tiah officials nih an chim.

“Russia hmun le hma kan kap hrimhrim lai lo, tiah bia kan in kamh. Kanmah Ukraine ram chungah hmunhma a khuarmi Russia pawl kahnak ah hi advanced rocket system hi kan hman hna lai i, hmual ngei ngaingai ding kan si,” tiin Ukraine senior administration officials nih an chim. Hi rocket system hi Donbas ah an hman i, Russia miakpi nih a kahmi bomb tla lakin kahpiak, cun Sievierodenetsk hei ti bantuk raltuk a linhsatbik nak hmun in Russia ralkap pawl va dawi dih hna nak ah hman kan duh, ti i ruahchannak an ngeihmi kong Ukraine lei nih an langhter.

Western ram pawl sinin hriamnaam bomhnak tor le cheng i an phak hlan le Ukraine ralkap an thazaang a thawn hlan i Donbas pengkulh lak khawh zokzok hi Russia caah a biapitukmi a si. Cu ti lak khawhnak dingah cun Sieveirodenetsk hi an lak hmasa ta a hau. Hi khuapi hi Russia ramri in meng 90 lawng ai hlat i, Donbas pengkulh, Luhansk ah a ummi Ukraine nih an i humhak khawhmi hnihchun khua pakhat te a si.

“Ukraine nih a ramri lonh in kahdohnak a tuah ding hi kan duhpiak lo, thazaang kan pek lo. Russia cung fahnak pek duh ruang i tutan ral a caan vun rauhter zong hi kan duh mi a si ruam lo,” tiin NY Times ah Biden nih a chim.
Tutan hriamnaam kuat hi avoi 11nak a si i, security le economy kongkau i kan hnung i $40 billion bomh dingin Congress nih bia an chahmi chungin tutan hi avoikhatnak phaisa an hman a si lai, tiah theih a si. Hi rocket system hi Pentagon nawlngeihnak in suaisammi an si i, US hriamnaam sernak sehzung in hriamnaam an lak lai i, khulrang tein Ukraine lei ah an kuat ding khi a si. Hi system thar kongah Ukriane ralkap hi training pek ta an hau lai i, zarh 1 in zarh 2 chung cu rauh dawh a si.

Kuat kan timhmi hna hi High Mobility Artillery Rocket System (HIMARS) a si i, truck mawtaw ah tunhmi a si i, a kuanbawm (a thlaar in a ummi) pakhat ah rocket zuun 6 ai tel, tiah theih a si. Medium-range rockets pawl kahnak a si. Asinain, Army Tactical Missile System hei ti bantuk meng 190 tiang a kap kho mi long-range missile kahnak zongah hman khawh thiam a si, tiah theih a si. Amah belte cu pawl kah dingin cun timhtuahpiak/thazaang pek an si lo.

February i ral ai thok hnu khan US le a ramdanghawi pawl hi an karhlan bitter an i tim peng. An ram in Russia pawl thawl khawhnak dingah hriamnaam bomh an timh hna. Asinain Russia President Putin cungah fahnak pe kho dingin le Europe ram vialte cuul in buainak a chuahpi kho tu kahdohnak meici Ukraine nih a kau ding belte cu an duh lo i, an thlolh peng.

Asinain, caan a hung rauh tik i Russia nih an khualipi Kyiv lak dingin faakpiin kahdohnak a vun tuah in cun, US le a ramdanghawi pawl nih Ukraine lei ah hriamnaam thatha tor le cheng in an kuat than hna. Asinain, lamnaih kahnak hriamnaam deuh hi an kuat mi hna a si rih.

A donghnak ah cun, Russia nih Donbas an nawr i khua le ram tamtuk a hrawh chin lengmang cang caah, a tuan khawh chung tuan in Western ram nih rocket system tor le chengin kuat dingin Zelensky nih bomhnak a hal hna, tiah theih a si. US nih Ukraine a pekmi rocket system hi vawlei i tunhmi miakpi pawl nak in lamhla deuh a kah khawh. Cu tikah, Russia miakpi nih a phak lo nak hmun in Ukraine ralkap nih cu rocket in cun Russia ralkap hmunhma pawl hi duhtawk in a kah khawh cang hna lai, tinak a si.

“Ukraine caah ral kan do i, tutan raltuknak a kupthal a let khotu ding hriamnaam nan kan kuat tikah cun a kan luhhnawhtu mithalo pawl an lungthawnnak le an i zumhraihnak vialte hi khulrang tein kan hrawhpiak khawh cang hna lai,” tiah Zekensky nih a chim. “Ukraine nih rocket system tampi a herh ko” tiiah 2013 – 2016 lio ah NATO’s top commander a si bal mi US Air Force general hlun Philip Breedlove nih a chim.

“Hi hriamnaam hi kan kuat bak rih hna lo mi a thawngtukmi hriamnaam tha an si. Ukraine nih an herh lawng si lo in, a duh in an duhtuk nak kong hla sak in an kan sak hnawh zungzal mi hriamnaam an si. Vawlei pumpi nih tuan kho hna seh (Ukraine ralkap) ti an duhpiakmi hna a takin an tuah khawhnak dingah cun hi hriamnaam an sin phaakter kongkau ah kan i biatak ngai ngai a hau. Vawleicung ram thawngbik ah ai telmi Russia ram cu dawh amah te lawngin a dironh i doh ciahmah ko hi aw,” tiin Breedlove nih a chim.

Tutan bomhnak an pek dingmi kongkau ah US le WH officials nih zapi sinah bia an chimmi a um theng rih lo. “Kan Ukraine hawitha hna caah hmualngei tein raltuk khawhnak hriamnaam damhkhanpiak ding hi pehzulhtein kan tuaktan peng ko rih. Asinain, kan President nih a chim duh mi cu, Ukriane an ramri lenglei pi tiang a kap khomi hriamnaam belte cu pek kan tim hna lo, tinak a si. An tukmi ral a linhsat a penh ve rup in, kanmah lei zong nih zeibantuk hriamnaam tha dah kan bomh hna ah ai tlakbik lai, timi kong kan ruah deuhdeuh ve ko. A ruang cu, amah Ukraine lila zong nih Donbas hei ti bantuk ah hmual a ngei taktak dingmi hriamnaam pawl bomh an kan hal ve caah a si” tiin State Department Ned Price nih Tuesday ah a chim.

Donbas zongah cun Russia nih duhsahtein thanchonak a hmu cang fawn. Russia a tanhtu hliamtlai pawl nih an uk rih lo mi a tangmi hmunhma zong a dihlak in lak lawlaw ai tim. Ukraine ah hriamnaam ngan kua ti hlah u, tiin Putin nih Western ram pawl tu le tu ralrin a pek hna. Saturday ah khan minute 80 chung phone in Putin nih France le German hruaitu a chonh hna i, Western ram nih Ukraine hriamnaam an bomhmi kongah ralrin a pek hna, tiah Kremlin nih a chim.

Buaktlakin cun, Security kongkau ah US nih Ukriane hi $5 billion bak bomh dingin bia ai kam. February 24 i Russia nih Ukraine a luhhnawh hnu in Biden cozah nih Ukraine bomh dingin a suaisammi $4.5 billion telhchih in $5billion bomh an i tim, tiah theih a si. Credit: Chelsea Bawi

Be the first to comment

Leave a Reply

Your email address will not be published.


*