Hakha Car Gate Hakha Man Gate ah Mino Lawngte an si!

Hakha Car Gate Hakha Man Gate ah Mino Lawngte an si!
===========
Ruah lo rian ruangah Hakha Car Gate ka phan sual (Hakha Man) Car Gate velchum cu Motor Cycle nih a rak kulh dih zeidah a cang hnga tiah ka ar ko.

Khua ka cuan i an bag bei tete he Mino lawngte an si. Then lai sian a um lo nain, Awww Ruahchanmi an ngei cio theu lai ka ti. Media pakhat khat tal nan va chok ve te theu lai. Kan chumtual ah hi bantuk a um ahhin kan hawi le nih zei rian dah an tuan ti khuaruah a hung chuak deuh.

Khuate in Khuapi mino hi Ramleng chuah aa tim lawng te an si hna. A poi ngaingai ko Saya. Nai te khua te thitum nak kakal nak hna cu Mino an um ti lo an ti ka lungtha lo ngai e. Nizaan kha Car Gate lei ka phan ve, Motor a rak chuak rih lo mino lawng te upa cu pahnih thum lawng an si men lai. Kum 17 – 20 kar te te an si hna zoh ah ngaih a chia ko.

Phanh nak hmun paih ah Ram le Miphun philh lo te tu in um ahau ko. Zei ruangah dah hihmun ka panh ti ra theih fian ngaingai a hau chin. Halkha khuachung khuasak ding hmanh an ca’h ṭih a nung si.

Nihin May 18 zaan sml. 9:45 hrawng in Hakha khuapi bomb puah thawng nih a hun tlirh tthan. Khuachung ummi hna nih, “A tlawm bik voi 5 in voi 9 karlak cu a puak,” tiah an chimmi Palik Len sang lei in cun thang ngaiin an theih.

Nihin zaanlei sml. 6:30 hrawng zong ah khan Hakha Cawbuk Gate hrawng ah kahdohnak a chuak, tiah thawng kan theih.
Nihin May 18 zanlei sml 6:00 hrawng ah Hakha Cawbuk sang, SAC ralkap gate ah meithal thawng le hriamngan thawng a thang, tiah kan theih.

“Meithal thawng cu voi 100 hrawng a si ko lai, hriamngan thawng zong voi tam ngai a thang. SAC ralkap nih tlerh khawnnak ah an puah sawhsawh mi cu a si lai lo. Tlang lei zong in an puah len, tiah Cawbuk sang ummi pakhat nih The Chin Post ah a chim.

“Meithal thawng le bomb thawng hi minutes15-20 hrawng a thang lai. Meithal thawng a than lonak sau ngai cang. Tlerhnak sawhsawh ah an puahmi a si lai lo. An i kap ko men lai,” tiah Cawbuk sang um vemi pakhat nih The Chin Post ah a chim ṭhan.

Loklung khuami pakhat nih,”Meithal thawng le bomb thawng cu voi tam tuk a thang. Meithal thawng kan theih lonak a sau ngai cang. Ruah lo piin voitam ngai kan theih ṭhan tikah kan lau ngai ko,” tiah a chim. Zan sml 9:43 in 10:00 tiang zong ah Hakha khuachung ah bomb thawng voi 6 a thang tiah rih tiah theih asi.

Hakha khua, Cawbuk gate ah kahdohnak a chuak. Chin ramkulh, Hakha khua, cawbuk sang ah a ummi gate ah May 18 zaanlei sml 6:30pm hrawng in kahdohnak a chuak tiah theih a si.

Cawbuk sang ummi pakhat nih “Zaanlei sml 6:30pm hrawngah kahdohnak a chuak. Kahdohnak hi sml cheu hrawng a rau lai. Kan umnak inn hmai le phungki sianginn thlang ah a ummi bawlung certual ah hriamngan a tla. Gate a hngakmi SAC chungtel pawl an hrumai thawng zong aa thei” tiah The Chinland Post ah a chim.

Cawbuk gate hi Chin ram kahdohnak aa rak thok hmasa biknak hmunhma a si i cu lio kahdohnak ah SAC ralkap 5 an rak thi.

Mindat khuami 3 tlaih an tong. Mindat khua chung ah a ummi mipi 3 cu a luancia May 15 le May 16 ah SAC nih an tlaih hna tiah theih a si. “Sihchay lei mino 2 an si. An theihmi nu pakhat tangka thoh ding in an thlah hnu an kir lei ah an tlaih hna hi a si. KyaukHtoo ah cycle remh ding in a kalmi mino 1 zong tlaih a tong.

A hohmanh leng chuak hlah uh tiah nawl an chuah ni a si. Mipi vialte caah a herh tiah an ruah i rianngeitu pawl nih an thanhmi cu kan ngaih ah a ṭha” tiah Mindat khuami pakhat nih The Mindat Post ah a chim.

Tlaih a tongmi Mindat khuami 3 cu Infantry 274 ah an kuat hna i a luancia May thla thok ah Magway ramṭhen, Kyaukhtoo ah cycle cawk ding in a kalmi Mindat khua mino 2 cu an tlau i a tutiang an chungkhar nih an pehtlai kho rih lo tiah khuami hna nih an chim.

Kum khat lengah SAC nih mipi 1,844 a thah, 13,700 leng a tlaih hna. Myanmar ram ah hramhram in uknak lak a si kum khat leng chungah SAC nih thah ruangah sualnak ngei lo mipi a nunnak a liammi minung1,844 le tlaihkhih a tongmi 13,713 an phan tiah Assistance Association for Political Prisoners (AAPP) nih a thanh.

Atu cazin hi 2021 February 1 in 2022 May 17 tiang AAPP nih a khawmhsuatmi a si i a taktak ah a nunnak a liammi an tam deuh lai tiah a langhter. Pau dothlennak chung, May 18 tiang ah minung 10,661 tlaih an tong i minung 1,069 hi cu thongthlak ding in biakhiah an si cang.

Sualphawtmi chungin kum 18 tang hngakchia 2 telh in minung 68 cu thih ding in sualphawt an si cang. Tlaihkhih ding in nawlchuah ruangah a zaami 1,977 chung in thah ding in nawlchuah a simi 41 telh in minung 120 cu hriawknak in thah ding tiah nawl an chuah i thah ding in nawlchuah a simi 109 an phan. Cun, SAC nih 2022 April thla dih tiang chungah phihkhar khanh a simi inn 570 an si tiah AAPP nih a langhter. Credit: The Chin Post, The Chinland Post

Be the first to comment

Leave a Reply

Your email address will not be published.


*