Hakha khuapi Ralhrang Gate an kahdohnak kong thawngpang update!

Hakha khuapi Ralhrang Gate an kahdohnak kong thawngpang update!
==========
October 16 Hakha Khuachung Kahdohnak Ah SAC Ralkap 5 An Thi. Nizan October 16 zinglei ah Hakha SAC ralkap rungtlang gate le Gangaw lam gate kahdohnak ah SAC ralkap 4 hrawng an thi, tiah theih a si. October 16 zinglei sml 5:20 ah CDF Hakha nih SAC ralkap an kah hna hi a si.

Nizan October 16 zinglei ṭhiamṭhiam ah Chin ramkulh, vuanci umnak inn hngaktu ralkap cu Chin ralkap nih an kah ṭhan hna caah SAC ralkap pakhat a thi, meithal zunkhat zong an lak, tiah Hakha CDF upa pakhat nih The Chin Post ah a chim.

Nihin October 17 zinglei ah Hakha Cawbuk check gate ah kahdohnak a chuak, tiah theih a si. Tualchung mi pakhat nih, “nihin zinglei ah Cawbuk check gate ah meithal thawng a thang. Khualtlawngmi vialte zong an kham dih hna. Khuate lei in a rami lawng an luhter hna,” tiah a chim.

Khualtlawng ding pakhat nih, “Kahdohnak a um caah an kan kalter duh lo, khualtlaawng mi vialte cu an kan kham dih. Cu lioah SAC ralkap pawl cu Cawbuk check gate lamthlang lei in an meithal he an rak kai hna. An tam ngaingai, n bat zong an ba ngaingai,” tiah The Chin Post ah a chim.

Nihin October 17 zinglei in sml 10:30 tiang ah Rungtlang um SAC ralkap nih 120mm hriamngan zun 10 leng an kah cang, tiah theih a si.

CDF-Hakha Council Nih Biaceih Zung An Hun Khawh Cang. Chin ramkulh, CDF-Hakha Council nih biaceih zung kan hun khawh cang, tiah cathanh an chuah tiah theih a si. An cathanh cu a tanglei bantukin a si.

Dohthlennak chungah Hakha peng mizapi an him khawhnak le an inn le lo a him khawhnak ding kilvennak caah CDF-Hakha Council nih, 2022 October 11 ah Hakha peng mizapi biaceih zung cu kan rak hun cang i, sualnak a tuahmi(case) zong biaceih piak dingin kan cohlan cang hna tiah kan in thanh hna.

Mipi cozah nih mizapi biaceih zung a thar on than hlan tiang dohthlennak chungah sualnak ngeimi(case) kan rak tawlrel piak hna bantukin, dohthlennak a dih tiang ṭuanvo kan lak lai. CDF-Hakha Council, Pehtlaihnak, 1. 09403393378, 2. 09776591896 tiah CDF-Hakha Council nih cun cathanh an chuah.

SAC Ralkap Jet Vanlawng Nih Auto Tlang A Kah! Hakha le Thantlang kar um Auto tlang zawn cu SAC ralkap Jet vanlawng nih October 17, zaanlei suimilam 5:30 hrawngah a kah tiah theih a si.

“Nihin Zaanlei Suimilam 5:30 hrawng ah Auto tlang cu Jet vanlawng nih voikhat a kah, a pinh tuknak ah Thantlang Khuachung um mi inn zong ai hnin dih” tiah tuanvo ngeitu upa pakhat nih TCP ah a chim.

Chinram lei a kaimi motor bomb puahhnawh an tong caah minung tam ngai an hliam! Kalaymyo In Chinram Ah A Kaimi Motor Pakhat Bomb Nih A Puah Hnawh Caah Khualtlawng Minung 10 Leng Hliamhma An Pu Khualtlawng a phurmi Hmanlung motor cu Kalaymyo in Laitlang lei a kai lio, October 14 ah Tedim peng Tai Ngen khua cuanhnak lonh ah ruah lo piin kutser bomb nih a puak hnawh i, kum 10 tluk ngakchia pakhat telh in khualtlawng minung 10 leng hliamhma an pu, tiah theih a si.

Hliamhma pumi Chin nu pakhat nih, “kei hi cycle in ka kal i, ka hmai ah minung 20 hrawng a phurtu Hmanlung pakhat a kal ve. Tai Ngen khua cuahnak pawng an phanh ah bomb a puak i a thimi an um le um lo cu ka thei lo,” tiah a chim.
Akiangkap ummi keimah telh in a tlawm bik minung 10 cu kan i hliam lai.

Cu chungah hliamhma fakmi hi 4 an si i, pawngkam a ummi hna nih Kalaymyo ralkap sii-inn ihkhun 100 ah an kan kalpi, atu hi ka van dam deuh ca ah sizung fami ah kai thial” tiah a chim chap. Cu bomb puahnak ruangah motor lam cu ai bauh dih. Motor zong a thlalang a kuai i, cycle pakhat zong a rawk dih, tiah theih a si.

Kalay-PDF No.4 Battalion In Ralkap Pahnih Nih Ram Le Miphun Ca ah An Nunnak An Pek. Kalay-PDF No. 4 Battalion in ralkap Aung Than Sein, pumpak No. P12104260 le ralkap Thu Rein Soe, pumpak No. P12104264 hna nih ram le miphun ca ah an nunnak an pek, tiah Kalay-PDF nih cathanh an chuah.

PDF-Kalay No. 4 Battalion in ralkap pahnih cu, an biakam bantukin hranhram uknak doh in Federal Democracy ser nakding ca ah ralhmun pakhat ah ral an tuk cuahmah lio, 2022 October 11 ah an nunnak a liam hi a si.

Atu bantuk in ram le miphun le mizapi ca ah nan nunnak nan pekmi cungah No.4 Battalion nih upatnak kan in pek hna. Nan tantaak mi nan chungkhar zong an ngaihchiahnak kan hrawmpi hna, tiah Kalay-PDF No. 4 Battalion nih cun cathanh an chuah.

Mizoram Ah Nawlngei Bik Phu CYMA Le CYLA Hruaitu Hna Cu Chin Kum Thar (Tho) Zawh Dingah American Ram An Phan
India ram, Mizoram ramkulh ah rumra ngei bik le nawlngei bik phu a simi Central Young Mizo Association-CYMA, Central Young Lai Association- CYLA hruaitu hna cu Chin kum thar va zawh dingah American ram an phan cang, tiah theih a si.

CYMA Chairman Pu Lalhngeta Ralte, chungṭuan Professor Malsawmliana le CYLA Chairman Pu HC Ruatpuia cu, nizan October 16 ah American ram Indianapolis dam tein an phan, tiah theih a si. CYMA le CYLA in hruaitu pathum hna cu a ra laimi October 22 ah tuah dingmi Chin Kum thar zawh dingin Chin Association of Maryland nih an sawm hna hi a si.

A hlan zong ah Mizoram ramkulh, fimcawnnak zung palai zong American um Chinmi nih an rak sawm bal cang. CYMA phu cu Mizoram ramkulh khuapi le khuate ah chungtel an um i, Mizoram ramkulh chung ummi mino paohpaoh cu CYMA chungtel in an um dih. CYMA nih Mizoram ah ralzam dirhmun in ai dormi Myanmar rammi hna cu a lamkip in an bawmhchanh hna, tiah theih a si. Credit: The Chin Post

Be the first to comment

Leave a Reply

Your email address will not be published.


*