Hakha le Thantlang kar um Mipi ralkap cu ralhrang nih vanlawng in an kah hna timi kongah

Van Ral FYI
======
Naihrawng Chin ram ah vanlawng kan hmuh ahcun “duk” tiah kan lau. Phan tuk ding a um lemlo. A thenhai zia tu thiam a herh. Na phone ah khan 24Flightradar timi App download tuah law na cung i a zuang mi vanlawng kha International Flight a si le silo na hngalh khawh lai. Internet ngahnak ah na um a hau ve.

Na cung ah vanlawng a zuan i, na Flightradar Apps ah a cuan lo ahcun domestic vanlawng (ral vanlawng) a si kho. A muisam, a rong chinchiah khawh i zuam. A theih cu thei hmah uh sihlaw bomb a kah cang ahcun zeitin kan zam manh ti rua hnga, tiah biahaltu zong um a si.

Note: A tu i ka langh mi khi Ethiopian Airline a si. Shanghai ah a kal lai. Thantlang peng cung ah a zuan ca ah trace ka tuah i thinphan awk a si lo kha Apps ah a lang. International Flight a si lo mi paoh cu info kan ngah ko.

Chin le Rakhine kahnak ah a hmanmi vanlawng pawl hi YAK-130 deuh an si. Tada-U le Magwe in an ra. Thantlang hi 18-36 minutes kar (kei ka tuak ning ahcun 26 mins) ah an phan. Hi vanlawng pawl hi; (A) 23mm cannon kuan 100, S-8 (80mm Rocket) 40 OR (B) 23mm cannon kuan 100, 500 lbs Bomb 2 OR (C) 23mm cannon kuan 100, 1000 lbs bomb pakhat an i phurh khawh.

Kan Rau Nih A Rak Hngalh Ko Rua; Pafa hmelpalh a ti cang. Kan Commander he Council meeting in Camp kan phan. Ruah siamsiam nih a kan ciar ter pah. Dengteo amah buk kan fuh. Sakhanhmu nih a rak kan don. Ralkap pahnihthum zong an hunglut. Thadit damh pah khin panh ngai in kuan kan phurh mi kan samh. Khoimaw thaitholh fimtawl bang.

Tuzaan cu zaandang a kel ko. Zarhtin pastor umpi tu Camp Chaplain zong a rak um. Zarhpi zaan a si. A muih khin khawmh dar an run tuk colh. Kan nih kholhtawl le zaanriah ei ah Chapel kan tanh deuh lo. Pumhchuah tu in pastor kan leng lai tiah Commander he kan i ruah pah.

Pumh an chuak. Kan nau le he kan biaruah a hung tlo. Ralkap cheukhat kan buk ah an run i chap pah khin pastor inn ah kan i thial. A caan caan ah khuadawm nih Thlapa ceu a hun thlah tawn. Kan Camp a dai. Zaandang bang Camp ka riah zaan ah pastor he biaruah duh ah Sakhanhmu, Commander he Pastor inn kan fuh.

Cu hrawng ah cun kan nau le tam-u cu coka ah bu thup in an thu. Thlavang hawh lai bang Tingtang an tum len. Kan nau pakhat cu hla cauk chah nawn pi he coka lei ah a run tli. Coka lam kan hun tan pah ahkhin meikam ai bu mi kan nau le cu hlasak an i thawk liopi a si. Zuunhla an sa lo. Khrihfa hlabu an sa cuahmah. Ka lungthli in Crusade tuahka a si i dah maw, Hlabu sak an cim lo a si theo lai ka hei ti. Tlo ngai in KHB an sak len khi kan hna in kan hei ngaih ko.

Pastor inn ah sau ngaite kan i leng hna. Kei hoi hna cu 11:00 pm deng tiang Pastor he kan i kom. Cu tiang ah cun kan nau le hlasak an ngol kho rih lo. Ka hna in ka hei theih mi hla pakhat cu Khrihfa Hlabu No.25 kha a si. “Kan bu in kan i ton than hlan tiang” ti kha a si. Hna nih hi hla an sak khi a hei theih ko. Hla dang an sak mi cu ka cing lo nain cu hla te cu ka hei theih ko. Voikhat lawng an sa lo. Kan ralkap Tum Bawi Tling nih “cu hla te cu nolh than ko rih usih” tiah ai thawh nolh i kan sak nolh tiah a hnu ah kan ralkap nih an chim.

A thaizing 10 October 2022 cu zingdang kel bang in kan tho ko. Thantlang lei in kan nau Biak Tha le Chan Chan an rak phan ve. Pastor kir ding zing a si ca ah sakhanhmu nih ar a thah. Rawl ei lai ah pastor nih thla a cam. Thaw ngai khin kan ei cio ko hna. Ei hlan deuh ah kan dinning hall sak ding tungvang kan tah len. Coka saknak kan tah lio ah Biak Tha cu a hawi le capo a hung saih len hna. Kan hei ni len ko.

Ei khawh cun kei kai thawh colh ve. Ruah lo hi zing thil kan hun ton cu, ka thi a lau. Tunai 40 minutes hrawng lawng a rau. Ka phone a ring. Dir in ho hen tiah Secretary nih a run ka auh asi. Thawng ka run theih cu hlauhsaphawk ka lung a caw khut. Mit a mui.

Khulrang in kan siizung ah an run tlikpi colh hna. Atunai te capo a sai i aa lawm hiahmah mi kan nau le cu thi le daw he an rung zonh ko hna. Kan rau van a au colh. Zei ton hme kan ton. Zei hme kan tuah hmasa lai kan ti. Hruaitu cio ko kan i zoh ah kan mit a phiing dih. Kan thilton a rang tuk. Zeimawrek lo thil. Kan bomb storeroom ah ral lei hriam kan rak chiah mi kan fimtawlnak ah hithil kan ton a si.

Kan nih CDF-Thantlang Battalion-4 hi kumkhat le thlasarih kan kalchung ah avoikhatnak hliamkhuai fak le thihloh hi kan ton a si. Kan ton tir ah fakkhun in kan ralkap fel bikbik chung ah Salai Biak Tha Peng le Salai Tum Bawi Tling hna nih an kan liamtak. Kan zaang a zun i, kan thin a phudip.

Aw, minung nunnak ngai hi kan ti. Thilcang hnulei run ruahthan tikah kan rau nih a rak hngalh ko rua. Ruak he kan kir, mawtaw cung ah Biak Tha Pa le Tum Bawi Pa he mawtaw hnulei ah kan cuang. Khuadawm an chah lo. Kik lakah kan pathum in bia kan i ruah hna. Biak Tha pa nih “nai cikua ka mangmui a rak chia” a ti. Siizung kan riantuantu nih “zahan nai cu ka lung in mithi hla rumro ka sa” a ti ve. Kei cu zei mangmui le rau hngalh cu ka ngei lo nain; zing bomb inn kan kal lio ahhin kan ralkap bomb zohtu nih bomb pakhat a run chuah. Phone kai chawnh lio asinain, “kha bomb kha tawng hlah, fim zok” ka hei ti len.

Thil kan ton lai zaan kan ralkap nih coka hla an sak mi KHB 25 kha ka hna ah a rung cuang than. Cu hla te cu ka kau than. Kan rau nih a rak hngalh i ta, “an rak i thlah ko hna hi” ka ti. Pathian dawtnak in kan nih Battalion hi tukum chung ah crusade voihnih kan tuah kho. Avoihnihnak kan tuah ahhin kan nau Tum Bawi cu Pathian bia a hlanh i, heh tiah a laam. “A sunglawi tuk hih, a caan lio te a si hih” tiah Bawipa thangthat nak he a lam. Kha lio ah hi lai kan rak hngal lo.

Tutan kan crusade cu kan ralkap hna Pathian bia nih fak piin a hlanh hna. A dongh zaan zong cim hngal lo in Bawipa an thangthat. Kan ralkap hna ralram in an tlun i thlacamnak le tehtekhannak an ngeih caan ah an bia ka cin peng mi cu “A nung mi Pathian a um” tihi a si. Bawipa nih Biak Tha le Tum Bawi cu a hram ah a dinhter cang hna tiah ka zumh. A caan ah cun Bawipa ziah hen a fel bikbik le a tha bikbik hna hi na kan lakpiak tiah chalh awk te khin a um. Kan ui hringhran hna. Asinain, Bawipa kut ah an i din hrimhrim ti ka ruah zawn tu hin ka hna a hung ngam deuh tawn.

Khrihfa Hlabu 25 ah hitin ai tial. 1. Kan bu in kan i ton than hlan tiang in, nan sinah Pathian um ko seh. Amah nih him in keng ko seh. Amah chimhhrinnak in lamsial seh. Kan i ton than hlan tiang, Jesuh sin kan i ton tiang Kan i ton than hlan tiang Nan sinah Pathian um ko seh.

2. Kan bu in kan i ton than tiang in, Kan sinah Pathian um ko seh. A thla in in hupphenh ko seh. Nifa tein rawl in pe ko seh. 3. Kan bu in kan i ton than tiang in. Nan sinah Pathian um ko seh. Sifahnak kha na hmuh tikah, Nangmah kha a kut in pom ko seh. 4. Kan bu in kan i ton than tiang in, Kan sinah pathian um ko seh. Dawtngiatnak puan kha lek ko seh, thihnak tilet kha daihter ko seh.

Tum Bawi le Biak Tha; tutan dohthlennak ah kan Battalion lawng hmanh lo in, midang bochantlak ralkap tha tuanbia nan ser. Nan nunzia hi a tang rih mi hna nih CAWN AWK tha taktak an si. Pumpeknak, nawlngaihnak, Pathian bochannak le zumhawktlak sinak ah ai zuam mi nan nunzia hna nih cawnpiaknak tha taktak an kan pek. Nan kal lai kha nan kan chim ta lo nain, nan kal lai kha kan rau nih a rak hngalh ko.

Dohthlennak a dih hlan tiang; Federal zaukphung le ralhrang uknak a hram in bongh ding ah a tang rih mi Dohthlennak rian tu cu kan nih nih kan run pehzulh lai mu. “Kan bu in kan i ton than hlan tiang, kan sinah Pathian um ko seh.”
KAN RAU NIH A RAK HNGALH KO. Nan dawt mi hruaitu le nihin ah thisen biakam he an upat hna tu; Salai Tial Hram Ling

Be the first to comment

Leave a Reply

Your email address will not be published.


*