Hakha Pawl Kan Ngaithiam Hram Uh!

Hakha Pawl Kan Ngaithiam Hram Uh!
=========
Australia um Tum Bik Chaicheih duhtu Pi Olivia Nu cu nai te ah fak tuk in a chuah sual. Hi kong hi tuan deuh ah ttial ka duh ko nain Olivia nu a lungrawk tuk lai i a mah le a mah hna a tuahmawh lai ti ka phan caah tlai tu ah ka van ttialnak a si.

Olivia Nu nih Hakha nih Thantlang zei ah an kan rel lo, kanmah vial nih harnak an ton lio ah ka fa puak bu he kan zoh hnawh hna, a tu ah Thantlang harnak kan ton i zeizei a um lo tiah a tial. Minung tampi nih dirkamtu catlap an rak post cio. Bomhnak min cazin a si. Keimah ka ruahnak ah cun bomhnak min cazin hi an rak post lo zong ah ka fiang tuk ko. Post piak hmanh a hau lo.

Olivia Nu hi a cawlcanghnak ah thangthat a ton ngaingai i, a hruhpi sual tiah kei nih cun ka ruah. Hakha le Thantlang hi kan i dannak pakhat hmanh a um lo. Holh khat, rawl chuan khat, nunning khat kan si. Kan biakinn zong aa khat. Hakha khua chung ah Thantlang an tampi. A sullam cu thlaidang ding a si lo.

Olivia Nu hi hi kong ah cun a hrut taktak si. Min Aung Hlain nih ruahnak a cheuh ve rua. Amah hi dalan rak si ziar sehlaw kan thei lo. Mifim zer in a zer kho mi si. Cu caah Olivia nu kong lam hi ttha deuh te in nan hlat a hau tiah kei nih cun ka ruah.

Miphun tthencheunak ca a ttialmi hi zei dah a ruahnak a si hnga? Hakha zong nih Thantlang ti ding a si lo, Thantlang zong nih Hakha ti ding si lo. Kan i khat bak. Kan i dangnak a um hrimhrim lo.

Olivia Nu hi a hrut tuk i a si ko. Cu caah Hakha aa timi miphun, unau hna rak kan ngaithiam hram uh. Olivia Nu pakhat ruahnak hi Thantlang mipi nih kan zawng hrimhrim lo. Tette piah zong a hau lo. Kan biakin a khat. kan thawhlawm a khat. kan eimi a khat. Pum khat kan si. khua khat kan si. Global Village News

Kan BiakMi Pathian Nih Cun LungThin ThiangMi Si A Duh! Halkha kan pipu hna nih Rung le Met an rak biak lio chan i thla an rak cam ah hin kanmah Halkha mi lianh le ngannak caah thla an rak cam lo. An rak cam mi cu, mipem daw law sathlai daw ti hi a si. Mipem le sathlai dawt le huncho ternak caah hin thla an rak cam.

Asinain an thlacamnak ah an rak telhchihmi pakhat te cu, Halkha a dohdalh tu cu hrawk hna law hlothlau hna ti hi a si ve hui. An thlacamnak i kanmah lianh le ngannak caah an rak cam lo bantuk tein kan lianngan in kan hungcho ve tak tak lo. Mifim le mithiam zong kan umlo, mirum zong kan um lo. Mipem le sathlai dawt le hunchonak ca i an rak cam bantuk tein an hungcho ve tak tak ko.

Asinain Halkha a dohdalhtu hna cu an tumchuk ve lai i an lotlau ve ko lai. Halkha nih hin a ho lungthu tappi ah kan va kal le kan va thu in rawl kan va chuang lo cu. Kan santlaihlo bu tein a thawt ah a nam ah kanmah kan tappi le lungthu teah dahkaw kan thut le kan chuan ve ko cu.

Zeiruang ah dah Pathian nih Halkha thengmang te ah kan Siangbawi te hi a hun hruai hna? hram a bunhter hna? i an lu a phumter hna? Mah hi hi sullam ngei lo in Pathian nih a tuah lo.

Kan hruh le kan ngat, kan fimthiamlo le kan santlaihlo bu tein lungthin thiang tein kan rak um mi te kha, Dingthlu Lairel Pathian nih a rak hmuh i Halkha thengmang te ah a mi hna cu Lairam le Lai Miphun ceutertu ding ah a hun hruai hna i hram a bunhter hna. Halkha cu Pathian nih a thimmi khua, hmun le vawlei a si. Thlua a chuahmi khua a si.

Halkha le Thantlang hi tthen awk tthalo mi khuakhat chung i sang sanghnih bantuk kan si. Uknak lei in a uk le a tolrel fawi deuh seh Township dang ah an rak tthen mi asi an ti. Kan lungthin tu cu aa tthen lai lo dah.

1990 thimnak ahkhan Thantlang peng mi kan Pa Lian Uk cu cuhnak hmunhma an rak pe thiam lo i Halkha tu nih hmunhma an rak pek leng ah heh tiah an rak zuanhnawh an rak dir pi i teinak a rak hmu. Pumkhat le lungthin khat kan sinak a lang ko.Na-in hrik le tthah bantuk um nuam lo in a kan umtertu hi an um pah lengmang.

A liam cia kum zeimawzat ahkhan Australia Lai khrifabu pakhat ah meeting an rak tuah i,” kan pastorte hi khikaa lei mi lawngte an si, kanmah lei mi pastor an um ve aherh” tiah mifimhrut pawl nih an rak ti i lung a rak nuam lo ngai nain thil a tluang tthan ko.

Hi bantuk tete hi zeimaw caan ahcun a chuak pah tawn i mipi(mi tam deuh) an lung a fiim caah a rak buai tuk lem tawn lo. Tutan zong ah upat mi mi cheukhat nih pengtlaang thleidannak phun le tthencheu duhnak phun in a au mi an um men ko lai. Mipi kan lung a fiim i kutsih thlah lo te in hmai kan fon tu aherh.

Thlantlang ton kha Halkha ton asi ko i Halkha ton kha Thantlang ton asi ko. Zeimaw associations le communities ah admin lei afawi deuh nakhnga tthen aherh caan ahcun tthen aherh caan a um ve ko, i uhcah le i siikcaak silo in.
Pakhat kan si ko, lungthin khat kan si ko. Kil khat lawng zoh le ngaih lo in a kenkip field zoh le ngaih in khua ruah thiam kan hau hna.

Halkha Khua sining tthaten a fiang lo mi an si. Halkha ah hin Halkha Peng Minung nak in Thantlang Peng Minung an tam deuh. Thantlang Khuasa nak in Halkha ah Thantlang peng Khuasa an tam deuh. Cu nih a langhtermi Halkha le Thantlang zeitihmanh in tthen awk ttha lo. Cu caah Kan Lai Phungthlukah khat ka phei, khat ka liang, ti bantuk kan si.

Halkha i Khuasa ve lo mi nih cun Halkha i Khuasa mi kong cu an theih fawm lo cu, ruahnak bik deuh si ko cuh. Thantlang-Hakha Chiattthat bu or Thantlang-Hakha Siangngakchia bu ti bantuk pawl ai ahkhin “Lai” tiin rak ti kho uhsihlaw cu a tu ah a kan bawmh ngai cang ko hnga mu. Hi khuahnih min in kan i auh chung poh cu kan tongpah rih ko lai.

Aw mifim nih an fim thlu lo, mi hrut zong an hrut thlu lo, ti khi ka ruat ngai, ka pumpak pak hmuh ning ah ah Thantlang nih a tuar mi hi Hakha nih a tuar tluk ah ka ruah ve, mi nih Thantlang an bomh tikah kan mah Hakha zong hi a ka Bomh tluk ah ka ruah tawn.

Unau Chung Khar khat kan si rua ka ti ko nain kan mifim Olivia Nu Bia nih nih ka ruah nak thuk deuh in a ka luh ter. A ruah ning ban tuk in thil a kal lo ruangah a si bik ko lai tiah, ka ruat thiam tuk. ka chim cia bantukin a fim mi le a hrut mi nih, an hrut dih in an fim dih lo ka ti bang khan a si ko hih.

Mi zei pauh nih theih thiam nak he lung rual nak lam tu panh uh sih law, kan hmui tinh a si mi Kawl Ral Hrang tu khi doh cio ko hna uh sih kaa lawm. Credit: Tawk Awi Thang Sangtechung, Than Lau, Roland Siang Or Bawi Lung

Be the first to comment

Leave a Reply

Your email address will not be published.


*