Hakha Peng Tinam Khua Cu Ralhrang Pawl Nih Inn Mei In An Khangh

Council ralhrang nih Tinam khua inn 10 hrawng an khangh cang
➖➖➖➖➖➖
March 28, 2022

Hakha, Zokhua Peng chung kahdohnak zarhkhat chung a chuah hnu Council ralhrang nih Tinam khua inn pawl cu 2022 March 28 ah an khanghpiak hna tiah theih a si.

Atu an khangh mi inn hi a langtlang in kan cuanhnak ah cun inn 10 fai a si cang. Zing suimilaam 10:30 tluk inkhan meikhu kan hmuh cang tiah khuami nih an chim.

Zokhua Peng chung ah CDF Hakha, CNA hna i bawm in Council ralhrang an kah hna hi zarhkhat fai a si cang. Ni li an i kah hnu ah Council ralhrang nih CNA, CDF hna cu karceh in kah an timh hna tiah kan theih.

Inn a kangmi kong he pehtlai in, “Inn an khangh hi nihin zinglei sang ahkhan a si. A tlawm bik inn 10 cu a kaang cang men lai. Dikthlir in cun kan thei kho ve rih lo. Kan zaamnak hmun in a khu kan hmuh mi a si. A kangh ning zoh ah a tam lai,” tiah khuami pakhat nih a chim.

Inn an khangh pah in meithal le bomb an puah chih tiah theih a si.

#TheHakhaPost

Watchman Nee A Mak Ko
————————–
Watchman Nee nih Pathian bia suimilam paruk chung a ruahmi hna cu thlennak an hmuh dih. Tiluk ram thawngtha a chim ruangah thong an thlak. A cawngtu hi suimilam paruk an cawngh ahcun Khrihfa sin i, a ca petu ah a ser khawh hna. Cu tikah Chiarman Mao Situng cu a thin a phawh tuk. Khrihfa biaknak a karh lonak dingah order a chuak. An ram ah ram dangmi missionary a ummi hna cu an thawl hna i, an thahmi zong an um. Cun an ram i, Khrihfa a simi hna cu an tlaih hna i, thong chungah an thluak an tawl hna. Asinain Khrihfa cu an karh chin lengmang.
Watchman Nee cu thong an thlak tikah a cawngtu paoh kha a cawnpiak hna i, “communist nih vancung an phakpi kho lai lo, Jesuh Khrih thisen lawng nih vancung an phakpi hna lai” tiah a ti hna tikah an lung an i thleng i, amah a bawmtu ah an cang lengmang. Palik bawi nih Watchman Nee nih a cawngtu kha a tei hna, a ca an pekpiak caah a ca hi Khrihfa pawl kut a phan lengmang ti kha an theih tikah a cawngtu cu thaphnih in an chiah hna. A cawngtu hi suimilam paruk nak tam cawng hna hlah seh tiah order a chuak.

Khuaruahhar taktak a simi cu suimilam panga chung a innka hram i an dir paoh ahcun a cawnpiaknak hi an lung a lut i, an lung an i thleng lengmang. Watchman Nee hi thong an tlak caah hin thong innka hram in Jesuh Khrih zumlotu tampi nih Khamhnak an hmu.

Pathian biatak aupitu pawl tuanbia zoh tikah Pathian nih a hmanning hna hi an fimnak le an degree ruangah a si lo. Khrihfa phunglam an thiam tuk ruang zongah a si lo. Kum tampi Khrihfabu ah experience an ngeih ruang zongah a si lo. Pathian kha an thinlung dihlak in an zumhnak thawng bak in a si ko. Paul nih Pathian a zumhnak thawngin khuaruahhar a tuahmi cu a pavuah le hngawngngerh hmanh nih mizaw an rak damh ko( Lamkaltu 19:12). Kannih zong Pathian kan zumhnak fek chinchin ko seh.
Rev. Sang Uk Cung
GS, CBA, Kalaymyo

 

Be the first to comment

Leave a Reply

Your email address will not be published.


*