Hakha Rungtlang Ralhrang Gate Kahnak kong update!

Rungtlang Gate kahnak!
======
Nizan zingka I Hakha khuapi i thawngpang theihmi khuari thawngkha , Hakha CDF nih Rungtlang Ralhrang Sakhan an main Gate le Ganggaw lam gate an va kah mi hna thawng asi.Ralhrang pa 4 an thi.

Cun CNA special force le Hakha CDF ibawmh in Winkyi pawl office um nak an vakah Ralhrang pakhat athi.Meithal athar mite pakhat an lak khawh fawn.

CDF Hakha le CNA khaa bawi lawmh nan um tuk. Kan ttang chin hna lai cu. Rungtlang kan lak zawk hau ko. Kan ralkap hna nan tthawng tuk pathian kan tei hlan tiang in huppheng zungzal hna seh. Minute 5 le 10 kah te zong a țha hnem ve ko. mah chung ah khan pali nga cu thih khawh si.

Hakha khua Chungah Hmunhnih Ah Kahdohnak A Chuak. Nihin October 16 deilei ah Gangaw lam SAC ralkap check gate cu Chin ralkap nih an kah, tiah theih a si. Deilei sml 5:20 ah Gangaw lam um SAC ralkap check gate cu Chin ralkap nih minutes 5 chung hrawng an kah hna. SAC ralkap nih hriamngan zong an puah len.

Cu pinah nihin October 16 deilei sml 5:35 hrawngah Hakha thar, Chin ramkulh vuanci (Ministers) pawl an umnak hrawngah Chin ralkap hna nih minutes 10 chung hrawng an kah ṭhan. SAC ralkap nih hriamngan voi 5 hrawng an puah, tiah theih a si. Thawngpang update a um cun thanh khawh kan vun i zuam lai.

SAC Ralkap Le Chin Ralkap Kar Kahdohnak Ah Chin ralkap Nih Hriamthil Zeimawzat An Lak. A luancia 2022, October 13 ah Thantlang le Tiṭa kar kahdohnak ah kan Chin ralkap nih SAC ralkap sin in hriamthil zeimawzat an lak khawh tiah theih a si.

Cu an lakmi hriamthilri hna cu – MA box 16, 60MM 3, Nam te 3, Phon -lung 5, MPT sim – 8, Khetan box 5, Ball pen box 3, USB card 4, Nazi 3, Phasa bawm – 1 hna an si theih a si. CDF-Thantlang Commando.

Hakha Ah Pu Thawng Hmun Inn A Kaang; Hakha khuathar Thantlang lam ah a ummi Pu Thawng Hmun inn cu October 14zaan suimilam 11 le 12 kar ah a kaang tiah theih a si.

“Zeiruangah a kangh ti hi fiangin theih a si lo nain SAC ralkap hriamngan nih a khen ruangah a si lai tiah zumh a si! Aruang cu a kangh lioah meithal le bomb puah thawng pehtlai in a thang peng” tiah mithmutu pakhat nih The Chin Post ah a chim.

Inn ngeitu hi Thantlang peng Khuafo khuami a si i Hakha ah ai thialmi an si, an inn hi dothnih a si i kum 2015 ah sakmi a si tiah theih a si.

Matupi Ah Head of Education Thah A Tong; Chin ramkulh, Matupi pengkulh fim cawnnak zung ah head of education tlaitu U Tin Luai cu nihin October 16, zaan suimilam 8:00 ah meithal kah in thah a tong tiah theih a si.

U Tin Luai cu SAC ralkap nih hramhram uknak an lak hnu SAC ralkap kuttang ah rian pehzulh in a ṭuantu pakhat a si.
U Tin Luai cu a umnak inn ah a rian pehzulh in a ṭuan i, nihin October 16 zaanlei ah a umnak inn ah meithal kah in thah a ton hi a si. U Tin Luai thah a tonnak kong ah mi zei phu nih an thah theih a si rih lo.

Hakha Pengkomh Meithat Zung Ah Kahdohnak A Chuak, Palik Pakhat A Thi I Meithat Motor Pahnih A Kaang! Chin ramkulh, Hakha thar Hakha pengkomh meithat zung ah kahdohnak a chuak i palik khat a thi, meithat motor pahnih a kaang, tiah theih a si.

Tualchung mi pakhat nih, “Zahan October 14 zan sml 12:00 hrawngah Hakha thar um meithat zung ah kahdohnak a chuak. Zanṭim hnu a si caah kan lau ngaingai. Anmah le anmah maw an i kah hnga timi tucu kan hngal lo,” tiah a chim.

Nihin October 15 zinglei ah SAC ralkap pawl cu motor khat in meithat zung lei ah an kal. Meithat motor pahnih a kaangmi zong kan hmuh, tiah mithmutu pakhat nih The Chin Post ah a chim.

Meithat zung kahdohnak ah Chin ralkap nih maw an kah hna asilole anmah le anmah an i kah dik a si, palik pakhat cu a thi, tiah min langhter a duh lomi pakhat nih a chim. Crd-The Chin Post

Relchap, Mobae Ah SAC Ralkap Nih Meithal Duh Paoh In An Kah Caah Khualtlawng Mi Pakhat Hliamhma A Pu, Karen ramkulh, le Shan ramkulh ramri Mobae khua chungah kahdohnak zeihmanh um loin SAC ralkap nih meithal an kah caah khualtlawng mi pakhat a cal ah a khen i, hliamhma fak ngai a pu, tiah theih a si.

Nizan October 14 chun sml 12:00 hrawngah Mobae khua Settawyar(စက်တော်ရာ) khua tlangpar ah umhmun khuarmi SAC ralkap nih, cycle in khual a tlawngmi pa pahnih cu an kah hna caah pakhat cu a lu ah meithal kuan nih a khen, pakhat cu a luat, tiah Mobae PDF ralkap pakhat nih a chim.

“A hlan zongah mipi cu um kal i ralring u tiin kan chimh lengmang ko hna. Thil poipang a um theng lai lo tiin an ruah i an kal caah atu bantuk in kah an ton hi a si. Hliamhma pumi hi cycle khaltu maw a si, a hawipa dah a si ti cu fiang in kan hngal kho rih lo. Hliamhma pumi cu sii-inn ah kan kalpi,” tiah a chim chap. Khualtlawng mi kah an tonnak hmun cu Mobae PDF nih mizapi um kal lo ding in ralrin an pek hna, tiah theih a si.

Monywa Khua Chungah Ke In Rallam A Sialmi SAC Ralkap Le Motor Cu Bomb Puahhnawh An Ton Caah Ralkap 8 An Thi, Sagaing ramṭhen, Monywa khua chungah ke in rallam a sialmi SAC ralkap le motor cu bomb puahhnawh an ton caah SAC ralkap 8 an thi, tiah Democratic Guerrilla Force(DGF) sinin theih a si. Nizan October 14 zanlei sml 5:31 ah Nyaungpin Zauk sang um, B.E.H.S siangsangrun sianginn hmai ah ke in rallam a sialmi ralkap le motor cu bomb lung hnihin puahhnawh an ton caah SAC ralkap 8 an thih hi a si.

Nizan October 14 ah ke le motor in rallam hmunhnih a sialmi SAC ralkap cu Monywa-Mandalay lam Monywa khua luhnak check gate lei an kal lioah bomb in kan puahhnawh hna caah SAC ralkap 8 an thi, tiah Democratic Guerrilla Force nih cathanh an chuahmi ah an langhter.

Kumkhat Chung Ah Buaibainak Phun 120 Leng Kan Tawlrel Khawh Tiah Mindat Peng Mipi Ukhruainak Phu, Judiciary Department Nih An Thanh, Kumkhat chungah buaibainak phun 120 leng kan tawlrel khawh tiah Mindat mipi ukhruainak phu, judiciary department nih nihin October 15 ah an thanh tiah theih a si.

Chin ramkulh, Mindat peng chungah, sualnak a karhnak hnga lo le mipi an zalen khawhnak ding ca ah le an humhimnak ding ca ah, a luancia 7 July, 2021 ah mipi ukhruainak phu nih Judiciary Department kan dirh. Caan karlak thil sining zohchih in, zulhphung dang dang hna zong kan ser. Thiltha a chuahkhawh deuhnak ding ca ah, Mindat peng chung ahhin pengtlang 9 kan um i, pengtlang 5 chung ah hin Assessment zong kan tuah tiah an cathanh ah an langhter chih.

Kumkhat chungah mi cung fahnak pekmi kong, mithah lainawn kong, zu din kong, rithaisi tonghtham kong, fir kong, mipi hnahnawhnak pekmi kong, phung ning loin a miak kawlnak kong, hmun icuhnak kong tiin buaibainak phun tampi hna cu, Mindat mipi ukhruainak phu, Judiciary Department nih an tawlrel tiah theih a si.

Palaw Ah SAC Ralkap Sentari Cawngmi Bomb Puahhnawh An Ton Caah Ralkap 3 An Thi, Tanintharyi ramṭhen, Palaw peng Khamaungtaw(ခမောင်းတော) khua ah sentari cangmi SAC ralkap pawl cu bomb in kan puahhnawh hna caah ralkap 3 an thi, tiah King Cobra nih an langhter.

Nizan October 14 zanlei sml 2:00 hrawngah King Cobra nih sentari cawngmi SAC ralkap pawl cu, bomb in an puahhnawh hna i, SAC ralkap 3 an thih hi a si. Hliamhma pumi SAC ralkap tu cu fiang tein kan thei kho rih lo, tiah King Cobra phu nih cathanh an chuah tiah theih a si.

Electric Mei Hri Remhlio Ah Mei Nih A Leih Hna Caah Minung 3 An Thi, 2 Sizung An Phan, Mizoram ramkulh chung, Lawng
tlai District, Rulkual khuami hna cu October 14, zinglei ah electric mei hri an remhlio ah ruahlo piin mei nih a leih hna caah minung 3 cu an nunnak a liam i, 2 fakngai in minung 2 an i hliam caah sizung ah an kalpi hna tiah theih a si.

October 12 ah Rulkual khua he kilometres 4 hrawng ai hlatnak hmun electric mei hri cu thingkung pakhat nih a nenh caah mei a rawk, cu caah electric zung nih Rulkual khuami hna cu tlangrian ṭuan dingin an auh hna tiah theih a si.
Tlangrian ṭuan an kal dih hnu mei hri an remh lio ah atubantukin a thih hi a si. Mei hri leih ruang ah a nunnak liammi hna cu Samuel Lalthianghlima, Lalramdinpuia, Lalrinchhana hna an si i, Lalrinenga le Lalnghawrliana nih fakngai in hliam an tuar caah Lawngtlai sizung ah an thlop hna tiah theih a si.

Magway Ah Palik Zung Cu Hriamtlai Minung Pahnih Nih An Kah Caah Palik Bawi Sein Win A Thi, Magway ramṭhen, Magway khua um leilawng tawlreltu palik zung(ယာဉ်ထိန်းရဲ) cu nizan October 14 zan sml 8:00 ah hriamtlai phu khat nih an kah caah leilawng tawlreltu(Traffic police) bawi Sein Win cu a hmun ah a thi colh, tiah theih a si.

October 14 zan sml 8:20 ah Magway ramṭhen leilawng tawlreltu zung cu minung pahnih nih meithal zun nga in an kah caah palik bawi Sein Win cu, a lu le a ṭaang ah an khen i a hmun ah a thi colh. Leilawng tawlreltu palik zung chungah minung pahnih nih cu an lut i, palik bawi Sein Win an kah thah hi a si, tiah tualchung mi pakhat nih a chim.

Chiphwe(ချီဖွေ) Peng Sha Ngaw Hlei Check Gate Hngaktu SAC Ralkap Cu KIA Nih An Kah Hna, 3 An Thi , Kachin ramkulh, Chipuwe(ချီဖွေ) peng Sha Ngaw(ရှငေါ်) hlei check gate cu KIA Brigade 7 nih, nihin October 15 zinglei sml 7:00 hrawngah an kah hna caah SAC ralkap pathum an thi, tiah tualchung mi pakhat nih a chim.

“Brigade 7 in KIA ralkap hna nih zinglei sml 7:00 hrawngah Sha Ngaw check gate hngaktu Khah Lah Yah 521 cu suimilam a cheu chung an kah hna i, SAC ralkap 3 an thah hna, tiah tualchung mi pakhat nih cun a chim. Sagaing ramṭhen le Kachin ramri ah KIA le PDF hna i bawm in SAC ralkap cu an doh hna pinah Shan ram nichuah lei zong ah SAC ralkap le KIA kar kahdohnak a rak chuak tiah theih a si.

Mekong Tiva Ah Tilawng Pakhat A Pil Caah Siangakchia 14 An Nunnak A Liam, Combodia ram ah sianginn in an inn lei a tlunpi tu siangakchia phurtu tilawng cu Mekong tiva ah a pil caah a tlawm bik siangakchia 14 an nunnak a liam, tiah nawlngeitu hna nih nizan Octobet 14 an langhter.

October 13 ah Combodia khualipi Phnom Penh in nichuah thlanglei meng 33 a hlatnak Kandal ramkulh ah tilawng pakhat cu Mekong tiva ah a pil, mi bawmchantu phu hna nih siangakchia pakhat a tlin lo caah an kawl cuahmah rih ko, tiah ramkulh palik bawi Chhoeun Sochet nih Reuters thawngthanhnak ah a chim.

Tilawng nih Mekong tiva ah a pilpi i nunnak a liammi siangakchia hna cu kum 11 in 14 kar an si. Tilawng ngeitu nih thilri a phurh pinah nun khamhnak angki zong a chiah lo caah siangakchia hna an nunnak a liam hi a si, tiah palik bawi Chhoeun Sochet nih cun a chim.

Tilawng ai citmi chungah ngakchia pahnih le tilawng chungah tuanvo ngeitu upa pahnih lawng an nung, tiah AFP nih an langhter. Combodia Prime Minister Hun Sen nih, siangakchia an nunnak a liammi kong he pehtlai in a ngaihchiatnak kong social media ah a chim i, nunnak a liammi hna chungkhar bawmhchanh dingin tuanvo ngeitu zong nawl peknak a ngeih hna, tiah theih a si. Crd-The Chin Post

Be the first to comment

Leave a Reply

Your email address will not be published.


*