Hi tluk mino cathiam le vawleicung level hmanh ah chuahpi ngam dingmi!

Tanghra Exam Ah Subject Dihlak In Distinction Ngahtu Ko Htat Myat Naing Cu SAC Nih Thihhlanlo Thongthlak Timh
=======
Yangon ramtthen, North Dagon, Block 29 ah um mi Ko Htat Myat Naing cu kan hnu May 18 ah SAC ralkap biaceihzung nih phungrelnak cang poh-mah 50(j) in thihhlanlo thongtla ding in bia a ceih tiah a chungkhar he neihniam in ummi hna nih RFA ah an chim.

Ko Htat Myat Naing cu tualchung PDF hna he pehtlaihnak ngei in bawmhchanhnak na tuah tiah an puh caah SAC ralkap nih an tlaih i thih hlanlo thong thlakding in biakhiahnak an tuahpiak tiah an chim.

“A mah cu cathiam tuk mi a si, Mah um in a ummi a si ko nain a luancia March 2 ah SAC ralkap thazang tampi in an kal hnawh i an tlaih, a kut an leh i an hrem pah rih, a tu ah thih hlanlo thongthlak dingin biakhiahnak an tuahpiak chap, an thiltuah a diklotuk” tiah an chim.

Ko Htat Myat Naing cu 2016-2017 cacawn kum ah tanghra subjects dihlak in distinction a hmutu a si i, Yangon Technology University (YTU) ah kum thumnak a cawnglio mi sianghngakchia pakhat a si. Kum 20 hrawng lawng a si rih mi cathiam mino pakhat a tu bantuk thihhlan lo thongthlak ding tiang in an timhmi hi a diklo tuk tiah chungkhar he neihniam in a ummi hna nih an chim.

RFA nih an khomhsuat khawhtawk cazin ning ah SAC ralkap nih hramhram nawlngeihnak an lak hnu in May 19 tiang kumkhat luan chungah SAC ralkap biaceihzung nih thihdan pekmi hna hi minung 114 an si, thong kum 7 in thih hlanlo thongtla ding biakhiahnak tuahpiak mi hi 78 an si.

Gangaw Peng Kahdohnak Ah PDF 7 An Nunnak Liam. Magway ramtthen, Gangaw peng Myitta tikhamnak pawng ah SAC ralkap nih vanlawng in an kah hna caah tualchung ralkap 7 nak tlawmlo an nunnak a liam tiah Gangaw peng mizapi uktu phu lei nih an thanh.

May 26, zinglei suimilam 11:00 hrawngah SAC ralkap nih tualchung hriamtlai phu umhmun an khuarnak sakhan Myitta ti khamnak pawnghrawng cu vanlawng in an kah tiah theih a si. May 27 tiang Myitta ti khamnak pawng ah kahdohnak a um rih caah mipi hna nih a himnak hmun ah umcio ding in le SAC ralkap nih vanlawng an hman caah ralrin cio ding in Gangaw peng mizapi uktu phu nih ralrin peknak an thanh.

Tanintharry Ramtthen le Ayarwaddy Ramtthen Ah SAC Ralkap 7 An Thi. Taningtharry ramtthen Lawnglung peng le Ayarwady ramtthen Mawlarmyan Gyun(မော်လမြိုင်ကျွန်း) peng le Sagaing ramthen Monywa-Amyint lam pawng ah SAC 7 an thi tiah theih a si.

Taningtharry ramthen Thawai pengkomh Lawnglung pengchung checkhlat ding in a kalmi SAC ralkap cu khualuhnak hauka ah May 27 zinglei suimilam 6:00 hrawngah kahdoh an si. Kaphnihkar kahdohnak minutes 10 tluk a rauh hnu ah SAC ralkap 2 an thi. Tualchung hriamtlai phu lei hliamhma tuar umlo in hnu an tolhkho tiah pyituh- pantai (ပြည်သူ့ပန်းတိုင်)pah-kah-phah phu nih an thanh.

Sagaing ramthen Monywa pengkomh Monywa-Amyint lampi May 26 ah SAC ralkap bomb thianhhlimhnak a tuahtu hmaikal 12 cu bomb puahhnawh an ton caah 5 an thi tiah DGF pah-kah-phah phu nih an thanh. Bomb hliamh a tongmi SAC ralkap hna nih an duhnak hmun paoh meithal an kah caah mipi lei in mi pakhat nih SAC ralkap kuam hliam in a nunnak a liam. Mizapi nih ralring tein umkal cio ding in DGF nih an thanhmi ah an langhter.

Pungtawng in Pakokko lei a kalmi SAC ralkap motor ruun bomb puahhnawh an tong, motor 4 a rawk. Gangaw peng Pungtawng in Pakokko lei ah a kalmi SAC ralkap motor ruun 80 leng cu May 26 pungtawng hmunhma an phak ah Kyaukhtu PDF(YRPA) le Htilin PDF(YRPA) phufonh nih bomb kan puahhnawh hna tiah People’s Defence Force Htilin in Bu Lah yawng nih Mayelat Athan ah a chim.

SAC ralkap motor ruun bomb puahhnawh in doh an toncaah an motor 4 a rawk, a thimi le hliamhma tuar mi hna kong ah fiang tein kan thei rihlo tiah Bu Lah Yawng nih cun a chim.

Mandalay ah pah-kah-phah chungtel cheukhat tlaih an tong. Mandalay in pah-kah-phah phu pakhat si mi Yatanabon Phoenix Guerrilla Force – YPGF chungtel cheukhat hna cu May 25 le 26 ah SAC ralkap nih an tlaih hna tiah MDY Revolution nih May 27 zaanlei ah an thanh.

Pah-kah-phah phu chungtel cheukhat tlaihkhih an ton caah an mah he pehtlaihnak a tuahmi hna le neihniam in a ummi hna nih i ralrin ding in tiah MDY Revolution nih theihternak an thanh. Tlaihkhih an tong ti cu a dikmi a si ko, minung pa zeizah tlaih an ton le zeitin tlaihkhih an ton ticu fehter awk a tha rih lo, kan hlat chuahmah lio a si ” tiah Pyigyi Takhun(ပြည်ကြီးတံခွန်) dohthlengtu phu in hruaitu pakhat si mi U Aga Wan Tah(အဂ္ဂဝံသ) nih a chim.

SAC ralkap hna nih Mandalay khuachung um dohthlennak ding ca cawlcanghnak a tuahtu mino hna le pah-kah-phah phu chungtel hna cu an tlaihkhih hna i, an tlaihmi hna kong thawng langhternak tuah duhlo in an thuhnawh caah tualchung hriamtlai phu hna nih ralrin a herh tiah Mandalay dohtglengtu phu nih an chim.

Yadanarbon Phoenix Guerrilla Force-YPGF phu cu Mandalay um pah-kah-phah phu pakhat an si i, cu hna phu nih cun SAC ralkap sin thawngpetu dalan le pyusawhti hna cu an fimhlawm tawn hna. Cun hmundang um pah-kah-phah phu, tualchung hriamtlai phu PDF hna he i fonh in SAC ralkap dohnak a tuahtu phu pakhat an si.

Be the first to comment

Leave a Reply

Your email address will not be published.


*