Hlanlio hlasak minthang Tin Tlung (Rev) le Muko biaruah comnak!

Hlanlio hlasak minthang Tin Tlung (Rev) le Muko biaruah comnak!
==========
Tutan 2022 March Muko mekazin ah Rev. Tin Tlung he biaruahnak kan ngei, kan biaruah tampi chung in a hlameilah “Chiahrin le Santlai Lo Val” le “Airauhnah” hla kong he pehtlai in a chimmi a tanglei ah kan von comta.

Muko: Lai zunnhla lakah na uar khunmi, hi ka sak ahcun midang zong nih an uar khun tiah na ruahmi le nihin tiang na lung ah a caammi an um hlei maw?

TT: An um ko. Ka uar bakmi le mi zong nih an uar cio caah khual ka tlawnnak kip ah an ka sakter tawnmi, ka pianthar hnu zong ah rumro loin an ka fial i an ka saktermi hla a um. Cucu, “Chiahrin le Santlailo Val” timi khi a si. Hi hla hi, lungfim te le a bia sullam ruah setmat ahcun a òha tuk hringhran. A donghnak bik len telawng ka von chim hmanh lai: “Zun ciciai tuarhar faak ai leikil tang ciamser ning law, leng le val nih hon hoi òhan lai awk ah, vai caòial pum rung hmun seh lungphun rem cung ah,” ti a si.

Muko: Aa… hi hla hi ka hngalh bal ve, aho phuahmi, caang zeizah dah a um ti hrawng ka chim lawlaw law, tutan Muko hnulei phaw ah kan cuanter te lai cu.
TT: Hi hla hi Tlangpi khuami Saya Cung Ling le Pu Hlau Vung i bawm in an phuahmi a si. Ka sak lonak a hlan tuk ve cang i… nain ka von zawt khawh ko lai dah. Ka chimmi kha a donghnak bik caang a si. A cang 1nk le 2nk cu…. (2022 March Muko hnulei phaw ah kan ṭial)

A pahnihnak hla cu, “Airau hnah bang chiahrin kautla zalam” timi hla khi ka uar ngaimi le keimah hla meilah phun in an rak ruahmi a si ve. Thantlang ka hawile cheukhat lebang nih cun, hi hla ruang ahhin “Airau” tiin an rak ka auhphah. Hi hi, cu hlan vialte le ka rak sak lio ahhin aho set nih a phuah ti ka hngal lo, a hlat zong ka rak hlat bal lo. A ka chimtu le a ka thiamtertu cu Thlualam Bil Hrang a si. Pu Bil Hrang hi kanmah chan lio hlasakthiam minthang a rak si. (Tutan a voi khatnak kan biaruah hnuah hi hla kong fiang deuh hngalh duh ah a tanglei bang Pu Bil Hrang a va len hnu ah kan biruah kan pehtonh ṭhan).

Hi hla he pehtlai in a ka chimtu Pu Bil Hrang hi Tahan an inn ah ka va leng. Hla kong cu kan i ruah i, a phuahtu hi Tikir Phun Thang nih a ka chimh i amah a si ko rua a ti. Pu Bil Hrang ka va len lioah hin Tahan ummi kan chan lailio kan hawikom ṭha Lulpilung khuami Sayakyi Lian Thar a hong leng ve ngelcel. Hla kong kan i ruahmi cu, kanmah nakin amah tu nih a rak hngalh deuh ai.

“Hi hla a phuahtu cu Phun Thang a si ṭung lo, Hre Hmung (Banawhtlang, tleicia) pei a si cu, Hre Hmung nih a ni fanu hi a rak ngaizawng nain an i co lo. Cucaah hi hla hi a rak phuahmi a si. Cuti thisa in naihniam an rak si caah, a hlabia ah “maw nang le kei mising kan cang rua lai…” ti hna aa telnak khi a si. Atu hrawng bel ahhin a phuahtu bia lo ning in an saknak zawn a tam ngai. Hi hlabia cu hitin a si.” tiah a kan chimh. A kan chimh ning cu hitin a rak si (hmanthlak i kan langhter ning in).

Muko: Hi hla hi kan no lioah kan rak sakpah tawn nain a sullam kan rak hngal thlu lo. Atu na von chim tikah, a phuahtu nih a phuah ning te, na ti si kaw, nangmah nih na rak sak ning he aa dannak a um maw, atu hrawng i an sakning he aa dannak teh a um maw?

TT: A cunglei hla hi ka hla meilah a si ka ti bang, ka hei sak lengmang ko nain, a phuahtu tining theng a si le si lo ka rak ruat bal lem lo. A ka chimtu Pu Bil Hrang nih hi hla a saknak he pehtlai in a ka ruahmi cu, hi hla hi mi nih an rak uar tuk i ka phanhnak paoh ah sak an ka fial tawn. Hi hlasak ruang i tangka ka hmuhmi hi K 500 cu a si diam lai dah, a ti. Kan theih ning cun kan hei sak cio ko. Asinain, a phuahtu bia ning kan khen lonak a rak um len. A cunglei ah a phuahtu bia ning cu kan ṭial cang ko caah midang nih phundang deuh le ningcang lo deuh i an sak ahcun nan tlaih/hngalh khawh cang ko lai tiah ka ruah.

Tutan ah Pu Lian Thar le Pu Bil Hrang te he kan i ton hnu lawngah ka fianmi pakhat cu, a nolhnak (chorus) zawn i ‘airau hnah bang chiahrin kautla zalam’ timi khi ‘airau hnah bang chiahrin kau tlak zal lai/laang’ tiin kan rak sak. Hlaphuahtu nih a chim duhmi cu, a sining (chiahrin) kha airau hnah nih a tlakhnawh mi zalam he a rak tahchunhmi a si, a von pehmi ah… ‘chawṭha darza put lo nan runsang kan kai ngam hnga maw’ ti a si cu mu (hika zong ahhin darzaam tiin a sami an um, darza tu a si). Kan i palhnak le an i palh cionak hon chim ding a tam ngai nain a phuahtu phuahning (original) ka langhter cang ko caah tampi ka chim ti lai lo.

Hlan lio hla an ṭha kan tinak cu a aw nakin a bia ruang deuh ahhin an rak si ko. Hi hla zong hi a phuahtu nih virhkhoih zia le tahchunh zia a thiam tuk, a bia nih a ṭhat tuk fawn tikah kan chan lioah kha ti a rak laar tuknak kha a si rua ka ti. Nihin tiang zong hin a laar ko rih hi mu.

Hi hla he pehtlai in ruahnak tlawmpal: Hi hla a caang hnihnak zawn i “thingtannak kingṭial nam le kawngthun bang kawp hngin loin…” ti hi cheukhat nih cun namte le a kawng an i kawp lo phun khin an tahchunh. Ka hon virhkhoih ve tikah, kingṭial nam timi hi pupa nih nam upa, namtong le nam pipa deuh khi an chim duhmi a si an ti. Cuti a si ah cun namtong le kawngthun (namte) hi an sining aa dan deuh caah hmunkhat ah hman le chiahṭi an si lomi (kawngthun cu sunhsak deuh in kan tai hna ah kan i thlaih, hmunhma ṭha deuh ah kan chiah tawn.

Namtong tu cu paiper chung, bizu le vam kar tibantuk hna ah kan chiah) hrawng tu khi a tahchunh duhmi a si rua tiah ka ruah. (Hi kong he pehtlai in a cunglei kan biaruah hawi Rev. Tin Tlung tu nih cun, namte le a kawng phun deuh khin kan ruah cio ko le… na ruahmi hi ka ruah bal lomi a si, a ti)

Sawmnak: A cunglei kan von tarmi hi kan biahla sunhlawihnak ah a si, kan biaruahmi ah siseh, a hla kong ah siseh chim awk a ngei nih hon kan thlakpi cio uh, tiah kan in sawm hna. Kan i lawm, Joel Ling

Be the first to comment

Leave a Reply

Your email address will not be published.


*