Hngerhte Sin Cawn Ding Phun 5

Hngerhte Sin Cawn Ding (5)
————————————
Saram lei cawnnak(zoology) sang mifim nih hngerhte sin in cawn ding phun (5) an tialmi kha langhter ka duh. Baibal cherhchan in kan nih zong thazaang la usih ti ka duhmi cu:
1. Hruaitu An Ngei Lo:
Bawi le upa le uktu zeihmanh an ngei lo (Phut. 6:7). Minung bantuk in hngerhte khi cucu tuah, khikhi tuah tiah chimtu (commander) taktak an ngei lo. Lungtho tein rian an tuan cio. An i zuam cio. Mifim nih a chimmi cu,“Zultu tha cu chimhmi poah kha a tuah, hruaitu tha cu chimh hau loin tuan ding a thei” an ti. Hngerhte hi chimhau lo an si. Hruaitu tha lungput an ngei.
2. A Hlan In Thil khon An Hmang:
Thal caan ah an rawl kha an timh hna i rawl tuan caan i an i cawmnak ding kha an pumh an khawmh hna (Phut.6:8; 30:25). A hlan kan in timhtuahnak hi kan kum vuinak le hlawhtlinnak a si. Kannih zong tha tein kan rian kan i timhtuah le suaisam a herh tuk.
3. A Tha lei (Positive) In Khua An Ruat: Ruah lo pi in an buk hrawk law, thachiatnak an ngei lo. A roh hlanah an remh colh. Zumtu tampi nih harnak kan ton tikah thachiatnak kan ngei tawn. Paul nih, “Atu caan i kan inmi temhinnak hi cu hmailei i kan sin i phuan a si te laimi sunparnak he cun tahchunh awktlak ah ka rel lo” (Rom 8:18) a ti bantukin kan harnak hi kan hmailei kan i ruahchannak in tei i zuam ko usih.
4. Hnu Kir An Hmang Lo:
Hngerhte khi an lam kham law, hnulei an kir lai lo. Hmaikalnak lam kalnak lawnglawng an kawl peng. Bill Gates nih, “Lungsaunak cu teinak caah tawh fang pakhat a si” a ti. Lungdongh a hmangmi nih hlawhtlinnak an hmu bal lo.
5. A Tha Bik An I Zuam Peng:
Hngerhte hi zei a tuah poah ah tuah sawhsawh a ngei lo. A tha bik aa zuam peng caah a tuahmi a tha dih. Rian kan tuan tikah va si ko seh, a pio lo ti a hmangmi nih thiltha an chuahpi bal lo.
Pathian nih kan dihlak nun fimchimtu ah hmang ko seh. By Rev.Sang Uk Cung.

 

Be the first to comment

Leave a Reply

Your email address will not be published.


*