Hniarlawn Khuathar Le Khuahlun Mizapi A Himnak Ah An Zaam

Hniarlawn Khuathar Le Khuahlun Mizapi A Himnak Ah An Zaam

Hakha, Mie peng Hniarlawn khuahlun ah ralhrang nih an kahmi bomb khua kiang ah voi 4 a tla, khuachung ah voikhat a tla i, Pu Ngun Ham te zuninn aa rawk, Pi Ngun Hle zong bomb nih a hliam tiah kan theih.

Hniarlawn thar ah ralhrang kut in, inn innhnih, Baptist Church Pastor, Pastor Mawng Ceu inn le a pawng inn pakhat a kaang tiah kan theih.

Khuami cu thinphang le thlalau in an um caah a himnak hmun ah an i dor hna tiah kan theih.

Credit: The Lairam Times

Relchap: Zei Bantuk Mi Dah Kan Si Awk A Si!”

Van le vawlei cu hi bantuk in hrawh an si lai caah, zei bantuk mi dah kan si awk a si ti cu ruat tuah u. Nan nunning cu a thiangmi le Pathian sin i pekmi an si awk a si.”—2 PIT. 3:11.

1. Zeicah Piter cakuat pahnihnak cu a chan lio Khrihfa hna caah a herh ngaimi ralrin peknak a si?

LAMKALTU Piter nih a cakuat pahnihnak a ṭial lioah, Khrihfa hna cu hremnak tampi an ing cang nain mah ruangah an teimaknak a zor lo i an ṭhanchonak zong a nuar lo. Cucaah Satan nih hlan ah hlawhtlinnak a rak hmuh lengmangnak lam kha a hman. Piter nih a chim bantuk in ‘nu hor pawl zoh a duhmi’ le ‘an lungthin kha hakkauhnak in a khatmi’ a hmaan lomi cawnpiaktu hna hmang in Satan nih Pathian mi hna kha an ziaza hrawh aa zuam. (2 Pit. 2:1-3, 14; Judas 4) Cucaah Piter cakuat pahnihnak cu zumhawktlak in um peng awk lungtak in ralrin peknak a si.

2. 2 Piter a ngan 3 nih zei kong dah biapi in a chim, zei biahalnak dah kan i hal awk a si?

2 Piter nih hitin a ṭial: “Ka nun chung paoh cu, hi kong kan hngalhter ṭhan lengmang hna hi a herh hrimhrimmi a si tiah ka ruah . . . hi a thi khomi pum hi cu, tuan ah kaa phoih ko lai. Cucaah cun ka thih hnu ah hi thil hi nan run philh hna nakhnga lo nan ca i lam serpiak kha kaa zuam khawh chungin kaa zuam lai.” (2 Pit. 1:13-15) Piter nih sau ka nung ti lai lo ti a hngalh i ralrin a pekmi hna kha philh hna hlah seh ti a duh. A chimmi bia cu Baibal ah khumh a si i tuchan ah ahopaoh nih rel khawh a si. Piter cakuat pahnihnak a ngan 3 hi a hlei in hngalh duh awk a si, zeicahtiah atu chan ṭhalo “caan donghnak caan” le langhtermi van le vawlei rawhnak kong biapi in a chim caah a si. (2 Pit. 3:3, 7, 10) Piter nih zeitindah ralrin a kan pek? Ralrin a kan pekmi zulhnak nih Jehovah lungton awkah zeitindah a kan bawmh?

3, 4. (a) Piter nih zei bantuk mi dah nan si awk a si tiah a ti, cun zeitindah ralrin a kan pek? (b) Zei kong pathum dah kan i ruah lai?

3 Satan vawlei rawhnak kong a chim hnu ah Piter nih hitin a ti: “Zei bantuk mi dah kan si awk a si ti cu ruat tuah u. Nan nunning cu a thiangmi le Pathian sin i pekmi an si awk a si.” (2 Pit. 3:11, 12) Piter nih zei bantuk mi dah kan si ruah awkah a kan forh. A ra laimi Pathian ‘ral teinak ni’ ah Jehovah duhnak a tuahmi le Pathian duhmi ziaza a ngeimi hna lawng an luat lai kha Piter nih a hngalh. (Isa. 61:2) Piter nih hitin a ṭial chap: “Ka hawile hna, nannih nih cun hihi nan hngalh cang. Cucaah cun nawlbia zeihmanh ah a rel lomi [cawnpiaktu hmaan lo] pawl an palhnak nih khan a ping ah an hruai sual hna nakhnga lo le him tein nan umnak hmun ah khan nan um i nan tlak sual nakhnga lo, ralring tein um ko u.”—2 Pit. 3:17.

4 Piter cu cu kong a hngal vemi a si caah Khrihfa hna cu ni hmanung bik caan ah zumhfek te’n um khawh awkah a hlei in an i ralrin a herh kha a hngalh. A hnu ah zeicah cutin tuah a herh kha lamkaltu Johan nih ṭha tein a fianter. Satan cu van in an thlak caah “a thin a linh in a lin” i “Pathian nawlbia a ngai i Jesuh nih a phuanmi biatak, zumhawktlak tein aa tlaihmi” a doh hna kha Johan nih langhnak in a hmuh. (Biat. 12:9, 12, 17) Chiti thuhmi zumhawktlak Pathian salle le an hawile “tuu dang” cu teinak an hmu lai. (Johan 10:16) Kannih tah zeitin? Zumhfek in kan hmun kho lai maw? (1) Pathian ziaza ngeih kan i zuam, (2) ziaza lei le thlarau lei ah soi awk a um lomi si kan i zuam le (3) harnak kha a ṭhatnak lei in hmuh kan i zuam ahcun kan hmun kho ko lai. Mah kong cu i ruah u sih

Be the first to comment

Leave a Reply

Your email address will not be published.


*