Hodah UCL Champions Si Lai?

Hodah UCL Champions Si Lai?
==========
UCL hrai voi 13 a cawi cia Real Madrid maw UCL hrai voi 6 a cawi bal Liverpool dah tuzan hrai thlir ai nolh lai Spain Chiandeih Real le EPL pawpi Liverpool hi UCL final ah voi hnih an rak i tong bal.

1981 lio Paris an rak i ton ah Liverpool nih an tei bal. 2018 an i ton belte ah Ramos nih Salah a liang a hrawk, Liverpool kawlbawh nih kawl hnih a dangh hna caah Real nih an rak tei hna. Tuzan hi France khualipi Paris ah chuih ding a si! Sa le ral karlak ah i tetkhawt in kan khuasak lio a si ko nain tuzan cu UCL final ah i hnim a hau.

Kei cu Liverpool ka ṭanh. Liverpool hi semmawng lungmawl lio in rak tlaihchan mi nungak bang kei cu hnu ka her tak kho lo. Club pakhat nih kumkhat ah pumpululh a chuih ding zat, a dongh khitkhet tiang a chuih khotu cu Liverpool an si. EFL Cup le FA Cup an cawi cang.

EPL belte Mancity nih an thlir kanh hna i a haang lawng an hah. Tukum EPL ah Liverpool le Mancity ke nih a dang phu ke cu tam ngai in a thlau! Tuzan UCL final hi 2021/22 Europe club pumpululh khuati a donghnak a si, i ngaih bik zong a si.

Vawlei cung pumpululh ruahdamhtu pawl nih anmah le zumhraih deuh cio kong an phuan. Spain ram um kum 30 chungchep nihcun Liverpool a zumh ti si. Zei si hmanh ah pumpululh cu a pum, zeitin a rilh lai i a luh lai chimphuan a har. Final hi cu ruahlo in asen hna i ton sual ahcun loh, penalty zong pek khawh a si fawn. Zeiti a si zong ah a sung le a awng tiin tuanbia nih a zawi veve cang hna lai.

A zumh zong ka zumh, a ṭanh zong ka ṭanh mi Liverpool nih a kan deoh lai lo dah? Khah, nan ṭanh mi cio i sica lo tein tha rak pe uluau, Pariit! Credit: Saya Lian Chawn

Be the first to comment

Leave a Reply

Your email address will not be published.


*