Hun Sen Nih Min Aung Hlaing Nawlnak a tuah taktak cang!

Mino 4 thih dan an pek mi hna cu ruah piak tthan ding in Hun Sen nih Min Aung Hlaing a nawl
=========
A tu lio ah ASEAN chairman a ttuan mi Cambodia Prime Minister Hun Sen nih nai te ah thihdan an pek mi mino 4 hna kong ah nawlnak a tuah tiah theih a si.

Democracy duhruang ah a cawlcang ngai mi mino 4 hna cu bia an ceih hna hnu ah SAC biaceih bawi nih cun thihdan a pek hna. Cu hna 4 cungah chiah mi thihdan cu ttha tein ruah piak tthan ding in le thihdan pe lo ding in n Hun Sen nih cun Min Aung Hlaing sin ah nawlnak a tuah.

Ralkap uknak duh lo tu pawl Thihdan peknak nih hin ASEAN member ram hna lak lawngah siloin ASEAN hawikomh ram hna karlak zongah thinphan thlalau nak fakpi a chuah ter tiah Hun Sen nih cun a langhter. Hi bantuk in uknak a fir tu SAC ralkap nih an thah hna ahcun vawlei cung ram hna lehrulhnak fak a tong kho i, Myanmar ram buainak kongah i zuam cuahmah mi remdaihnak timi tiang in a hnursuan lai tiah a langhter chap.

Nikum October thla lio ah SAC ralkap nih an rak tlaih mi Pa Phyo Ze Yar Thaw le Pa Jimmy telh in mino 4 cu tukum January thla ah khan thihdan an rak pek hna. Cu kong cu SAC ralkap chimnak nawl ngeitu Zaw Min Tun nih TV thawngthanhnak in a rak chim.

Khua duah ding in a kal mi SAC ralkap PDF nih an rak kah hna caah 5 thi! Magwe ramtthen Pauk peng khuate cheukhat mei duah ding in a kal mi SAC ralkap le pyu saw htee hna cu PDF nih lampi ah an rak bawh hna i an kah hna caah minung 5 an thi tiah PRF nih an langhter. Nizaan Pur 10 ni ah ralhmai a sial mi SAC ralkap le pyu saw htee hna cu Mine bomb 4 bak an rak puahhnawh hlei ah meithal in an kah hna i suimilam cheu chung hrawng kaphnih karlka kahdohnak a chuak.

Cu kahdohnak ahcun SAC kuttang um Pyu Saw Htee bawi a si mi Shwe Bung khuami Tin Nyue tel in minung 5 an thi i hliam hma tuar mi an tam tiah PRF nih cun an langhter. Mipi ralkap PRF lei in aho hmanh ai hliam mi an um lo i, zenthong 1 le phone 2 an i char tiah theih a si.

Demoso peng ah thilri lak ah a kal mi kum 50 upa pakhat mine lamh sualnak in a nunnak liam. Nizaan Pur 10 ni ah Demoso peng Daw Se khua ah kum 50 mi pakhat cu ral an zaam nak hmun in khua ah thilri lak ah a va kal i mine bomb ai lamh sual caah a nunnak liam tiah theih a si.

“Zaanlei sang ah phone an rak kan chawnh, khua chung ah mi pakhat mine lamh sual ruangah Loikaw sizung ah an kal pi ko nain Sizung ah anunnak a liam tiin. Thilri lak i an rat tikah an inn kam bak mine bomb ai lam sual ee” tiah KNDF B-06 ttuanvo ngeitu pakhat nih a chim.

Tutiangah Daw Se khua mi cheukhat an rak kir ko nain a cheu cu ramtang ah an i dor rih ko i khuachung ahhin SAC ralkap zong an um pah rih tiah an langhter. Nizaan tthiamtthiam ah hi hmun hrawng ah aum mi khuate cheukhat ah SAC ralkap nih an do ta mi Mine bomb cu KNDF B-06 nih an hmuh hna i an lak piak dih hna, nain a dang hmuh lo mi zong um kho a si tiah a langhter chap.

Thazi peng ah SAC ralkap nih mipi an kah thluahmah hna pakhat thi hliamtuar an tam. Mandalay ramtthen Thazi peng ah SAC ralkap nih cun a bu in a um mi mizapi cu an kah thluahmah hna caah minung 1 nunnak a liam i hliamtuar mi an tam tiah theih a si.

Nizaan tihni Pur 9 zaanlei sangah Thazi peng Auk Dwin khua mi hna cu Phe i kah in an rak i bu hna, cu lio ah SAC ralkap le palik khua chung an rak luh caah an hmuh hna i an kah colh hna. Cu ti an kah hna ruangah Pu Kala Gyi timi pa a nunnak a liam i, minung 10 nak tlawmlo hliam hma an tuar tiah khuami hna nih an chim.

“Nai te ah khan USDP party pakhat SAC ralkap nih an thah. Atu zong ah phe nan i kah caah mipi in nan um ti ruang bak ah an kah thluahmah ko hna. Cu ti an kah hna ruangah minung 1 a nunnak a liam. Pu Kal Gyi timi pa a si. Cun hliam hma tuar mi 10 nak tlawm lo an tlaih hna. A thi poh thi hna seh ti bak in mizapi cu an kah thluahmah ko hna.

Zei ruang ah dek hi ti lawmmam in an sual hnga, a ruah awk bak ka thei lo” tiah khuami pakhat nih cun a chim. Hmanthlak hi SAC ralkap le Palik nih an kah mi Pu Kala Gyi a si.

An khua ning in SAC ralkap nih an khangh dih hnu an ngeih mi sui-ngun chawva PDF an pek hna. Magwe ramtthen Myaung khuapi pengah khuate pakhat cu SAC ralkap nih ciamdih in an khangh piak hna hnu in khuami nih an ngeih mi chawva cu PDF caah an pek dih.

Myaung khuapi peng ah SAC ralkap nih an khua ning in an khangh dih. Cucaah khuami hna nih cun an khua a khang tu SAC ralkap dohnak caah tiin PDF sin ah an ngeihchiah sui-ngun chawva cu an pek dih nak hi a si. Zohchunhtlak khuami hna nih an pek mi cu Sui Hna thlaih, Hnatonh le Sui clip a dihlak ah 21 le phaisa fang in Sing 6 an pek tiah theih a si. Credit: Suimilam Media

Be the first to comment

Leave a Reply

Your email address will not be published.


*