Mizoram Nichuahlei YMA Phufonh Hna Nih India Ramchung Ah Bomb Thlak Duhlonak Cathanh An Chuah!
=======
Janiary 10 ah SAC ralhrang nih Camp Victoria bomb an kah lio ah India ramchung ah a tlami bomb a puahnak hmunhma a si. Hi hmun hi Mizoram, Farkawn khua he meng 7 fai hrawng a hlatnak a si i, bomb puah ruang ah minung khawndennak a um lo nain a pawngkam i motor pakhat a rawk. Hi kong he pehtlai hin atu tiang ah India cozah hi langhngan in SAC cung ah mawhphorhnak a tuahmi a um lo.
Mizoram nichuahlei i a ummi Tuipuiral Group YMA phufonh hna nih India ramchung i bomb a tla mi kongkau ah SAC sualphawtnak le duhlonak langhternak cathanh an chuah. January ni 10 le 11 ah khan SAC jet fighter nih camp victoria cu voi zeimawzat bomb a thlakhnawh i, India ramchung zong ah bomb a tlak lengah motor pakhat zong a khen, tiah theih a si.
Hi kong pehtlai in Ṭiau kam a ummi YMA phufonh nih English ca in dohkalhnak le duhlonak cathanh an chuah i, India cozah cu a rannak in hmalaknak tuah ding in an duhnak zong an langhter. An cathanh he aa tlakning in a tanglei bantuk hin Laiholh in leh a si.
“January 10, 2023 IST(India caan) zanlei Suimilam 3:30 ah Myanmar Jet Fighter nih Camp Victoria cu bomb a thlakhnawh lio ah India ramchung i bomb a tlak caah Young Mizo Association, Tuipuiral Group cu kan lau tuk hringhran. Bomb hi India ramchung ah a tlak lawng siloin ramri ah a luangmi Ṭiau tiva ah thetse a rut mi rianṭuantu motor zong a khen.
India mi hna zeirel lo in a liamcia thlahnih khan jet vanlawng hi voi zeimawzat an zuanter cang i, bomb tiang kan ramchung i an thlak caah Myanmar ralkap cawlcanghning cu kan dohkalh. Jet fighter nih hin India ramchung mi; lorianṭuan, kutrianṭuan le ramri i a ummi mizapi a kan ṭhihphaih caah serhsatnak nganpi a si. January ni 11, 2023 ah voihnih bomb a vun thlak chap caah rianṭuantu tampi cu ṭihphang ngai in a um i, an rian tiang ngol a hau.
“Tanglei le cunglei in Myanmar ralkap hna nih international law an buar caah fakpi in kan dohkalh. Myanmar ralkap hna nih India vawlei ah bomb an thlak ti nakhnga lo le India airspace an hman ti nakhnga lo India cozah pi cu a rannak ṭuanvo lak colh ding in kan duh.”
Hakha Ah Dawr Kharmi Hna Cu SAC Ralkap Le Palik Nih An Dawr Ah Ca An Tarpiak Hna. Chin ramkulh Hakha ah CNA ralkap nunnak a liammi hna upat peknak can ah dawr ngeitu hna nih an dawr an rak khar cio hna. Cu hnu ah Loud Speaker in SAC nih dawr hun ṭhan dingin an au i a hung ṭhan lomi dawr cu January 12 ah an dawr ah ca an tarpiak hna, tiah theih a si.
Tualchung mi pakhat nih, “Nihin zanlei ah SAC ralkap, palik le nawlngeitu hna nih CDF lei nan ṭan caah nan dawr kan inn kharpiak cang hna tiin ca an tarpiak hna,” tiah a chim. January 12 zanlei sml 5:00 hrawngah Hakha Keisih sang sii-inn lamṭhen ah dawr 7 hrawng zong SAC nih ca an tarpiak hna hna. Pyidawtha sang zong ah SAC nih dawr ah ca an tarpiakmi hna cu dawr ngeitu hna nih an hawh caah minung 10 an tlaih hna i sakhan ah an kalpi hna, tiah theih a si.
Dawr ngeitu cheukhat cu zawtfah dam lo ruangah sii-inn ah a ummi an um i dawr an hun khawh lonak a si. Cu hna dawr zong cu SAC nih an phih kharpiak dih hna. January 9 thawk in Hakha khuathar sang ah SAC nih thimnak tuah lai dingmi ca ah inn khat hnu inn khat in chungkhar cazin an lak hna i cazin latu hna cu SAC ralkap le palik nih humhimnak an lakpiak hna, tiah theih a si. Credit: The Chin Post
Leave a Reply