Nihin Chun Inn Kanghnak Ah Inn Ngeitu Unau 2 A Kanghchih Hna!
=====
Sagaing ramtthen Sagaing khuapi fimcawnnak ‘College’ sianginn pawng ummi tlakrawh inn dothnih cu January 3 nihin ah mei a kang i inn ngeitu unau hna a kanghchih hna tiah theih a si. “Nihin chun suimilam 12:00 renglo in kanghhram aa thok i minute 10 chung kanghnak ah inn ngeitu unau pa pa(2) a kanghchih hna caah ngandamnak le mipi zohkhenghtu bu nih an ruak an lak hna” tiah tualchungmi hna sin in theih a si.
Inn kaangmi cu Sagaing meithat zung le penguk meithat zung in meithattu hna nih an hmihkhawh tthan i meikangh aa thoknak ruang cu theihkhawh a si rih lo caah hlathlainak an tuah chuahmah lio tiah theih Mizzima nih a langhter.
Kalaymyo Ah Kahdohnak A Chuak, PDF-Kalay Nih Thawngthanhnak An Tuah! Kalaymyo khuapi Pyinta (ပြင်သာ) sang in nichuah lei Kalaymyo peng ah hmunkhuar dingin a kalmi SAC ralhrang thazaang 60 tluk cu January 2 nizaan zing ah PDF-Kalay nih Pyinta sang pawng ah Bomb 4 an hmanh mi in an puahhnawh hna tiah theih a si.
Suimilam 11:00 le 12:00 tluk ah an puahhnawh hna hnu in minute 10 chung kahdohnak a chuah caah SAC ralhrang 4 hrawng an thi pin ah hliamhma tuarmi zong an tamtuk tiah PDF-Kalay nih nihin ah cathanh an chuah.
Pyusawhti Hmunkhuarnak Sakhan An Lak, Ralhrang 30 An Thi PDF Pakhat Nunnak A Liam! Sagaing ramtthen Taze (တန့်ဆည်) peng Sinnge (ဆင်ငယ်) khua ah ralhrang pyusawhti hmunkhuarnak sakhan cu January 3 nihin zing suimilam 2:30 tluk ah PDF nih an kah hna i ralhrang 30 hrawng an ti PDF in minung pakhat nunnak a liam tiah theih a si.
Shwebo Battalion 6,9,12, Taze PDF fonh hna nih an kah hna i an umnak sakhan le hriamnam tampi zong lakchih an si pin ah a pawngkam khua ralhrang pyusawhti chungtel hna zong an tlizaam dih tualchung hriamtlai nih Khit Thit Media ah a chim.
Kanbalu Lakphak Dawr Ah Lakphak Dingmi Ralhrang Bomb Puahhnawh An Tong! Sagaing ramtthen Kanbalu (ကန့်ဘလူ) peng ah laphak din dingin a chuakmi SAC ralhrang pawl cu tualchung hriamtlai hna nih Bomb in an puahhnawh hna tiah tualchungmi sin in theih a si.
January 3 nihin zing suimilam 7:5 tluk ah Kanbalu peng Chattin (ချပ်သင်း) bawlung tual hmai lakphak dawr ah lakphak ding dingin a chuakmi SAC ralhrang bawi pakhat le pyusawhti ralhrang 8 hna cu Bomb puahhnawh an tong i ralhrang bawi telh in 4 nih hliamhma an tuar. Pa 2 cu an hliamhma a faktuk tiah theih a si.
Yangon Ah Ramdang kalnak ‘Passport’ Chuahpiaknak Zung Phihkhar Chung A Si! Yangon khuapi ah ummi ramdang kalnak (Passport) chuahpiaknak zung cu phihkhar chung a si caah ramdang kal dingin a sokmi mipi hna cu a chung luh an sianh hna lo i a rianttuannak (System) ttha deuh dingin (Update) kan buaipi pi lio a si caah phihkhar chung a si tiah ca an tarlangh.
Zeitik tiang phihkhar chung a silainak kong zong thawngthanhnak an tuah lo ruangah zungnih ni le caan khiah in an rak kawh/auh ciami hna le ramdang ah rianttuan dingin kal a duhmi hna caah harsatnak tampi a chuak tiah BBC nih a chim.
Hakha khua, Cawbuk sang ah inn pakhat a kaang! Hakha khua, Cawbuk sang, စိုက်ပျိုူရေးခြံ lonh te ah a um mi inn pakhat a kaang tiah thawng theih a si. Atu a kaang mi inn hi Pu Sang Thawng inn a si i January 3 dei lei sml 3:30am-4:00am karlak ah a kaang tiah theih a si. A kangh thawng le uico bo thawng in kan theih tiah Cawbuk sangmi pakhat nih The Chinland Post ah a chim.
“Dei lei sml 3:30pm hrawng ah uico an bo tuk i zei ko dah si hnga ti ka thawh cu a rak kaang cuahmah ko, zeiruang dah a kangh cu a fiang in kan thei ve lo” tiah a chim. Inn ngeitu Pu Sang Thawng zong nih mei le adang dang vialte zong ka hmih tak dih ko nain zeiruang dah a si hnga ka thei ve lo tiah a chim.
A kangh dih i a ciam dih hnu sml 4:30am tlin lai hrawng ah Hakha meithat phu pawl an rak phan kho tiah khuami pakhat nih a chim. “Meithat pawl kan chawnh len hna nain an tlai lo, a pawngkam ah ti zong ṭha ṭhi in lak khawh a si lo i ti inn hmete le tipet hna in mei kan thah len lio ah meithat pawl an rak phan i hna a ngam deuh” tiah adang Cawbuk sangmi pakhat nih The Chinland Post ah a chim. A kang mi inn ah hin hohmanh an um lo caah hliam le a thi mi an um lo tiah thawng theih a si. Credit: Lungmili Post
Leave a Reply