Japan Cozah nih SAC ralkap ralbawi training peknak tuah tawn mi a pe ti lai lo!
========
Japan cozah, runvennak lei vuanci zung nih hramhram nawlngeihnak latu SAC ralkap ralbawi hna cu auh in, training peknak a rak tuahmi vialte cu kan ngol cang tiah nihin September 20 ah phungning tein thawng thanhnak a tuah tiah theih a si.
SAC ralkap ralbawi hna cu Japan ah auh in training peknak rak tuahtawnmi cu 2023 thawk in cun ngol a si cang lai, Min Aung Hlaing hruaimi ralkap nih uknak an lak hnu ah, nuhrin covo phung buarnak an tuah leng ah democracy ngahkhawhnak ding caah cawlcanghnak a tuahtu minung 4 hna cu hri thlaiin an nunnak an lak hna, Myanmar ram sining kong he pehtlaiin thinphangtuk a si cang caah Myanmar ralkap ralbawi hna training peknak ngol a si cang lai tiah thawng thanhnak an tuah hi a si.
Japan runvennak lei vuanci zung in chim phuannak nawl ngeitu Kenji Aoki nih cun ” Myanmar ralkap he runvennak kong ah i fonh in rian ṭuantinak cu pehtlai in ṭuanṭi ding a sithiam ti lo tiah biakhiahnak kan tuah cang” tiah a chim. A tu ah Myanmar ralkap ralbawi minung 11 cu auh in training peknak tuahlio an si i, cu ralbawi hna cu an training a dih tiang pehtlai in kainak nawlpek an si tiah theih a si.
Yangon ah ral vennak a tuahtu SAC ralkap motor 2 bomb puahhnawh an ton ralkap 5 nak tlawmlo an thi. Yangon, Dagon Myotit ni chuahlei pengchung ah ral vennak a tuahtu SAC ralkap motor 2 cu nihin September 20, zinglei suimilam 10:00 hrawng ah kutcheh bomb puahhnawh in kan doh hna tiah Yangon Federal Army (YFA) in ṭuanvo ngeitu nih a chim.
Bawi deuh nih an i citmi motor cu a luat nain, a hnu zul motor tu cu ṭha tein kan puahhnawh khawh” tiah Yangon Federal Army (YFA) in ṭuanvo ngeitu nih cun a chim. Cu kahdohnak cu YFA le Yangon hrambunh pah-kah-phah phu pakhat simi URNW phufonh hna nih an tuahmi a si i, pa-de-ta bomb le kutcheh bomb komh in kan hman, SAC ralkap lei a tlawmbik minung 5 hrawng an thi lai, an motor zong a rawk tiah Yangon Federal Army nih cathanh an chuah.
Tualchung hriamtlai phufonh lei hliamhma tuarnnak umlo in hnu an tolh kho tiah theih a si. Cun nihin September 20 chunhnu ah Yangon ramṭhen, Khayan peng Office of the General Administration cu Khayan PDF nih 40 mm bomb hmang in an kahdoh hna tiah theih a si.
Kalay-Tamu Motor Lam Kam Ummi Inn 9 Cu SAC Ralkap Nih An Khangh Caah A Ciam Dih. Sagaing ramṭhen, Tamu peng Kalay-Tamu motor lam kam ummi khuate 3 chung in khuami inn 9 cu, SAC ralkap nih nizan September 19 ah mei in an khangh, tiah theih a si.
Kalay-Tamu lam kam ummi khuate Yanlinphai(ရန်လင်းဖိုင်) khua inn 4, Nanmumṭha(နန့်မွမ်ထာ) khua inn 3 le Khawmunnuam(ခေါမွန်နွမ်) khua inn 2 cu SAC ralkap nih an khangh caah a ciam dih, tiah theih a si. Khuate 3 a khaangtu SAC ralkap pawl cu, Tamu khua lei an kir lioah PDF- Tamu nih lam hruang in an bawmh hna i, bomb an puahhnawh hna.
SAC ralkap a thimi le aa hliammi an um le um lo cu theih a si lo. SAC ralkap nih Yanlinphai khua cu an rak khangh bal cang i, khuami zong an rak thah hna. Atu khuate 3 an khanghmi chung in khuami hna cu a himnak hmun ah an zam dih, tiah theih a si.
Kalewa-PDF Nih Masein Sakhan An Kah Caah Palik 7 An Thi, Meithal Zun 8 An Chuh Hna. Sagaing ramṭhen, Kalewa peng Masein khua palik sakhan pakhat cu Kalewa-PDF nih an kah caah palik 7 an thi i, meithal zun 8 an chuh hna, tiah theih a si.
PDF-Kalewa ralkap hna nih Masein khua palik sakhan cu September 18 zing sml 6:05 ah kan kah caah palik 7 an thi, a dang a thimi zong an um kho rih. Cheukhat palik pawl cu an hliamhma he an zam. PDF-Kalewa ralkap leiin a thimi le aa hliammi kan um lo. An sakhan cu mei in kan khangh i, hnu kan kir tiah PDF-Kalewa nih an langhter.
Cu kahdohnak ah G3 meithal zun 5, Uzi meithal zun 2, M79 zun 1, kutcheh bomb lung 3, 7.62 meithal kuan 297, Uzi kuan 149, cycle 125 4, pehtlaihnak seh 2, phone 13, Power bank 1, Laptop 1, phaisa bawm 2, tangka kyats 13,000, kutkhih cikcin tuah 2, suiṭhi 1, bag 1, zal 3, nam 1 le Equipment 1 an lak, tiah theih a si.
Cu kahdohnak ah tualchung mi nu pakhat a nunnak a liam. PDF-Kalewa nih nu pakhat a nunnak a liam caah a chungkhar cu ngaihthiam an hal hna. Palik 7 a thimi hna chungkhar cu SAC nih tangka kyats 30,000 cio an pek hna, tiah theih a si. Credit: The Chin Post
Leave a Reply