Kalaymyo khuapi chung thil cang mi cu a poi tuk ee!

Kalaymyo Ah A Ruang Umlo In Meithal Puah Ruang Ah Mipi Nunnak Liammi Le Hliam Tuar!
=====
Kalaymyo Tahan sang Bochok lam le Wesley Si-inn lamkil ah SAC ralhrang nih a ruang umlo in meithal an kah caah mipi minung pakhat nunnak a liam i pakhat nih hliamhma a tuar tiah theih a si.

December 24 zing slm11:00 hrawngah Kalaymyo peng Pinkhaunggyi (ပျဉ်းခုံကြီး) khuami minung 2 hna cu Cycle in Tahan an kallio ah SAC ralhrang pawl nih a ruang umlo in meithal an puahmi ruangah a hnu aa phirhmi U Thian Zei Thang cu kuan nih a khen caah a nunnak liam. “Chiatnak lei bawmchantu bu nih a ruak an laak, a mawngtu pa zong a kutkhat lei ah kuanhma a tuar, nunnak a liammi U Thian Zei Thang cu fa 4 ngeimi a si tiah” theih a si.

SAC Ralhrang Mawtaw Bomb Puahhnawhnak In 6 An Thi, SAC Ralhrang Chek Gate Kah A Tong! Mandalay in Kyawse khuapi lei kalmi SAC ralhrang mawtaw 3 cu December 24 chun slm2:45 tluk ah (GARUDA PEOPLE’S DEFENCE FORCE) hriamtlai phu nih Bomb hmanhmi in an puahhnawh hna i mawtaw pakhat a rawkdih caah ralhrang 6 an thi tiah thawngthanhnak an tuah. Hi kahdohnak ah (GARUDA PEOPLE’S DEFENCE FORCE) hriamtlaiphu in a thimi le hliamtuar umlo te in hnulei kan kirtthan kho tiah thawngthanhnak an tuah.

Cupin ah Mandalay ramtthen Thabeikkyin (သပိတ်ကျင်း) pengah SAC ralhrang cheknak (Gate) cu tualchung hriamtlai phu hna nih 40MM hna le meithal hna hmangin an kah hna tiah theih a si. “Hi kahdohnak ah SAC ralhrang lei in a thimi an tamlai tiah zumh a si, thawngfiang theih a si rih lo tiah” PDF-Kyarhnyat sinin theih a si.

Chaung-U Peng Ah SAC Ralhrang Nih Mipi Pawl Helicopter In An Kah Hna! Sagaing ramtthen Chaung-U peng Amyint khuahlun (အမြင့်မြို့ဟောင်း) cu December 24 chun slm1:40 tluk ah SAC ralhrang nih mipi pawl ‘Mi35 helicopter’ in a kah hna caah tualchungmi nih kua an chuahtak dih hna tiah theih a si. “Nihin zingka ah Drone hmangin SAC ralhrang pawl Bomb thlakhnawh an tong i 2 an thih caah Mi35 Helicopter hmangin minute 20 chung khua a hel i a kah hna” tiah theih a si.

Myaung Peng Ah SAC Ralhrang Nih Thinlung Lei Damlonak Ngeimi Minung 1 Lu An Tan, 3 An Tlaih Hna I An Thah Hna! Magway ramtthen Myaung peng Hpaungkuai (ဖောင်းကွဲ) khua cu December 23 ah SAC ralhrang nih an luhhnawh i khuachung ah ummi hna thinlung lei damlonak a ngeimi minung 4 Ko Bu Lwin, Ko Aye Phe, Ko Kyaw Nine, Ko Nga Bu hnalak ah pakhat cu a lu an tan, 3 hna cu an tlaih hna hnu ah an thah hna tiah theih a si.

SAC ralhrang nih khua an luhhnawh ruangah thinlung lei damlomi 4 hna taantak an si i pakhat a lu an tan, pathum hna cu an hremhna hnu ah an kahthah hna, an takpum ah kuanhma lawngte hmuh an si tiah tualchungmi hna nih an chim. “Uico pawl nih mipi inn an duah hna, thilri pawl an firdih hna i an hrawk dih cikcek hna” tiah an chimchih.

SAC Ralhrang Nih Khualtlawng Mawtaw An Kah Caah Minung 1 Nunnak Liam 2 Nih Hliam An Tuar! Sagaing ramtthen Sagaing le Monywa karlak mawtaw lampi ah SAC ralhrang nih mipi hna ciitmi khualtlawng mawtaw meithal in an kah caah minung pakhat nunnak a liam i 2 nih hliamhma an tuar tiah theih a si.

December 23 zaanlei slm 4:00 tlukhrawng ah Myinmu (မြင်းမူ) lei a kalmi SAC ralhrang mawtaw cu Nyaungpinhla (ညောင်ပင်လှ) khua pawngah Bomb puahhnawh a ton hnu in khualtlawng mawtaw cu ralhrang nih an kah tiah Khit Thit nih a langhter. “SAC ralhrang nih an kahmi ruangah mawtaw aa ciitmi khualtlawng nu pakhat nunnak a liam i mawtaw mawngtu zong a mit ah kuan hma a tuar, tarnu pakhat zong a ke ah kuanhma a tuar” tiah theih a si. Credit: Lungmili Post

Be the first to comment

Leave a Reply

Your email address will not be published.


*