Kan Kawlram a cul dih mi thawngpang!

Kan Kawlram a cul dih mi thawngpang!
=======
SAC Ralkap Nih Hriamngan An Kah Ruangah Tahan Sangum Minung 6 Hliamhma An Pu! Sagaing ramṭhen, Kalaymyo Tahan sang ah November 26 zinglei le zanlei ah SAC ralkap nih hriamngan an kah mi hriamngan kuan cu inn cungah a tlak caah sangmi minung 6 hliamhma an pu, tiah tualchung mi hna nih an chim.

“A voikhatnak hriamngan kuan hi inn cungah a tla i tarnu pakhat le ngakchia pakhat an ke ah a khen hna pinah uico pakhat zong a khen caah a thi. Cu zan ah cun hliamhma pumi hna cu sang mino nih sii-inn ah an kalpi hna,” tiah Tahan sang ummi pakhat nih a chim.

Sang chungah a voikhatnak an kahmi hriamngan kuan a tla hnu caan tlawmpal ah Yahthahsone(ရသာစုံ) dawr le private sianginn karah a tlak ṭhan caah tualchung minung pathum hliamhma an pu chap, tiah theih a si.

Hliamhma pumi hna cu an inn he ai naihnak sii-inn ah an kalpi hna. Atu kar hrawng hi Kalaymyo nitlaklei le chaklei ah kahdohnak a zual ngaingai caah tualchung mi hna zong ai chawkhlat mi an tlawm ngangai, tiah theih a si. Crd-TCP

Lai Le Mara Nih Independent Kan Hmuh Te Lai, Pu Lalmalsawma Zasai, Dy CEM, MADC, Nihin ah Laifa rorelnak kan ngeih kum 50 lawmhnak ah a rak chuakmi nan dihlak nan kut kan tlaih hna. Nihin ah Laifa nih rorelnak kan ngeih khawh hi a sunglawituk i lunglawmh awk ngaingai a si, nangtah na lawm maw? Golden Jubilee hman a si hi Mara Autonomous District Council (MADC) zong kan lung aa lawm.

Kei zong hi Lai ka si, ka nu zong hika lei Laimi a si. Lai Autonomous District Council (LADC) kum 50 a tlin tiang i riantuantu hna upatnak kan pek hna, a tuan cuahmah liomi hna zong upatnak kan pek hna.

Kan nih cun miphun dang holh dang a hmangmi kan si caah, Sixth Schedule tangah tha te’n, India Constitution kum 1953 ah kan um cang. India cozah zong nih a theih caah mahte rorelnak kan ngei kho, Lai hi Zo hrinsor a si lo, hrinsor sining kan zoh tikah Lai hrinsor tu hi Zo a si, cucaah Lai hi kan upabik a si.

Lai Autonomous District Council le Mara Autonomous District Council kum 50 kan hman hi a sunglawi tuk. India ram ah Mara hi nuai kan tling lo, Lai tu hi nuai leng nan si nan tam deuh, hi tluk miphun tlawmte a si ko mi nih, mah te rorelnak kan ngeih khawh hi Pathian cu thangthat ko usih, Lai le Mara nih Pathian cu sunparnak pe ko usih.

Lai le Mara hi ramkhel Party phunphun ah kan um, a cheu cu BJP, MNF, Congress, ZPM tibantuk ah kan um cio hna, nihin Laifa mino hna cah kan duhmi hna cu Party siloin Miphun tu tanh usih, Miphun ah a raltha mi si usih. A Party hmaizah ruangah miphun caah rian a tuan khawh lo cun saan a tlai lo, Lai le Mara zei bantuk hmai hmanh ah kan zaam lai lo. Miphun ah i lungfiang in i hngat ko usih.

Pathian nih rorelnak a kan pekmi kan nawlngeihnak hi a hleihkuattuk ah hmang lo in le District hruaitu hna mino hna, Council ah chungkhar tling in riantuanmi an um lio ah chungkhar pakhat hmanh rian hmu lo mi zong an um Laifa ah ka zumh.

ADC nih hi nak sang chin in nawlngeihnak hi Laifa le Mara hna nih kan ngeih te lai, kan nawlngeihnak a sang chin lai, diklonak ah i awihter lo in hmaitu nor chin ko usih.

Lai le Mara MDC hna zong kan hawikom an si zongah mah le mah i upat hna usilaw, i soisel awk um lo in cozah rianlak tik zongah kan dirhmun le kan nawlngeihnak hi hi nak sangchin kan hmu te ko lai, tuan i kan hmuh lo hmanh ah kan fale chan ahcun kan hmu ko lai, Lai le Mara nih Independent kan hmuh ko lai.

Laitlang ah ralhrang vanlawng a hung zuang lengmang nain zeihmanh asi lo, tiin daithlang hrimhrim hlah ulaw. ralhrang hi an ngian a thattuk i ngamh deuh hna seh tiphun in zuam ter sawhsawh lengmang i a hnuah hriamnam hman a hmang taktak mi asi khah.

Ka pu ralkap a rak si i Major rank a phan mi nih a rak kan chimh tawnmi cu, tapung sakhan lak har dingmi lak kan i timh ahcun a lang hlan in phảnlo dingin zarh 2 hna kan i kahter lengmang i an i nek, zeiah an kan rel ti lo i an i relh ti lai lo ti kan zumh hnu ah a hmun phan dingmi hriamnam in kan kah ciamam taktak tik hna ahcun, kan thah khawh viar tawn hna a ti bal. Thihphaih siloin ralhrang ngian cu a zir tuk i nan i ralring khawh peng kha a tha lai ka ti.

Kan dothlennak cu kan ba ngai cang lai nain ka huam ti lo, tiin mak tak awk a tha mi thil asi lo caah thlichia tilet lak zongah ram le miphun caah Bawipa mithmai zoh bu tein kal ko rih hna usihlaw. Kan temtuar tuk cang, kan harsa tuk cang, kan ti khawh men, kan nih kan temtuarnak sin ahhin cun Ukraine temtuarnak hi a let tamtuk in a fak deuh rih. Minung thong tamtuk civil mi an thi cang, $billion za tamtuk man an inn le lo vialte an hrawh cikcek hna, an khuapi nganngan cu chuahtakmi khua (ghost town) ah a cang dih cang. An electric vialte Russia nih a hrawhpiak dih nawn hna i khuasik faktuk nih rampumpi a den cuahmah lio hna asi.

Ka chim duhmi cu dothlennak timi hi a rak fawi mi thil asi hrimhrim lo, Korea War, Vietnam War, Afghanistan War, Iraq War le Ukraine War ah thil cangmi nih tamtuk a kan hmuhsak ko. Ramchung ummi caah cun a hartuk hringhran ko lai, asinain teinak taktak timi cu lungsaunak le lungrualnak ah a ummi asi caah lungsau ko hna usih. Ralhrang lei zong an lung a dongh ngai ve ko lai zei pipa cu an tuah kho ve hlei lo timi cu kan hmuh cio ko hna hi.

Ramchung ummi nan harsa tuk i thih le nunri ah nan um, cu rual in ramleng ummi zong thawhbur kongah an cei taktak ve ko cang. Chungkhar pa bik pakhat lawng riantuanmi ca ko ahhin zaangfak khi an si khun ve, a hmun i um lo mi caahcun a ruahpiak awk hmanh khi nan theithiam men lai lo. Asinain lungdong loin an si khawh dothlennak caah cun tho ko rih hna usih, kan angki le tawhrolh tiang zong in zuar ko rih hna usih.

Amahbelte eihmuar a hmangmi upa cu thim hrimhrim hna hlah usih, an eihmuar mi nan theih hna ahcun an photo he group ah fake account zong in post top ko hna u, amah tluk thih le nunri i thawhvo thawh ciomi eihmuar cu kan dothlennak caah tih a nung. Lungdong loin tang tualmal ko rih hna usih, kan tei dengmang ko cang, ralhrang zong nih zei ngaingai tuah khawhmi a ngei ve hlei ti lo vanlawng pakhat va hman le inn va khangh ti dah lo cu.