Kan Vanlawng Kahnak Hi Ralhrang Vanlawng A Kahthlak Khawhlo!

Kan Vanlawng Kahnak Hi Ralhrang Vanlawng A Kahthlak Khawhlo Tu Asi Sual Maw!
========
Nihin 2nd Oct 2022 ah, Chin Ralkapbu Buuk velchum ah, Ralhrang Vanlawng cu, Mupi bang a zuang tikah, lau Zawtnak kan ngei dih. Zeitintiah CNF/CNA kan dawt caah asi. CNF/CNA kan dawt cu Chinram le Chin Miphun dawt asi. A nungmi PATHIAN, Ralkapbu BAWIPA kan dawt zong asi. A Chan cu CHINMI le Krifa (Vailam) cu Pumsa le thlarau bang ṭhen khawh asi lo.

Maw KA NU, Maw Khuazing tiah thin aa dawm mi kan um btkin ziah an kahthlak hnga lo tiah a zai mi kan tam. CNF/CNA thangchiat le mualpho in aa lak mi kan tam tuk manh. CHINMI Kan Level Zeitlukindah a rak niam ti kha hmuh khawh asi. Vaurawng le CBCUSA tiang kan zai hnawh manh hna. Kan karh a ran ngai te. Dalaan thlarau nih cikkhat te an kan zelh ve. Chin Kan naupa Kachin cu tuksapur in MAH nih a thah hna Ni tlawmpal ah, Camp Victoria kian ah, Vanlawng a zuang caah, Laukhun cu asi. Kan mawh hrim lo. Kan Naupa Kachin Zuun tuar a har kan ti lio asi caah.

Sakai, Magway le Kawlram khuate ah SAC nih Vanlawng in a kah poah ah Kawl mi vialte an au dih. An kaa thi chuak lakin an au. Ngakchia an thah hna, Fapawi an thah hna, Tar an thah, a bu pi in an thah hna, kan Pathian Phungki an thah ee, tbk in an kio cio hna. CDM a tuah mi Siangsangruun Cawnpiak tu Professor le Pachup tiang in an au. Sihmanhsehlaw, AA, KIA, KNU, KNDF tbk cu SAC Ralhrang nih Jet Fighter in an kah aah; an au lem lo. NUG member le kusale rual tlawmte lawng nih an au, thanhca (Statement) an chuah. NUG Vanlawng kahnak cu khoika ah dah aum kun a ti mi lawngte an si. CHINMI zong nih kan in cawk piak mi hna Vanral vennak te tiah nawi kan hnuk ve hna. Social Media I nan capar cheukhat cu rel ngam hmanh asi ti lo.

Sihmanhsehlaw, Nan kan cawk piak mi Vanlawng kahnak nih SAC Jet Fighter hi a kahthlak khawh ngaingai lai maw ti hi a tuak awk kan philh tawn. MAH te SAC Ralhrang nih an ngeih mi Jet Fighters hi a kahthlak khawhtu Vanlawng kahnak kong tlawmpal kan hrawm hna, a hngalh rih lo mi hna caah, dawtnak hi kan hrawm hna.

MAH nih mipi thah nak (Abikin Tlangcung mi thahnak caah, Anangpa ah Kachin an kah mi zoh tikah hngalh khawh asi) a hmang lio mi Jet Fighters hi Russia siam mi asi. Zu et nih Zukharing cu Russia Jet Fighters kahthlak khawh tu a bawmh caah, Lam nai in a kah ngam ti lo. Ramri lawng ah Russia Jet Fighters cu aa mer. Cucaah Russia nih Lamhla pi in Missile timi Dungci in an khuapi le a biapi bik hmunhma vialte kha a kah.

MAH le SAC Rallokap btkin umnak ah rat hnawh in a kah ngam hna lo. Cu bantuk cu kan cawk khawh cang maw ti hi tuak ngai a herh. CNA / CDF kan ngeih rih lo mi cu um rih seh, cu btk Vanlawng kahnak cu, NUG nih Kawl miphun PDF a bawmh cang maw? EAO nih teh an ngeih maw? KIA, KNU, AA, KNLA, KNDF, tbk le Tlangcung hriamtlai mi vialte lakah a ṭhawngbik mi UWSA (Wah) nih an ngeih maw? Tuak cio usih.

Vanlawng kahnak cu a phunphun aum ko lai, Tank le Hriam lianpi in Liangput Launcher tiang in aum ko lai, Russia Jet Fighters kahthlak khawh ding ahcun American sermi Vanlawng kahnak a herh. American Policy ning in American ah cawk khawh asi lo. Tuluk sin ah cawk ding lawngte an si caah Rallokap Jet Fighter kahthlak khawh tu asi lai ti awk a har ngai ko.

Tuluk nih UWSA an bawmh mi Vanlawng kahnak cu FN6 ti asi. Asang lei pi 13000 tiang a kah khawh. Meng 4 velchum cu a hrial bak ve lo. Russia ah an cawk mi Yak – 130 cu pi 400000 tiang a zuang khawh mi asi. UWSA nih an ngeih rih mi cu HN – 5A asi. Pe 8000 tiang lawng a kah khawh, Meng 3 velchum lawng ah aa ven khawh. Kanmah Sakhan vennak caah a si khawh lai nain Khuapi humhim nak caah asi khawh lo. Ahmebik mi Khualipi le Myo rual hi meng 5 velchum nak in an kau dueh. SAC ngeih mi MiG – 29 hi pi 50000, SU – 30 cu Pi 56000, tiang sang in an zuang khawh.

Rallokap nih UWSA hi Vanlawng in kah sehlaw, aa kham khawh lailo caah Missile a hmang a herh lai. UWSA nih Missile ahmang ahcun, SAC nih an hmang ve lai, Cutikah Tuluk a thinhung lai. Tuluk thinhung lai kha UWSA siseh, MAH siseh an ṭih.

UWSA nih ngeihmi FN – 6 man cu $100000 leng asi. Duh paoh in cawk khawh asi lo. Russia nih Ukraine ram ah a zuang ko mi Malay Vanlawng an kahthlak lio ah an hmang mi Russia siam, Buk cu pi 80000 leng tiang a kah khawh. Meng 25 velchum a nganh lo. Nain Russia Ralkap lawng I tlaih nak nawl an pek hna. Ramdang le midang zuar an duh lo. Ukraine EAOs phu hmang an sian lo. An tawngh ter hna lo. Kanmah ngeih awk cu a har lai.

SAC Vanlawng Pantsir2 (Pansaa) cu Meng 20 velchum a hrial bak lo, Pe 58000 tiang sang in a zuang khawh mi asi. S-300 hi meng 120 velchum a hrial bak lo, pi 80000 leng tiang a zuang khawh. Russia nih an kuat rih hna lo. Khuapau hlan ah a tlung lai tiah ruah cio asi. Cucaah nan kan cawk piak mi, Vanlawng kahnak phun he cuaithlai tuah usih?

Iraq le Iran War (1980 – 1988) lio ah Iraq nih a tei deuh mi cu Vanlawng a hmang caah asi. American nih Saddam Hussein a tuk tikah (2003 – 2011) Vanlawng chiahnak le Zinan, Diesel chiahnak vialte a hrawk hmasat. Zarh 2 ah a lak khawh ve. Libya Ralhrang Gadhafi a tuk lio zong ah Vanlawng raldohnak hmunhma le thilri vialte a hrawk dih hmasa.

Col. Dr. Mimi Winbard (Pachup – Professor zong asi) nih Van ah a zuang mi Jet Fighters le Helicopter kahthlak cu a har ngai. Vanlawng chiah nak le a thilri khonh nak, Zinan le Diesel chiahnak hrawk dih, SAC phaisa lut nak phih, SAC phaisa lutnak le phaisa an hmuh bik nak hmunhma le Co. Ltd vialte hrawk dih, tbk in MAH hi tei khawh asi tiah an kan ti cang. Cu ti tuah awk ah Kawlrawn um PDF (Nipidaw, Rangoon, Mdy, Monywa, Mitthila, Hmawbi, Myitkyina, tbk um PDF / LDFs / EAOs) nih ṭuanvo lak a herh. Tuluk Gas Pipeline, Thailand Pipeline, India gas Pipeline, tbk vialte hrawk dih ding asi cang. Tuluk, India, Japan, tbk le Crony hna ngeih mi Co. Ltd vialte hrawk dih awk asi. Letpadaung hna cu a hlan tein hrawk diam cang ding asi nain.

Cuti kan tuah khawh ahcun Jet Fighter in an kah khawh ti lai lo, Kachin – Phakant – Anangpa, Lehzetkung, Ringbundai tbk in, Vanlawng in tuksapur kahthat nak a tlawm lai. Mipi a thih mi kan um ve ti lai lo. 2023 ah SAC thluk ding timi cu khuapi raldohnak fak piin a chuak lai, Vanlawng in Mipi he pi lo he an kan kah lai tinak asi. Rangchak tiang thisen a luang khawh mi asi. Armegadon Ralpi a thawh lai tinak asi. Cutin kan hrawk khawh ahcun Vanlawng kahnak khi a herh lo tluk hmanh asi cang. NUG zong GUN ah 100 % a thlen a hau cang, Policy le Mumal an thlen a herh cang. Tuluk he hawikom an si thawng in mipi tamtuk kan thih cang.

Russia Vanlawng cu Ukraine ram ah lut in an kah ngam ti lo caah ramri in; Missile in an kah. Iran siam Drone Swap cu Russia nih a hmang tikah an I khamh khawh ti lo. American nih Vanral vennak a mak bak mi kan pek lai a ti. Russia nih ramri in N. Korea Missile in an kah hna, Ukraine ralkap nih an Khuapi, an minung, Media phu, an khumzual khawh hna lo nain, Ukriane mipi nih, an zai hnawh hna lo.

CHINMI nih CNF/ CNA, CDFs, CBCUSA, Vauraung Zuunthli, kan zainawh hna I rolung kan hna btkin Ukraine mipi nih an cozah le an ralkap kha an tuahto hna lo. WWII lio ah England le France cu Germany nih Bomb thlak lo ding le Vanlawng in kah lo ding in an kham khawh ve lo. An ram le mipi an khumzual khawh hna lo nain mipi nih an zainawh hna lo.

Cunglei ah kan langhter mi hna hrawk khawh ṭung lo ahcun:/NUG kuttang PDF nih cu hmunhma hna cu an hrawk lo ahcun: / NUG tang le tang lo he Kawl PDF/LDF nih Tlangcung mi bangin, biatak tein ral an doh ve lo ahcun: / Ral Teinak lam a bi ngai. Kan tei hmanh ah a can a rau khawh. SAC ralhrang Vanral in, I ven khawh in, Mipi humhim le khumzual khawh ding ahcun: Tuluk, American, Russia, France, UK tbk pakhatkhat nih an kan bawmh a herh. An kan bawmh khawh lo ding asi ahcun SAC Vanral doh nak thlak khawh tu Vanlawng kahnak kan cawk hrim hrim a herh. Phaisa let tam deuh in kan thawh ve a herh.

A thawh duh lo mi khua um a ngah ti ve lo. Pengtlang ah tlawm deuh in le CNF/CNA tamdeuh pi kan thawh a herh. Zeitintiah CDFs kip kha Vanral vennak kan cawk piak khawh hna lailo. Kan cawk hmanh ah; niam tein le Duhsah tein a zuang mi helicopter lawng a thlak khawh lai. Cung lei kan langh ter mi SAC Vanlawng thlak khawh tu hi CDF kan cawk piak khawh hna lai lo dah ka ti.

Cun Information linkage (Linked out) asi lengmang. Kan ralkap hna hi Secret le Confidential nun nan ngeih lo tuk. Information lei ah zero bak kan si rih. KIA, Anangpa kha Information tling khitkhet tein an ngah dih kha. Col. Solomon bia kha ngaih cio hna usih. Mipi le Kan ralkap thihnak he aa peh tlai mi cu Ralbawi (or) Upa 2 hrawng lawng nih hngalh ah a za.

NUG Vuanci le upa kan lawh hna lo a biapi ngai te. Mei cu a kangh hlan ah I ralrin cia ah a ṭha bik ko. Yinmarbin velchum, fak tukin an kah mi aruang cu, Meithatzung uktu nu (Daw Sandar) nih titsa a phoh caah asi. Bo Nagar le Bo Tanmani an I ṭhen mi siseh, an um nak Sakhan, le an cawlhcang ning vialte cu SAC nih an hngalh dih cikcek. Interview ah an langh tuk caah asi. Interview le social media ah; tuah lo ding le chimh lo awk kha an tuah I an phuang caah asi.

Asi kun ah hi tluk in a ṭhawng mi Van Rallokap a ngeih tu MAH le SAC hi kan tei ti hna lai lo maw tiah bia nan kan khawh men. Talban cu ralhrang tiah kan nehsawh ko hna nain, Soviet (Russian) ralkap siseh, American Ralkap siseh an tei hna. Vietnam cu amah nakin Let 1000 leng in thazang a ṭhawng mi American an tei. Tuluk Communist Rallokap (Mao Zedong) nih, Cozah asi lio mi; Vanral vennak angeih mi, Dr. Sun Yat-sen (Suanzetsin)/ (Chiang Kai-Shek/ Chankeseih le General Li Tsung-jen) te cu fawi tukin an tei hna. Mao Zedong (တရုတ်ကွန်မြူနစ်တပ်) nih anmah nak in thazang let tampi a ngeih mi (တရုတ်ဖြူတပ်) te cu an tei hna. Taiwan ah an dawi hna.

Lungrual tein an um, Bukhat ah an lung an chiah (CDF sin zong ah CNA hruainak tang um btkin an um): Cucaah ral an tei. Anmah le mah an I doh lo. Anmah le mah I rem lo ruangah mipi an hrem hna lo, thinphang thlalau in an tuah hna lo caah, mipi nih an zumh hna. Anmah lei mipi 100% ah 100% in an um. Order le Command pek mi an zulh, an ngai. Vietcong timi Vietnam ralkap cu an party nawl an ngai, an zulh dih cikcek. CNF/CNA nawlngeih cicek ve ding.

Cucaah Social Media ah NUG nih zeidah an kan pe ti duh ti hlah. Na hlawh lawng pamhmai lai. Na lung rawk chin lai. Hruaitu upa zong nih social media ah nalh tuk ti hlah usih. Secret nun le confidential ngeih can kan cu cang. Taliban, Moa Zedong, Vietcong te cu UNO an I bochan lo btkin, CNN, BBC, VOA, Nuhrin covo phu zei ah an rel ve lo. An rian tu kha pello tein le tlamtling in, nawlngeitu buin an ṭuan.

Lungkhat, thinkhat, awkhat, an put I, an I ṭhen cheuh lo. Anmah an ngeih mi tein ral an doh ko. Bu tampi an I ṭhen lo. Kan I fonh khawh lo ahcun Myone pakhat Ralkapbu pakhat in maw, asiloah Pengtlang pakhat Bukhat in maw, kan um a herh ko. Cuti kan um tikah, CNA le CJDC order le Command tang ah um dih a herh ve, Raltei duh taktak ahcun. Policy dang ruang ah Dohthlennak nan tuah ahcun hngalh ve hlah. NUG zong kan hakkau tuk ti hlah seh. International level le American level, Values kan duh ko nain, kan sin ah a um tein ṭuan cang ko rawh usih.

Vanral vennak le Van ralkap ah a ṭhawng tuk mi MAH te Ralhrang SAC thluk awk ah Lairel ding mi cu: Information security (Tadin lungchung hmu), Order zulh bak ding, kan ngei mi tein lungrual tein doh ding, timi pathum hi ansi te lai. Vanlawng kahnak ngeih le ngeih lo nih LAIREL te lai lo. Kan Sakhan le kan umnak an hngalh lo ahcun Vanlawng in bomb thlak khawh asi lo. Cucaah Information security kan ti leng mang. Secret le Confidentialness’ kan ti cu asi fam cu.

CJDC member CDFs cu CNA he pumkhat asi mi lawng te an si. Pumkhat an si lo a ti tu hna hi Oneness Theology nan hmang caah asi. Bi-Conjunction in pumkhat an si. ZRA, MDF, CNO/CNDF hna nih CJDC nan lut ahcun Trinity in Pumkhat an si lai. Kan Pathian hi Trinity in Pumkhat ansi hi hngalh ko ahcun CNA le CDF pumkhat an si na hmuh khawh ko lai. Thumthlak hrihrual in pumkhat an si. Kan nih nih Uniform rumro in pumkhat si kha kan ti lengmang caah kan buai nak hi asi. Oneness Theology kan ti mi zong hi Jesuh ah Pa Pathian, Thiangthlarau Pathian sinak a tling an ti bia asi.

Jesuh lawnglawng asilo. Pathum in pakhat an si thotho ko. Tehte: CDF Tindan an dih tir ah Statement vialte kha I theih ṭhan tua uhsi! CNA kuttang le hruainak tang ah kan um dih lai ti asi kha. CNA / CDF in an um nain CNA pumkhat an si nak hi Great Strategic Planning an ti. Ralhrang caah rap le Mang khawng tu an si lehlam. SAC caah siorawl an si. An van bar sual ahcun Sio cawlh an si. A can ka ngeih ahcun; CNA ah lut loin CDF in um buin, Rallokap teinak kong kan hrawm te hna lai. Credit: Saya H. Rung Kaw