Kawl Ralkap Strategy he pehtlaiin theihawk!

Kawl Ralkap Strategy he pehtlaiin theihawk!
===========
2021 kum, Kawl ralkap pawl Chin ramkulh ah motor 75 hrawng an rak kal lio kha a si. Mah ahcun ka rian he pehtlaiin a biapi ngaimi meeting pakhat ka tthu, US cozah nih Kawlram hriamtlai lei ah a thei ngaimi pakhat kha a ruahning an hal. Mah zat ralkap an kalmi nih hin Chin ramkulh an control kho lai tiah na ruat maw an ti.

A chimmi cu an la kho lai lo, asinain iralrin a herhmi cu ral an tei khawh lo tikah mipi kha lungdong hna seh a phunphun an tuah hna lai a ti. Mah a chimmi cu nihin ah Chin ramkulh lawng si loin Kawlram hmunkip ah kan hmuhmi a si. An ralkap an thih deuh inn khangh, a cheu hmun ah rawl lam phih, a pehtlai lomi mipi tleih tbk.

A tuah duh hnawh chanmi cu mipi kha lungdongh hna seh, mah nih khan an mipi ralkap kha buai/zai hnawh hna seh timi kha an duhmi a si. Ziah tiah cun mipi nih Kawl ralkap cu buai le zai hnawh phu ah ruah a si ti lo, cucu anmah zong nih an i theih.

Mah tikah iralrin khun a hauhmi cu Kawl ralkap strategy ah kan lung dongh lo, kan mipi ralkap kan der ter lo ding kha a si. Asinain, minung kan si ve tikah kan tuar khawh nak level pin a phak nak hnga lo, kan mipi ralkap lei zong nih a hlei khun in tuaktan cu hau ve haga.

Nihin kan tonmi hi cabuai cung raltuk a si lo tikah mah thil pahnih balance hi a har khun mi cu a si. Thil a fa tete tiang nunnak thap in raldohmi kan mipi ralkap kan buai hnawh hna a si ahcun hriamtlaih cu thlah a hau ding phun cu a si ve hnga. Lian Bawi Thang

Matupi Ah Meithal Puahthawng Pehtlai In Theih A Si Caah Tualchung Mi Thinphang In An Um! Chin ramkulh, Matupi ah peng (myone) fimcawnnak zung lutlai U Tin Luai thah a ton hnu, October 17, zaan suimilam 9:00 hrawng ah meithal puahthawng pehtlai in a than caah nihin October 18, ah khuachung um siangakchia hna cu sianginn an kai ngam hna lo tiah theih a si.

“Nizaan zaan suimilam 9:00 luan hrawng ah meithal thawng, bomb thawng, hriamngan le hriamhme thawng hna a than caah, khuami hna cu thinphang in an um.

Nihin zinglei in cun dawr ah thilcawk khawh zong a si ko na in siangakchia tu cu sianginn an kai lo, khuami thinphang in an um dih hna caah ka fa zong sianginn ka kai ter lo” tiah tualchung mi pakhat nih a chim. Hriamthlahnak kong ah mi zei kut in thlahmi le puahmi a si fehternak tuahmi a um rihlo.

Thongtla Minung 14 Nih Kanti(ခန္တီး) Palik Sakhan Thonginn An Bauh I An Zaam, Minung 5 An Tlaih Khawh Ṭhan Hna. Sagaing ramṭhen, Kanti pengkomh Kanti palik sakhan thonginn cu nihin October 18 zinglei sml 3:00 hrawngah thongtla nih an bauh, tiah Kanti pengkomh palik he aa naihniam mi sinin theih a si.

Nihin zinglei sml 3:00 hrawngah thonginn kil thir thluan in khammi cu an bauh i, thongtla minung 14 an zam. Cu chungah minung 5 cu an tlaih khawh ṭhan hna i 9 tu cu an luat,” tiah a chim chap. Palik he aa naihniam mi pakhat nih, “Kanti palik sakhan ah thongtla mi hna hi hriamnam he aipehtlai mi case, sual tuahnak le rithaisii case in thong a tlami an tam bik an si,” tiah a chim.

A luancia zarh zong ah Mandalay ramṭhen, Kyaukse peng palik sakhan ah hrenmi thongtla pawl cu Madalay U Bu thonginn i an ṭhial hna lioah thongtla cheukhat cu, Myintnge(မြစ်ငယ်) hlei pawng an phanh ah motor chung in an zuang i, an rak zam. Cu pinah Magway ramṭhen, Pakokku thonginn cu thongtla minung 4 nih an bauh i an rak zam, tiah theih a si.

Minbya ah hriamngan ruangah hngakchia telh in minung 3 an thi, 5 an i hliam. Rakhine ram, Minbya ah October 17 chun ah SAC ralkap nih an kahmi hriamngan a puah caah hngakchia pakhat le nu 2 an thi i hngakchia 3 telh in minung 5 fak piin an i hliam tiah khuami hna nih RFA ah an chim.

Hriamngan ruangah Minbya peng Phalaungpin khua in kum 10 hngakchia nu Ma San Nwe Soe, kum 23 nu Ma Hla San Yin le Taunghchaung khua in kum 48 siangcachim Daw Mya Mya hna an thi tiah an chim. Phalaungpin khua in kum 69 Daw Nyun Sein cu fak piin aa hliam tiah an chim.

Cu bantuk in Minbya peng Singyipin khua in kum 30 Mg San Che, kum 29 Ma Kyaw Ri, kum 64 Daw Nyo Tha le Tanpingyi khua in kum 3 hngakchia Ma Su Lin Nwe hna zong an i hliam tiah khuami hna nih an chim. Minbya khuachung ah a ummi SAC ralkap le Kying tlang ah hmunhma a khuarmi SAC sakhaan in an kahmi hriamngan ruangah atu bantuk in a can hi a si tiah khuami pakhat nih RFA ah a chim.

ZRA nih mipi thilri pawl a pek ṭhan lo a si ahcun a herh ning in a zizutnak kan tuah lai tiah PDF-Zoland nih a thanh. Chin ramkulh, Tedim peng ah mipi nih an thlanti he an cawkmi runvennak thilri pawl cu ZRA phu nih an fir caah mipi sin ah an ap ṭhan lo a si ahcun a zizutnak kan tuah lai tiah PDF-Zoland nih a thanh.

October 14 ah Manipur tiva cung Mansuang hlei ah ZRA phu nih dothlennak caah an hman ding hriam pawl a phormi mino 2 cu an tlaih/hrem hna i hriam an chuh hna. Cun October 15 zong ah Saizan khua an an lut i khuami hna kha lungretheihnak a phunphun an pek hna tiah theih a si.

Buainak chuahter kan duh lo caah PDF-Zoland mino pawl khuachung an luh hlan ah nan chuhmi thilri pawl pe ṭhan hna u law khua in dai tein chuak ṭhan u tiah phone in an ruah ko hna nain an cohlang lo i an hmanmi cycle pawl an chiah tak i ke in an zaam tiah theih a si. Cu an zaam takmi cycle pawl cu Tedim Administration nih an fim.

ZRA phu nih an chiah takmi an cycle pawl le mipi sin in an chuhmi thilri pawl an thlen khawh i cuti si loin mipi thilri an ap ṭhan lo ahcun ZRA cu SAC leiṭang phu le mi ṭha lo phu tiah ruat in a zizut nan si lai tiah PDF-Zoland nih ralrinnak a thanh.

Tedim peng, Tonzang peng le Kalay ah a ummi ZRA phu tha a petu poah cu dothlennak phu pawl nih runvennak kan in pe hna lai lo tiah PDF-Zoland nih a thanh.

Kyainseikgyi SAC sakhaan le Gangaw ah SAC an kah hna, SAC chungtel 13 an thi. Karen ram, Kyaibseikgyi peng, Taungsun khua ah a ummi SAC ralkap le BGF sakhaan cu October 10 ah hriamngan in an kah, Drone in bom an thlak hnawh hna caah SAC ralkap 5 an thi tiah thawng theih a si.

Thanbyuzayat – Phayatungsu lam ah a um i Taungsun khua pawng ah SAC ralkap le BGF nih hmunhma an khuarnak sakhaan cu an kah hna i SAC ralkap 5 an thi, sakhaan chungah a ummi 60MM pakhat a rawk tiah KNLA phufonh SOF nih an thanh.
Cu bantuk in Magway ramṭhen, Gangaw peng chaklei ah a rak lutmi SAC Infantry 50, pyusawhtee phu le YDF Battalion 1, 2, 3 karlak October 17 ah kahdohnak a chuak i SAC ralkap 8 an thi tiah thawng theih a si.

Thazang 150 hrawng a simi SAC ralkap le YDF karlak ah kahdohnak voi 2 a chuak i SAC ralkap 8 an thi, tampi an hliam, YDF hriamtlai 2 an i hliam tiah YDF nih a thanh. Credit: The Chin Post

Be the first to comment

Leave a Reply

Your email address will not be published.


*