Insein thonginn in ramkhel lei thongtla 250 hmundang ah an ṭhial hna!
==========
Yangon, Insein thonginn ah ramkhel leiin thong a tlami minung 250 cu nizaan, September 24 zinglei ah Bago ramṭhen Tharyawaddy thonginn ah an ṭhial hna tiah Yangon economic university siangngakchia(Yuatarkyi hmunram) phu nih nizaan September 24 ah cathanh an chuah.
Cu thongtla thialmi hna chungah cun pa 200 le Yangon economic university siangngakchia phu(Yuatarkyi hmunram) in phaisa tlaitu Ma Yin Myat Noe Oo telhin nu 50 hrawng an i tel tiah an langhter. Ma Yin Myat Noe Oo cu phungrelnak caang poh-mah 505(a) in sual puhnak pahnih caah Insein thonginn biaceih zung nih 2022, March thla ah rianhrang ṭuan le kun 6 thongthlak dingin biakhoahnak an rak tuahpiak.
A luancia August 14 ni zong ah khan Insein thonginn in ramkhel lei thongtla minung 105 cu Magway ramṭhen, Tayat thonginn ah a rak ṭhial cang hna. SAC ralkap nih hramhram uknak an lak hnu ah Insein thonginn in hmundang thonginn ah ramkhel lei thongtla an ṭhial hna hi a voili nak a si cang tiah Yangon economic university siangngakchia phu(Yuatarkyi hmunram) nih an langhtet.
2021, February 1 hnu in SAC ralkap uk dohnak ruangah tlaihkhih a tongmi hi minung 15,607 an si cang tiah AAPP nih September 23 ah cathanh an chuah.
Pyin Oo Lwin Tlawnding Ah Timhtuahnak A Ngei Nain A Khuallam A Humhimlo Caah Rikhiah Umlo In Ni An Thawn! Hramhram uknak latu SAC ralkap hruaitu Min Aung Hliang cu Pyin Oo Lwin ah tlawn dingin timhtuahnak a ngeihmi cu a khuallam humhimnak lungtlin a si lo caah rikhiah um loin a khualtlawn ni an thawn tiah ralkap lei thawngthanhnak tuahtu media cheukhat nih an langhter.
A luancia September 11 ah Min Aung Hlaing cu Russia in Myanmar a phanh hnu ah Pyin Oo Lwin tlawn aa timh hi a si. A khualtlawnnak ding lampi cu humhimnak caah hnangam a si lo caah khuaktlawn ding ni an thawnnak hi a si i, zeitik ah khualtlawn aa thawhlai theih a si rihlo tiah an langhter.
Hpapun pengkomh chung kahdohnak ah SAC ralkap 5 an thi, motor pakhat kan hrawh tiah KNU brigade 5 nih thanh. KNU brigade 5 hmunram Hpapun pengkomh chung nizaan ah kahdohnak a chuakṭhan i SAC ralkap hna le an kuttang um ramri hngak BGF lei a thimi an um tiah KNU brigade 5 nih nihin September 25 ah cathanh an chuah.
September 24, Dweiloe(ဒွယ်လိုး) peng Wadoe(ဝါးဒူး) khua le Htupho(ထိုးဖို) khua karah SAC ralkap kuttang um BGF le brigade 5 kar kahdohnak a chuak i, SAC ralkap nih thil i chanhnak ah an hmanmi motor pakhat kan hrawhkhawh leng ah SAC ralkap 2 kan thah hna tiah an thanhmi ah an langhter.
September 23 ni zong ah SAC ralkap hna le brigade 5 kar Dweiloe peng le Mutraw Kaloe(မူတြော်ကလိုး) ah voi hnih tiang kahdohnak a chuak, SAC ralkap pakhat nih hliamhma a tuar tiah an thanhchih. KNU brigade 5 hmunram chung ah nitin ngawt in kahdohnak a chuak i, SAC ralkap lei a thimi an tam tiah theih a si.
Matupi peng Thaeboi khua SAC ralkap sakhan ummi ralkap phu hna nih khuachung mipi rawl an fir. Chin ramkulh, Matupi peng Matupi-Paletwa motor lampi pawng Thaeboi khua hrambunh SAC ralkap sakhan ah umhmun khuarmi ralkap hna nih khuachung mipi ngeihmi rawl cu an fir i an ei tiah tualchung mi nih an chim.
“Khuami pakhat hmanh an um ti lo, khuami hna inn cu SAC ralkap nih anmah ngeihmi zoh in an i zoh, kan kal takmi facang zong SAC ralkap nih an rak ei” tiah hmundang ah a zaammi Thaeboi khuami pakhat nih a chim. Thaeboi khua SAC ralkap sakhan cu tualchung hriamtlai phu nih an kahdoh caah kaphnih kar kahdohnak a chuak i, khuami hna nih an umnak inn lo kaltak in hmundang ah ralzaam dirhmun in an zaam hna tiah theih a ai.
Thaeboi khuachung khuami hna nih an i khonmi facang hna cu an kaltak caah, cu facang hna cu khuapawng ah sakhan chiah in ummi SAC ralkap nih an ei hi a si. Thaeboi khua hrambunhmi SAC ralkap sakhan cu Matupi he meng 40 hrawng aa hlat i, Thaeboi khua cu 2014 ah cazin raklak ning ah cun minung 500 hrawng an umnak khua pakhat a si.
Thantlang Peng Kong Theihtlei; Thantlang peng chungah NEEL acres 4101, LO acres 294, DUM acres 1169 le ZOLO acres 12884 a um, hipin ah tuah le thuan a si lo mi NEEL le LO ares 822 a um. Cinthlaknak caah hmankhawh bak lo dingmi vawlei hi acrs 140604 a um.
2016 Kum ah Thantlang peng Tikir khua ah Tikir Damn sak le tuah dih a si. Thantlang peng nih thingthei kan cin bik mi hi HAI a si i acres 165 cin a si, cu hnu ah REITE a si i acres 63 cin a si. 2017-2018 Kum ah zuat bikmi satil arsa lakah a tam bik cu AR a si i 2990067 zuat a si, a pahnihnak ah VOK a si i 1905107 zuat a si, a pathumnak cu NA a si i 144265 zuat a si.
2018-1019 Kum ah Thantlang peng chungah Datsi/Disel a zuar mi Dawr 35 a um. 2019 Kum ah Motor Gate kan ngeihmi hna cu Chin Taung Tan (Thantlang to Hakha), Taungzalat (Hakha to Thantlang), Taungzalat (Thantlang to Kalay), AyeChian (Thantlang to Hakha), le Chin Taung Tan (Thantlang to Kalay) an si.
Motor lam kongkau ah Hakha-Thantlang-Saisihchuak tiang hi menng 68 a si, Thantlang-Lungler tiang hi meng 35/2 a si, cun Thantlang-Hnaring-Bawinu tiva tiang hi meng 61 a si. Thantlang pengah Tiva hlei a saubik kan ngeih mi cu Thantlang in Matupi lam lei ah a ummi Bawinu tiva hlei a si i pe 240 a sau.
2019 Kum ah Thangtlang peng chungah Company 12 a um i cu hna cu a tanglei hi an si: 1. ILoveChinland Company, 2. ChinGreenHill Company, 3. Vuichip Company, 4. Lairam Construction Company, 5. Chinland Semual Company, 6. Chinland Unity Company, 7. KTL Company, 8, Lahva Company, 9. Bawinu Star Company, 10. B4 Company, 11. ShweTaraPhu Company
12. U Lian Kung Company, Pehthan te ding. Credit: The Chin Post
Leave a Reply