KEIMAH LAWNG LAWNG HI PATHIAN KA SI IA DANG HRIM HRIM AN UM LO” TIMI KONG AH

Baibal ah, a hlei in Biakam Hlun ah Pathian amah hrim hrim nih ‘Keimah lawng lawng hi Pathian ka si i a dang hrim hrim an um lo’ tiah a tu le a tu a nawlh lengmang mi nih a tinhmi a kawltung tak tak cu:

Minung nih Pathian sermi thil pakhat khat thing le lung, sui le ngun le dar le thil pakhat khat hmangin a sermi milem (siasal) pathian tampi ralchanhnâk ah hmanmi biafang a si.

Zeicatiah Pathian nih miphun caah a thimmi Israel mi phun hna cu minung serchommi milem pathian tampi a biatu Izip ramah sal dirhmun in kum zali chung an um tikah an bawi le nih an biakmi milem pathian kha Pathian tak tak a simi ah an ruah sual lai ti kha Jehovah Pathian nih a phân tuk caah –

‘Keimah lawng lawng hi Pathian ka si ia dang an um hrim hrim lo’ tiah atu le atu Pathian nih a nawlhnâk hi a si.

Cuhlei ah Izip ah kum zali chung sal an can lio ah khan Kanan ram ah kum zali renglo a rak um cangmi miphun pasarih hna zong kha serchom mi milem pathian tampi a biami an rak si caah Sinai tlâng cungin Moses sinah chanhmi Nawlpek pahra lakah pakhatnak bak ah ‘Milem na bia lai lo’ tiah Pathian nih ralrin a pek cawlh hna.

Keimah lawng lawng hi Pathian ka si i a dang hrim hrim an um lo’ tiah a tu le atu a chimh hna i atu le atu ralrin a pek hna hnu hmanh ah:

Kanân ram cu Jeroboam hmangin serchommi milem pathian in a khah caah Jehovah Pathian nih miphun pahra hna cu BC 722 kum ah Assiria sal ah a tânter dih hna i a tângmi mi phun pahnih hna zong BC 586 kum ah Babilon sal ah a tânter dih hna

Cucaah “Keimah lawng lawng hi Pathian ka si i a dang hrim hrim an um lo “tiah a tu le atu Pathian nih Moses le Profet hna hmangin a chim lengmang mi hi minung serchom mi milem pathian tampi ralchanhnâk le cu chungin ralrin peknâk a si ti hi.

Zei ti lei hmanh in el khawh lomi le thlen khawh a si lomi biatak le a tinhmi a kawltung tak tak a si.

Cucaah “Keimah lawng lawng hi Pathian ka si i a dang hrim hrim an um lo”:

Tiah timi bia hi i lak riangmang in Baibal dihlak nih a cawnpiakmi, ‘Pathian pakhat ah mi pathum’ Pa le Fapa le Thiang Thlarau (Trinity) zumhnák ralchanhnâk le elhnialnak ah hman hi:

Baibal tinhmi kawitung si loin anmah tein kawltung an i bunh chom mi ah Baibal luhpi ai timmi an si ti hi zûmtu hna nih fiang te le felfai tein kan theih hngalh hi a biapi tak takmi a si.

Cucu ‘Baibal merh’ timi phun tampi chungin phun khat a si.

Credit: Evan Rual Uk