Khah! Hihi Biatak A Si! Chan khat nun chungah harnak tong bal lo an um lo!

Khah! Hihi Biatak A Si!
=========
Chan khat nun chungah harnak tong bal lo an um lo. A lo cang, ruahchannak a dih timi dirhmun zong phanh caan a um. Hi lio caan te ahhin Khrih cu a zumtu caah ruah lo khuaruahhar in aa phuang tawn. Chim cawk lo tuanbia a um. Donald Gould hi US ralkap, music tumtu a rak si. Spring Arbor University ah sianginn kai ding ah ralkap in aa din. Phaisa a har tuk ruangah aa din ṭhan.

1998 ah a nupi hri in aa awk. A fapa zong a zohkhenh khawh lo ruangah an lak piak. Lungrawh in siai a tawng i lam kam ah rawl hal in a vak ve. Voi khat cu Sarasota khua Florida lam kam “Come Sail Away” timi hla piano in tum i a sa: “Virgin rili pi ah keimah lawng lawng ka mawng. Nunnak thar tal ka hmu hnga maw tiin. Van ka zoh ah khuadawm a zawngmi lawng ka hmuh. Rili ti ka zoh ah a ṭum a kai lengmang mi ti hrah lawng hmuh. Cunihcun kan nun i ka rak tonmi thil vialte nih meici khah bang an ka kah.

Ka hngakchiat lio ka hawile he kan rak tlawnlen caan ka ruat. Hmailei kan rak sadhuhthah mi vialte kha. Aw.. sui um ai rak hmuh te lai bang. Ka Bawipa, ka sinah hung cit ve, ruahchannak ka pe ko ti lawng ka chim khawh. Cun van mibu an hung lang. An ka cawi i Arfi in ser mi tilawng in an ka zuan pi,” timi hla a si. Lung a dongmi a nunnak ti lawng ah Bawipa cit ve a sawm.

Cuka pawng a kal mi nih video an thlak i Youtube ah an thlah. Zan khat chungah million pahra nih an zoh. Vawlei khuaza kip a ttawl. Halvak pawl bawmhnak a tuah. Mi nun tampi a chanh. A fapa zong a lak than khawh. Joseph fapa Jesuh zong minung a si ve caah a vailam a pu kho ti lo. Rome cozah phung ah vailam tah ding mi nih a vailam a put khawh lo ahcun mi dang fial piak ding. Fial khawh lo ahcun anmah nih put ding ti a rak um. Anmah put cu an i nautat tuk.

Midang fial ding an kawl. Mirum, mifim, sifak, mi sual an um dih. Cuka ahcun Simon min a ngeimi pa 9 an um. Cu lakah meng 750 a hlat nak in a ra mi Simon celngel kha putpiaktu ding ah an fial. Amah cu Cyrene khua atu Africa nichuahlei Libya khua in lanhtakpuai (July 4 bantuk) zawh ah a ra mi a si. Mipem sathlai kanmah bantuk te a si. Khrih he pumpak in an i tonnak thawng in mithang zapi nih upatmi Alexander and Rufus hna hringtu pa ah aa cang. A tuanbia cu nihinni tiang chim a si. Bawipa nih a herh lio caan ah a nun a pek.

Khuadawm le tilet lawng na hmuh caan a um lai. Na tuar tawn ve ko lai. Kei zong ka tuar ve. Jesuh zong nih a tuar ve. Hmahseh lungdong in um hrim hlah. Na zumhmi Khrih Jesuh nih an zoh ko. Amah sermi si i hngalh, Amah bochan, Amah ca nun lawng kan luatnak tak, zungzal a hmunmi lam a si. Annih cu Keimah mi an si i Keimah sunparnak petu dingah Ka sermi an si (Isa. 43:7) timi minung kan si. Vawlei thlichia le tilet nih den tikah a biakam a pelh bal lo Pathian nih a chanbau mi ka nun in a sunparnak langhter a duh cang. Kei ka rian cu zumh, ruahchannak ngeih a si.

Thih zong le Khrih sinah i dinh ding. Nun si le Khrih caah. Bawipa Nangmah nawl. Nunak thlichia daihter khotu Pathian. Mizaw damter khotu Pathian. Sifak dawtu Pathian. Mirum rumchinter khotu Pathian. Mifim van fimnak chap tu Pathian. Lungawtawm mi lamhmuhsak tu Pathian. Thong cincik chat khotu Pathian. Lairam zong a damtertu ding Pathian. Zum tuah na nung lai. Credit: Rev. Dr. Chan Thawng Lian

Be the first to comment

Leave a Reply

Your email address will not be published.


*