Khin-Oo Peng Kahdohnak Ah Mizapi Ralkap 12 An Nunnak Liam!

Kayin ramkulh chung; Myawaddy ( မြဝတီ) peng, Phalugyi (ဖလူကြီး) khua pawng um ralhrang sakhan cu Kayin mizapi vengtu ralkap le Rakhine ralkap ANC/AA hna i bawm in an kah hna, tiah ANC/AA nih cathanh a chuah. Cu Ralhrang kuttang BGF sakhan cu February 16, zanlei ah Rakhine ralkap ANC/AA le KNU/KNLA Brigade 27, battalion 2 le PDF ralkap phu hna he i bawm in an laak khawh, tiah theih a si.

KNU/AA le mizapi ralkap nih Sakhan an laak khawh hnu ralhrang lei nih hriamngan le vanlawng 2 in kah an kah hna. Myawaddy BGF lei zong in ralhrang motor 12 in thazaang an rak chap caah Mipi ralkap hna cu hnu an tolh ṭhan, tiah theih a si. Cu kahdohnak chung ah cun ralhrang hriamnam tampi laak a si i ralhrang a thi mi le aa hliam mi zong an tam tiah theih a si.

February 14 ah khan Phalu khua le Lay Kay Kaw peng pawngkam ah kahdohnak a rak chuak i ralhrang thazaang chap ding in a ra mi ralhrang hna cu AA le mizapi vengtu ralkap phu hna he i bawm in an kah hna, tiah theih a si.

Ralhrang nih Hriamngan le Tank In Moe Be an kah: Moe Be( မိုးဗြဲ) khuapi, Ngiang Wai (‌ေညာင်ဝိုင်း)veng, Be Lu Chuang(ဘီလူးချောင်း) pawng ah umhmun a khuarmi ralhrang sakhan cu mizapi vengtu ralkap a phufonh hna nih nihin February 17 zing Sml 4:45 ah an kah hna i kaphnih kahdohnak faak ngai in a chuak, tiah theih a si.

Ralhrang lei nih hriamngan le tank motor in Moe Be khuachung mipi umnak hmun hna cu an kah caah khuachung mi nu pakhat zong hliamhna pu tiah khuachung mi sin in theih a si. Moe Be ( မိုးဗွဲ) khuapi kahdohnak cu a fah khawh chinchin caah a hmunhma um mizapi cu a himnak hmun lei ah i dor chung ding in mizapi vengtu ralkap nih theihternak cathanh an chuah.

Daw Oo Khu Kahdohnak Ah Ralhrang 4 An Thi: Nizan february 16 zaan Sml 8:30 ah Karenni ramkulh, Loikaw peng, Daw Oo Khu nitlaklei ah umhmun a khuar mi ralhrang 70 hrawng cu mizapi vengtu ralkap phu hna nih an kah hna i ralhrang pali an thi, tiah KDF chimphuannak nawlngeitu pakhat nih a chim.

“Ralhrang pawl nih umhmun an khuar ti thawngpang kan theihnak ni 3 a si cang. Zahan zaan ah khan ruahlopi in kan va kah hna,” tiah cu kahdohnak kong cu a chim. Mizapi vengtu ralkap phu hna nih an kah hmasa hna caah kaphnih kandohnak a chuak, tiah a langhter.

“Ft’ 100 hrawng a hlatnak in kan kah hna caah ralhrang lei a thi mi hna zong kan hmuh khawh hna, anmah lei zong nih hriamngan le hriamhme he an kan kah ve. Hriamngan in voi 10 hrawng cu a kan kah men lai,” tiah cu kahdohnak kong cu a chim chap.

Suimilam pakhat chung hrawng kaphnih kahdohnak ah hin ralhrang 4 an thi, tiah KDF lei nih nih cun an langhter. “Ralhrang pawl hriamnam cu laak khawh kan i zuam tuk ko nain, kan hriamnam aa thlau tuk caah kan la kho li tiah,” tiah hriamnam an chambau nakkong zong an chim chap. Mizapi vengtu ralkap lei in aa hliam mi um lo tein hnu an tolh kho, tiah KDF nih a thanh.

Ukraine ramri in Russia nih a ralkap kirter hna timi cu a dik lo mi a si, tiah US nih ralrinnak pek. Russia nih a ralkap kirter cu chim lo a chaptu in a chap chin hna i ramri lei ah an i thawn deuh lengmang, tiah US nih a chim.

Naite ah Russia Defence Ministry zung nih Ukraine ramri ummi ralkap pawl cu an thiltom he anmah le an camp cio ah an kir cang, tiah a rak thanh nain mi ngiatu (Spy) hna nihcun Russia ralkap pawl hi an kir taktak lo, raltuknak tank le Helicopter pawl an chap pin ah ralram siizung tiang an karhter chap, tiah an chim.

British ram ralkap ngiathlaitu phu nihcun Russia nih ralkap kirter loin a chap tu in a chap chin caah nichuahlei Europe ah a faak takmi raltuknak a chuak lai, tiah chim ve. Russia nih hin a ram inpa,

Ukraine cu nitlaklei ram an i funnak ‘NATO’ chungtel ah a lut sual lai ti a phan caah tubantuk in ramhnih karlak i ngiarnak sangbik dirhmun an phanh hi a si. American le NATO chungtel ram hna nih cun Ukraine le Russia buainak cu biaruahnak le ceihhmainak in a nem khawh chung in dihter ding ah Russia an lemsoi cuahmah ve.

Russia nihcun Ukraine tuk kai tim taktak lo, tiah tutiang ai pheh nain US President Joe Biden nih cun Russia cawlcangh ning hi zeitik poh ah tukdohnak a thok kho dirhmun ah a dir tiah a chim. Russia Foreign Minister Antony zong nih, Russia nih ralkap kirtermi kong ah tehte a umlo pin ah Ukraine ramri tu a naih in an naih chin lengmang, tiah a chim ve.

Estonia ram ralkap ngiathlaitu phu nihcun, “Russia nih Ukraine ramri ah ralkap Brigade 10 tluk a chiah hna hi minung in singkhat le thong sawmsarih(170,000) hrawng an si lai,” tiah an ruahdamh.

NUCC He Tonnak Ngeih Ding Ah ASEAN Special Envoy Sin Ah Malaysia Nih Biatung A Chuahpi: ASEAN Special Envoy le NUCC tonnak ngeih ding ah Malaysia Foreign Minister nih biatung a chuahpi, tiah theih a si.

Nihin February 17 ah an thok mi ASEAN Foreign Minister pawl tonnak ah atu bantuk in Malaysia Foreign Minister nih biatung a dirh hi a si i, January 27-29 lio i NUCC a voikhatnak Meeting phichuak zong zoh ding in ASEAN Special Envoy cu a hal chih.

National Unity Consultative Council (NUCC) cu National Unity Government (NUG) , Thimnak ah a tling mi hluttaw Palai hna, Ramkhel Party hna, Caan karlak State Consultative Council, Zatlang Bu hna, Dai tein lamzawh mi hna le hriamtlai phu hna tel in dirhmi phu pakhat asi.

Cambodia ah nihnih chung tuah cuahmah mi ASEAN Foreign Minister hna tonnak ah a bik in Myanmar konglam an ceihhmai i, Tutan tonnak ah SAC Ralhrang khinhmi Foreign minister ai tel lo, tiah theih a si. Credit: The Chin Post.

Be the first to comment

Leave a Reply

Your email address will not be published.


*