Uniform le Hriamtling He Mawgyun Khuachung Ah Aa Chawkmi Pyithusit Hruaitu Kahthah A Tong!
========
Ayeyarwaddy ramṭhen Mawgyun khua pyithusit hruaitu Khin Maung Kyi cu nihin October ni 5 zaanlei ah meithal kahnak in a thi tiah tualchungmi hna nih an chim. Pyusawhti, MahBahTah le pyithusit hruaitu Khin Maung Kyi cu Bogale PDF le Mawgyun PDF hna nih kan fimtawl tiah cathanh an chuah.
Khin Maung Kyi cu SAC pekmi uniform le meithal he mawtaw in khuachung lakphakti dawr hmai ah a um lioah kahthah a tong tiah tualchungmi nu pakhat nih a chim. Kahthah a tongmi Khin Maung Kyi ruak cu SAC ralkap le palik nih an lak i siizung ah an kalpi, khuachung zong checkhlatnak an tuah tiah a chim.
Taphan Sait Tidil Pawng Kahdohnak Ah SAC Ralkap 10 An Thi. Sagaing ramṭhen Kanbalu pengkomh, Kyunhla peng Taphan Sait tidil pawng Shwepawkune(ရွှေပေါ်ကုန်း) khuapawng ah October 4, zinglei ah minung thazaang 40 hrawng simi SAC ralkap le tualchung hriamtlai phu kar kahdohnak a chuak i SAC ralkap lei a thimi an tam tiah tualchung mi nih an chim.
Taphan Sait tidil palik sakhan ah umhmun khuarmi SAC ralkap le pyusawhṭi phufonh minung thazaang 40 hrawng nih Taphan Sait tidil pawng Shwepawkune(ရွှေပေါ်ကုန်း) khua lei ah rallam sial in an phan i, tualchung hriamtlai phu hna he kaphnih kar suimilam pakhat tluk hrawng naih tein kahdohnak a chuak tiah tualchung media Infinity Group nih an thanh.
Kaphnih kar i kahdohnak ah SAC ralkap lei ralbawi pakhat telh in ralkap 10 an thi, ralbawi pakhat telh in SAC ralkap minung 20 leng nih hliamhma an tuar tiah Infinity Group nih an thanhmi ah cun an langhter.
Kani Peng Ah SAC Tinbaw Nihnih Chung Kah An Tong, Minung 15 Hrawng An Thi. Sagaing ramṭhen Kani peng ah Chindwin tiva in a rak kaimi SAC ralkap le Daung Luth Linn -LPDF phufonh kar kahdohnak nihnih chung a chuak tiah theih a si.
SAC ralkap tinbaw 13 cu October ni 4 zaanlei suimilam 3 hrawng ah Pansan (ပန်းဆိုင်း) khua pawngah Daung Luth Linn PDF le tualchung hriamtlaiphu hna nih an kahdoh hna i SAC tinbaw cu an rawk i minung 15 leng an thi tiah LPDF hna sin in theih a si.
October ni 4, Pansan khua ah SAC tinbaw cu tualchung hriamtlaiphu he fonh in kan kah hna, an mah lei zong nih hriamngan in a kan kah ve i kaphnih kar kahnak a chuak, SAC lei zeizat an thih cu fiangin theih a si lo. October ni 3 kahdohnak ah cun SAC lei thawng an i thanhnak radio line kan tlaih i 15 hrawng cu an thi tiah kan theih tiin Daung Luth Linn LPDF in ṭuanvo ngeitu pakhat nih a chim.
Tualchung hriamtlaiphu hna nih cun SAC ralkap he aa pehtlaimi , Dalan a ṭuanmi hna le SAC riankhinh mi a cohlangtu hna cu pehtlai thluahmah in fimtawl an si lai caah mipi nih SAC neihniam in um lo dingah an cathanh ah cun an langhter.
Myawaddy-Kawkareik Lampi Ah Motor Pakhat Ai Leh Caah Minung 5 An Nunnak A Liam, Hliamtuar An Tam. Myawaddy-Kawkareik lampi ah “Pwint Nay Chi”(ပွင့်နေခြည်) laam phu nih zulhmi motor cu aa leh caah minung 5 an nunnak a liam i minung 15 leng hliam an tuar tiah theih a si.
Nihin October 5, zaanlei suimilam 4:00 hrawng ah a laam mi phu hna nih an i citmi motor cu break a ṭhatlo caah aa lat tiah theih a si. “Atu tiang ah nunnak liammi hi minung 5 an si, emergency in zohkhenh mi hi 15 hrawng an si, cu ai hliam mi hna cu sizung ah kalpi an si” tiah mi bawmchanhnak a tuahtu phu chungtel pakhat nih a chim.
Cu motor chung ah cun pa 21 le nu 7 an i tel i, cu chung ah pa 15, nu 5 le ngakchia kum 2 tluk nih hliamhma an tuar i, minung 5 an nunnak a liam tiah theih a si.
Rakhine ramkulh chung ralzaam mi hna chung in thla 6 tang ngakchia 2000 leng an i tel. Rakhine ramkulh chung kahdohnak ruangah mah umnak hmun kaltak in ralzaam dirhmun a phanmi 82,000 leng an phan tiah AA nih October 4 ah cathanh an chuah.
Ramzaam dirhmun in a ummi hna chung ah thla 6 tang le nau chuakka 2100 leng an i tel i, ralzaam camp dihlak 150 leng ah an i dor hna tiah an langhter. SAC ralkap le AA kar kahdohnak ruangah August thla le September thla thlahnih chung ah ralzaam 6100 leng an karh, siangakchia 10,000 leng zong ralzaam hartong mi hna umnak hmun ah ca an cawng tiah an langhter chih.
Ralzaam dirhmun in a ummi an karh na in, ramkip in bawmchantu phu hna cu SAC ralkap nih bawmnak peknak nawl an phih hna caah, ralzaam dirhmun in a ummi hna cu harnak an tong tiah bawmchantu phu hna nih an chim.
Ralzaam Mi Hna Nanmah Umnak Nan Kir Ahcun Facang Dip Khat Le Phaisa Singkhat Kan In Bawmh Hna Lai Tiah SAC Nih An Lemsoi Hna. Rakhine ramkulh, Kyaukdaw peng ralzaam sakhan ummi ralzaam mi hna nih tukum fur a dih hlan ah mah umnak cio kir ding in SAC ralkap nih nawl peknak an tuah tiah ralzaam dornak sakhan in ṭuanvo ngeitu nih a chim.
Ralzaam sakhan in ṭuanvo ngeitu hna cu nizaan October 4 ah Kyaukdaw peng General Administration Department, pengkulh uktu nih an auh hna i a tubantuk in nawl peknak an tuah hi a si.
“Khuabawi zung ah biaruahnak ngei ding in an kan auh, tukum fur a dih hlan ah mah umnak khua cio ah kir ding, ralzaam mi hna nih mah umnak hmun i an kir ahcun chungkhar pakhat ah facang dipkhat le phaisa singkhat pek nan di lai, mah umnak khua le hmunhma kirlo in ralzaam umnak camp ah an umko a si ah cun cu bawmhnak kan in pe hna lai lo tiah an kan chimh” tiah ralzaam camp in ṭuanvo ngeitu nih a chim.
A tulio dirhmun ah hin mah umnak kir in khuasak ah cun mah nunnak a humhim kho lailo tiah ralzaam dirhmun in ummi pakhat nih a chim.
India Ram Chaklei Ah Bus Ai Leh Caah Minung 25 Nak Tlawmlo An Thi. India ram chaklei Uttarakhand ramkulh ah October 4 zaan ah motor pakhat ai let i minung 25 nak tlawmlo an nunnak a liam tiah theih a si. Cu motor cu horkuang pakhat ah a tla, motor chung cuangmi khualtlawng hi minung 40 nak tlawmlo an si tiah ramkulh ṭuanvo ngeitu hna nih an chim.
Ruahlo piin hi motor lehnak a cannak kong he pehtlaiin ṭuanvo ngeitu hna nih hlathlainnak an tuah tiah theih a si. Motor lehnak a cannak hmun ah ramkulh Disaster Response Team nih minung 21 an bawmhchanh khawh hna. Hi thilcang kong ah nunnak liammi hna chungkhar nan ngaihchiatnak kan in hrawmpi hna tiah prime minister Modi nih a chim.
India ram lam lei zohkhanhnak thazaang dernak ruang ah le lam rawhnak a canruang, lamfehnak a umlo ruang ah le dingrep phung zulhlo ruang ah kum tin in nunnak liammi sing khat leng an si tiah theih a si. Credit: The Chin Post
Leave a Reply