KNU le ralhrang kar kahdohnak ah ralhrang 50 an thi!

KNU brigade 1, Thaton Pengkomh September Thlachung Kahdohnak Ah SAC Ralkap 50 Hrawng An Thi, Ralkap 2 CDM An Tuah!
=======
KNU bridage 1, Thaton pengkomh September thlakhat chung SAC ralkap le KNLA brigade 1 phufonh kar kahdohnak voi 39 a cang, cu kahdohnak ah cun SAC ralkap 48 an thi i 41 nih hliamhma an tuar tiah KNU brigade 1 nih cathanh an chuah.

Kahdohnak chungah SAC ralkap lei motor 10 a rawk i, Revolver pakhat, MA meithal 2, kuanbawm 8, kuan 390 hna cu KNLA phufonh nih an lakkhawh. Kaphnih kar i kahdohnak ah KNLA phufonh lei in minung 5 nih hliamhma an tuar tiah theih a si. SAC ralkap chungtel minung pahnih nih an hriamthil he CDM cawlcanghnak an tuah tiah KNU brigade 1 nih an cathanh chung ah an langhter.

SAC ralkap lei nih ni fatin in hriamngan le hriamhme he mipi umnak khuachung an kah caah inn 4, motor pakhat a rawk i, inn zuat saṭial Naa, Caw zong an thi. SAC ralkap hna nih an sakhan remhkauhnak ding caah tiin tualchung mi hna thing le rua cu hramhram in an lakpiak hna tiah theih a si.

Yesagyo Peng Yelaykyun(ရေလယ်ကျွန်း) Hmunram Ah SAC Ralkap Thilri Chantu Tilawng Kah A Ton Caah Ralkap 9 An Thi. Magway ramṭhen, Yesagyo peng Yelaykyun hmunram ah Ayeyarwaddy tiva thluan in a kalmi SAC ralkap tilawng cu, kan kah hna caah SAC ralkap 9 an thi, tiah MG 6 Guerrilla Myinchan nih cathanh an chuah. Yesagyo peng Yelaykyun hmunram ummi Min khua ah umhmun khuarmi SAC ralkap ca ah thilri chanh ding in a kalmi tilawng cu, MG 6 Guerrilla Myinchan le Amye Letyung(အမေ့လက်ရုံး) Guerrilla phu nih an kah, tiah theih a si.

Cu kahdohnak a daih in PDF ṭangṭi hna cu hnu kan kir lei ah SAC ralkap nih hriamngan in an kan kah ko nain hliamhma pumi kan um lo, tiah MG 6 Guerrilla Myinchan nih an langhter. Yelaykyun hmunram ummi Min khua ah SAC ralkap le pyusawhti cu umhmun an khuar i, Yelaykyun hmunram ummi khuate tampi cu mei in an khangh hna, tiah theih a si.

Thlahnih Chungah SAC Ralkap Kut In Tualchung 8 An Nunnak A Liam, 20 Leng Hliamhma An Pu. A luancia August thla in SAC ralkap le AA kar kahdohnak a chuak ṭhan i, SAC ralkap nih timh ciammam in tualchung mi cu an kah hna pinah an tlaih hna, tiah theih a si.

SAC ralkap nih hriamngan he hriamhme he khua chungah duh paoh in an kah caah tualchung mi a thimi le aa hliammi an tam. Western News nih cazin a khawmh ning ah August le September thla chungah SAC ralkap kut in tualchung mi 8 an nunnak a liam i, 23 hliamhma an pu, tiah theih a si.

Rakhine rammi ramkhel thiam sang Phe Than nih, “SAC ralkap le AA kahdohnak a chuak kho ko nain SAC ralkap nih, tualchung mi hna cu ralphaw hman ding in an tlaih hna awk a si lo,” tiah a soisel hna. Rakhine ramkulh chung kahdohnak ah SAC ralkap kut in tualchung mi a thimi le inn le lo a rawkmi vialte cungah ANP party nih SAC ralkap thil tuahmi cu fak piin a soisel i, duhlonak a langhter.

SAC Ralkap Nih Khinmon Khua An Khangh Pinah Khuami 400 Tluk An Tlaih Hna! Sagaing ramṭhen, Chaung U peng Khinmon(ခင်မွန်) khua cu, SAC ralkap nih nizaan October 6 zaanlei sml 1:00 hrawng ah an khangh i, khuami 400 tluk an tlaih hna pinah an hrem hna, tiah tualchung mi hna nih an chim.

SAC ralkap pawl cu Min sianginn le Chan Thar Gyi(ချမ်းသာကြီး) sianginn ah hmunhnih ah ṭhen in an um i khuami 400 tluk an tlaih hna, tiah theih a si. “Khinmon khuami 400 tluk cu uico ralkap 50 hrawng nih hmun hnih ah an i ṭhen i, an tlaih hna. NLD party a ṭanhtu hna inn 5 cu an khangh caah a ciam dih,” tiah tualchung mi pakhat nih a chim.

SAC ralkap nih Sagaing ramṭhen chungah Chaung U, Khin U, Monywa le Taze peng khuate an khangh lawng si loin Magway ramṭhen ah peng cheukhat zong ah hmunhman thianhhlimnak kan tuah an ti i, khuate hna cu mei in an khangh hna. Khuami zong an tlaih hna i an thah hna, tiah tualchung mi hna nih an chim.

Min Aung Hlaing Nih Nawlngeihnak A Lak Ruangah Puma Energy Companny Cu Myanmar Ram In An Chuak Cang! SAC hruaitu Min Aung Hlaing nih, nawlngeihnak a lak ruangah Puma Energy Companny nih datsi le vanlawng diesel cawk zuarnak rian vialte a tuahmi cu kaltak in Myanmar ram kan chuah tak cang, tiah cathanh an chuah.

Singapore hrambunh Trafigura Energy Companny kuttang Puma Energy cu, Myanmar ram ah chawleh chawhrawlnak a tuahmi vialte zuar dih ding in minsen a thut cang. Puma Energy Asia Sun le National Energy Puma Aviation Services (NEPAS) hna telh in Puma Energy nih a ngeihmi share vialte zong a zuar dih i, Myanmar ram a chuah tak cang lai, tiah theih a si.

Puma cu Myanmar ram chungah datsi le vanlawng diesel tam bik a phak tertu a si. Puma Energy Companny cu SAC nih nawlngeihnak an lak hnu 2021 in an rian vialte an ngol i, kum 2022 ah Myanmar ram an chuah tak hi a si.

Ye Khua Ah SAC Ralkap Kuttang Rianṭuantu Khuabawipa Kahthah A Tong. Mon ramkulh, Ye khua Thiri Zeyar(သီရိဇေယျာ) sang ah SAC kuttang rianṭuantu khuabawipa Min Thein cu, nizaan October 5 zing sml 10:00 hrawngah kahthah a tong, tiah tualchung mi hna nih an chim. Khuabawi Min Thein cu a inn hmai lakphak dawr a ṭhut lioah MSRO phu nih meithal in an kahthah hi a si.

MSRO ṭuanvo ngeitu Ar Kah nih, “Khuabawi Min Thein cu SAC ralkap he i bawm in tualchung mi cu an tlerh lengmang hna caah kan kahthah,” tiah a chim. Min Thein cu a luancia kum 2010 lio in khuabawi a rak ṭuanmi a si i, SAC nih nawlngeihnak an lak hnu in ralkap he i bawm in rian a ṭuanmi a si. Anih hi SAC ralkap thawng petu dalan minthang a si, tiah theih a si.

Shwe Bo-Mandalay Lam Ah Umhmun Khuar Ai Timmi SAC Ralkap Cu Hriamngan In Kah An Ton Caah 7 An Thi. Sagaing ramṭhen, Walet peng Shwe Bo-Mandalay lam cung um Sai Naing Gyi(စိုင်နိုင်ကြီး) khua ah SAC ralkap cu, umhmun khuar ding in an i timhtuah lioah hriamngan in kan kah hna i, SAC ralkap 5, officer 1 le pyusawhti 1 an thi, tiah Burma Rangers (ShweBo) nih an thanh.

October 4 ah Walet peng Sai Naing Gyi khua ah SAC ralkap cu umhmun khuar ding in an i timhtuah lioah Burma Rangers (ShweBo) le ṭangṭi phu Nattaung(နတ်တောင်) Naga phu hna i bawm in 60mm hriamngan in an kah hna caah SAC ralkap officer 1 telh in ralkap 6 le pyusawhti 1 an thi, tiah theih a si.

Cu kahdohnak ah SAC ralkap hliamhma a pumi an tam i, SAC ralkap pawl cu Shwe Bo lei ah an kir. Hriamngan in kah an ton hnuah Sai Naing Gyi khuami 20 leng an tlaih hna i mei in an khangh hna, tiah theih a si. Sai Naing Gyi khua pawng Sai Naing kuaih ah SAC ralkap pawl cu atu le atu bomb puahhnawh an tong, tiah tualchung mi hna nih an chim.

Myaung ah SAC ralkap nih innchung ah an hmanhmi bomb i lamhsualnak in kum 60 tluk nu pakhat a nunnak liam. Sagaing ramṭhen, Myaung pengchung Minhla khua, nihin October 6 zinglei ah SAC ralkap nih co-ka ah an hmanhmi bomb lamhsual ruang ah kum 60 tluk upa Daw Tin San a nunnak a liam tiah tualchung mi nih an chim.

Minhla khuachung ah a luancia August thla in SAC ralkap hna nih khuachung ah rallam an rak sial, cu lio ah inn pakhat co-ka ah bomb an hmanh ta, cu bomb cu nihin October 6 zinglei ah Daw Tin San nih aa lamhsual caah a nunnak a liam tiah Myaung PDF Cdsom nih an chim.

“Cu hlan ah SAC ralkap an chuah hnu in cun khua khat le khua khat aa tonnak lampi ah an hmanh takmi bomb cu kan hrawh khawh tawn. Cun Bomb hmanhmi kong he pehtlai in ruahnak i cheuhnak le fim i chimhnak zong tuah kan i tim” tiah Myaung Pdf Cdsom nih a chim.

Mone Hmunram Ah SAC Ralkap Nih Tualchungmi 15 Leng An Tlaih Hna. Mu peng Mone hmunram ah SAC ralkap nih tualchungmi an tlaih hna tiah KNU nih cathanh an chuah. October ni 5 ah SAC ralkap nih mawtaw 3 khat in Mone hmunram ah an lut i tualchungmi nu 5 telhin tualchungmi 15 leng an tlaih hna tiah an cathanh ah cun an langhter.

Tlaih a tongmi hna cu Khah Mah Yah 559 battalion ah an kalpi hna tiah theih a si nain zeiruangah an tlaih hna ti cu theih a si rih lo. An tlaihmi hna mi tamdeuh cu Mone khua um mi an si i, Yaeosin (ရေအိုးစဉ်) khuami pahnih zong an i tel tiah an cathanh ah cun an langhter chih.

Ayeyarwaddy Ramṭhen Ah Covid 19 Mizaw Tuar 36 An Hmuh Hna. Ayeyarwaddy ramṭhen October 6, nikhat chung ah Covid 19 zawtnak a ngei tiah fehter mi mizaw thar minung 36 hmuh a si, cu chung ah cun Pathein in zawtnak hmuhmi an tambik tiah SAC ralkap kuttang um ngandamnak lei vuanci zung nih cathanh an chuah.

Covid 19 zawtnak a ngei tiah hmuhthar mi mizaw hna cu Pathein in 12, Yekyi ah 7, Wakhemah peng ah 3 le Kyiankhin peng ah 3 an si. SAC ralkap uk a doh i CDM cawlcanghnak a tuahtu ngandamnak lei rianṭuantu hna nih cun, Covid 19 zawtnak rai khamsi i chunh zong ah zawtnak i chawnhkhawhṭhiam a si caah mizapi nih ralring tein kan um a herh tiah forhfialnak an tuah. Credit: The Chin Post

Be the first to comment

Leave a Reply

Your email address will not be published.


*