Lawngtlai Lei In Bungtlang Lei Kal Dingmi Pick-up Sangau Phak Lai Lam Kil Kawi Ka Ah A Excident Caah Video Zawng Um

Lawngtlai lei in Bungtlang lei kal dingmi pick-up Sangau phak lai lam kil kawi ka ah a excident caah cu pick-up cu ai rawk fak ngai tiah Theih a si.

A mawng tu hi ai khawng ko nain a fak tuk cu si lo tiah Theih a si a ngei tu hi Bette si I nai Teah a cawk mi si a ngei tu hna ca le  excident mi hna caah thlacamnak in Bawm hna uh sih.

Relchap:Caan Upat Hi Mah Le Mah I Upat A Si

Minung cu caan chungah a ummi le khua a sami kan si ruangah aho kan si hmanh ah caan cu kan upat cio a hau i caan kan tlolh lo ding hi a biapi taktakmi a si. Caan nih mi a hngak ballo, cucaah caan chungah a ummi kan si bantukin i hngah ve ding kan si lo.

Minung cu caan kan upat lo chung le thil pakhat khat kan tuah tikah maw mi kan tling rih lo tiin kan i hngah lengmangmi nih hmailei ah caan upat thai lonak a chuahpi. Caan upat lo hi țhanchonak dawntu bik zong a si fawn.

Lai (Chin) mi hi caan a upat lo bikmi kan si ko ti u sih law kan palh hnga maw? Kan palh theng lai lo dah ka ti. Lai mi hi zeitindek kan si hnga, kanmah lai mi sinah cun caan khiah ningin kan chuak in kan phan kho bal theng hna lo. Nan umnak ram le hmun le hma cio ah nan si cio ko lai.

Aho lai mi kan si hmanh ah kan umnak ram miphun dang he i ton ding a si paoh ahcun a caan hi kan upat kho ngaingai ko. Khiahmi caan a tlin hlan minit 10 asiloah minit 15 ai duh ah cun kan phan dih tawn. Tlai hrimhrim kan duh lo. Asinain kanmah lai mi he i ton ding a si ahcun tuan deuh ah phanh a um theng lo. A caan a luan hnu deuh pengah kan phan tawn hna. Lai mi cu Khrihfabu ah siseh, vawlei lei i țhithruainak ah siseh kanmah lai mi le lai mi i tonnak kan tuah tik paoh ah kan tlai peng. A caan a luan hnu minit 10 asiloah minit 15 hi cu kan tlai kho peng ko tiin ka hmuh.

Cucaah cun lai mi a simi paoh nih khoika ram le hmun le hma kan um hmanh ah caan hi upat hna u sih ti hi ka duh bikmi le ka saduhthah zong a si. Lai mi cu mi phun dang sinah caan kan hei upat ning le mah lai mi sinah caan kan hei upat lo ning hi ruah tikah miphun dang tu kha a cawisang i mah miphun, mah le mah tu cu zei ah ai rel lo i ai namnehmi miphun kan sinak a langhnak a si ko rua tiin ka hmuh.

Nan si cio ko lai, nan umnak miraang pawl he cun caan nan upat ngai lai, nain lai mi he cun caan nan upat lai lo. Kanmah Norway zong kan si ko cuh. Norway mi sinah cun a caan kan upat ngaingai. Meeting, i tonnak a um tikah siseh, rian lei le a dangdang he ai pehtlaimi kongah siseh, Norway mi he i ton ding a si paoh ahcun a caan hi kan upat kho ngaingai ko. Lai mi ahohmanh nih tlai hrimhrim cu kan duh lo. Sihmanhsehlaw Lai mi sinah cun meeting maw asiloah pakhat khat kongah maw i tonnak a um tikah caan kan upat lo tiah ka hmuh. Kanmah lai mi le lai mi i tonnak paoh ah minit 10 asiloah 15 hi cu kan tlai kho peng.

A bikin zarhpini Pathian thangțhatnak hmun  kan i pumh tikah suimilam 12:00  thawk dingmi kha suimilam 12:00 a luan hnu lawngah kan thawk khawh tawn. A ruang cu mi kan tling rih lo tiin i hngah kan hmang. Minung cu zeibantuk miphun kan si le aho kan si hmanh ah caan kan upat lo cu kanmah le kanmah kan i upat lo a si tiah keimah nih cun ka hmuhning a si. Thil dang zong chim ding a tampi, nain um rih hna seh. A bikin lai mi cu Khrifabu meeting ah maw asiloah lai mi nih kan tuahmi i tonnak poah paoh ah a caan kan tlai lengmang. Caan khiahmi a tlin hlanah kan phan kho ballo.

Cucaah cun lai mi kan țhancho khawh lonak le țhanchonak a kan dawn biktu cu caan kan upat lomi hi a si ko tiin ka hmuh. Caan upat lo cu țhanchonak a dawn biktu pakhat a si. Phun dangin chim ahcun țhanchonak a dawn biktu thil cu caan upat lo hi a si. Zeicahtiah caan kan upat lo ahcun kan tuah dingmi thil vialte zong kan tlolh dih. Caan kan upat lo chung poah cu zeitikhmanh ah kan țhangcho kho lai lo tiah ka ruah. Cucaah cun lai mi nih caan hi upat zungzal hna u sih.

Caan nih mi a hngak lo, cucaah caan chungah a ummi kan si bantukin ahohmanh i hngak ve hlah u sih. Suimilam caan a tlin bak cun mi kan tling rih lo e ti loin tuah awk a simi cu tuah colh le thawk ding a simi cu thawk colh ding a si ko. Pumhnak ah maw asiloah meeting ah maw caan a tlin ko zongah mi kan tlawm ai tiah mi hngah kan hman lengmangmi nih hmailei ah caan upat thai lonak a chuahpi i, țhancho ding tlukin țhancho khawh lonak zong a si.

Cucaah cun lai mi nih caan upat hna u sih. Caan upat hi mah le mah i upat zong a si.

Dinnak kha a cat lomi tiva bantukin luanter camcin ko u (Amos 5:24).

Laknak : Salai K. Biak Lian Thawng

Be the first to comment

Leave a Reply

Your email address will not be published.


*