Malaysia cozah nih UNHCR hi a ngiar ngai te!

Malaysia cozah nih UNHCR hi a ngiar ngai te!
========
A tu lio cu kan umnak ram malaysia cozah nih UNHCR hi a ngiar ngai te. Malaysia um mi UNHCR zung cu cozah nih phih a tim ti mi news nih kan lung zong an kan lak ngei I lungrethei mi zong kan um ve I cheukhat cu lungrethei zia thiam lo in hnangam ngai zong an um ve (harnak le lungrethienak chung ah hnangam kho mi hi cu Pathian thlawchuah a si ve ko).

Mah UNHCR phih ding ti mi kong he pehtlaih in keimah pumpak ruah ning tein details tuk in cu a sau tuk lai caah tawi khawh chung in le sau nawn tein ka rak tial lai. Mah kong hi kan lungrethei awk a si maw tiah cun “Yes and No” tiah leh a hau lai tiah ka ruat.

No – zei ruang ah lungrethei tuk awk a si lo tiah cun UNHCR card/catlap a tlaih cang mi/ register a si cang mi hna caah cun UNHCR tu nih a lungrethei deuh ding mi a si I nang mah le kei mah nih lungrethei tuk in um ding a si lo. Mah hna vial te caah UNHCR nih rian a tuan ko lai natein ramthumnak ah kal ding can tha te hna a um ah cun kal zawkzawk ko u. kan chin mi chung in korea le Japan lei te hna kal a duh lo mi zong an tam pah ko rua. Kal zawkzawk khawh poh cu a tha deuh ko lai lo ma?

Yes – Lungre thei awk a si mi cu a phan thar mi hna ca tu hi lungrethei awk a si men lai tiah ka ruat. Zei caah tiah cun UN nih a chim tawn ve mi cu a hlan 2013 lio bantuk in minung tampi in card pek ti bantuk kha a cozah nih an kan sian ti lo tiah an rak chim tawn I a tu zong hi UN ruang ah an ram chung ah phung ning lo ramdang mi an tam chinchin tiah cozah lei nih an chim than.

Mah pawl ruang ah hin mithar lak nak lei hi donhkham tu a si kho men lai tiah ka ruat. Na tein UN zong cu bu sawhsawh a si ve lo i lam a kawl kho ko lai tiah ka zumh i lungrethei tuk ding thil ah cun ka ruat lem lo. Mah hi UNHCR a dirhmun lei in ka hmuh ning sisehlaw.

Cozah dirhmun lei kong he pehtlaih in zong cu chim ding tampi a um ko na tein an mah cozah an riantuan ning kan thei ve mi a si tik ah cun a biapi mi meeting ti bantuk long ah chim ah a tha. Si lo ah cun ka caah buainak a tam sual lai. Credit: James Bawi Thang Bik

Matupi Khua Thawngpang Cheukhat! Fiamcawnnak; Chin ramkulh, Matupi ah Covid-19 zawtnak ai thok than caah, Matupi ah ca a cawng liomi siangakchia hna cu sianginn kai tikah mask i huh hrimhrim dingin an ti hna pinah mask ai huh lomi cu sianginn ah luhnak nawl an pe hna lo tiah theih a si.

Khualtlawng Cazin Cheknak; “Nizaan October 6 ah SAC ralkap hna nih Matupi khua Laungban(လောင်ဗန်း) sang ah khualtlung cazin an kan check i SAC ralkap hna cu kan inn chung tiang an rak lut. Laungban sang hi thlakhat voikhat khualtlung cazin an kan check peng” tiah Laungban sang um mi pakhat nih a chim.

Khua Luhchuah Phihkhamnak; Matupi khuachung ah, SAC nih khua luh chuahnak gate an phih peng rih i, tlunkal a ngah lo, motor zong a chuak kho lo, cu caah thilman a kai tiah theih a si.

“Khua luh chuahnak gate cu an kham peng rih ko i zeitikdah an on te lai theih a si rih lo. A hlan i arti kan cawk mi reet in kan caw kho ti lo. Micheu cu a zuar hmanh an zuar ti lo i anmah ei ding caah an i chiah hna. Cawk duh zong ah cawk ding a um ti lo. Kan lung re lawng a thei ko” tiah Matupi khuami pakhat nih a chim.

CDF-Kanpetlet Ralkap Hna Ca Ah, Tanghra Sianginn An On Lai! Chin ramkulh, Kanpetlet peng ah, CDF-Kanpetlet ralkap hna nih fimnak an cawn khawhnak ding caah, Public Administration le Township Education hna i bawmin, sianginn an on lai tiah theih a si.

CDF-Kanpetlet ralkap hna fimnak an cawn khawh nak ding caah, a ra laimi October 10 in sianginn kan on cang lai. Hi sianginn onnak ahhin harnak tampi a um ko. Zeicatiah ca an cawnnak ding ah hrukeih, sehthilri, mei le ca a chimtu ding saya/mah zong an herh rih. A sinain a si khawh chungin kan i zuam ko lai tiah CDM sayamah pakhat nih a chim.

Kanpetlet peng ah, Public Administration le Township Education hna i bawm in an on dingmi sianginn cu tanghra kai dingmi ca lawng an on lai i, a kai dingmi siangakchia 400 hrawng an si lai tiah theih a si.

Pu Hei Vung (Vambai) Nih A Rak Chim Chungmi Cu Pakhat Hnu Pakhat In An Tling. A tanglei chim chung bia hna hi Thantlang peng Vambai khuami Pu Hei Vung nih a rak hmuhmi an si i Salen khuami Pu Sui Peng sinah a chinchiahtermi a si. Cucu Pu Sui Peng nih a facebook ah a tar i mizapi caah theiṭha a si kan ti caah kan lak chinmi a si. A biatlang le biafang tete kan remhmi a um.

Kum 1980, January-September thla 9 chung i thil a hung ummi chim chung bia tlangtar pa 4; (1) Chim chung bia a phuangtu: Pu Hei Vung (VamBai), (2) A chinchiahtermi: Pu SuiPeng (Salen), Cu thil a hung um ding mi chim chung bia pa (4) hna cu a tanglei ah a dotdot in kan van langhter lai.

(1) A tulio i cozah phaisa nan hman lengmang mi hi i khon duh hlah. Cun na ngeih cia a um sual a si le chawhring asiloah chawro caw. A tangka hrimhrim in i chiah hlah. hi tangka hi hman lo caan a ra lio. Kan dawt hna caah ka chimmi a si tiah a ti.

(2) A ka kuh pah in a kut a hna hram ah a tum i huihui hehe, huihui hehe! Zeitin e? Nan dam maw? Size, khoika in? America (US) in! Kan dam, kan dam. Nannih teh nan dam maw? Kan dam lio a si ve ko. Mah cucu a ra lio tiah a ka chimh ṭhan.

(3) Khuate kip ah hin meithei (or) ruapar in meithei a tlai lai i atu i meifar hi van lo caan a phan lai. (4) Kawlram hi a hung mui te lai i a muih tuk ahhin khuaruahar in a mui lai. Cu a muih ning cu khuadei lai muih he khin a tahchunh. Asinain a ceu zau ko lai a ti. Cutikah mi cu lunglawmhnak in an khat lai i minnung i ton i bia i ruahnak hmun paoh ah lunglawmhnak mittli a luang lai.

Cu lunglawmhnak mitthli cu tah uh an van ti i misifak mithli a luangmi a tam bik. Pahnihnak ah ngahṭah le nuhmei mitthli a luangmi a si. Cun Kawlram minung nih kan i lawmh te lainak le lunglawmhnak mittli he pehtlai in cunglei in hla fung (6) a sak i cucu tape chungah ka khumh.

CHIM CHUNG BIA A TLING TAKTAK MAW); (1) Hi phaisa (or) tangka hi hman lo caan a ra lio a timi cu 1986 le 1988 ah Ne Win nih tangka a thah. A thahmi tangka cu fang 15, fang 35, fang 75 le fang 90 ca hna an si. A tling taktak ko.
(2) Huihui Hehe. Zeitin? Nan dam hna maw? Khoika in? America (US) in.

Kan dam, kan dam. nannih teh nan dam maw? timi chimchung bia cu 1993 hrawng khan Malaysia kal aa thok i kum 2000 hrawng a phak cun ram hnihnak le ram thumnak in hello hello nan dam hna maw tiin duh chungin Phone kan i chon hna i a pehzulh thluahmah cang. Huihui Hehe, Hello hello ti zong a tling taktak ko.

(3) Khuate kip ah meithei a tlai lai i meifar van lo can a ra lio timi cu kum 2000 in a cunglei kan zoh tikah khuate kip ah meithei cu a tlai taktak i meifar cu kan vang ti hna lo. Hi zong hi a tling taktak ko.

(4) Kawlram a hung muite lai timi cu Min Aung Hlaing nih nawlngeihnak a lak khan kan ram cu khuadei lai muih he a tahchunh bang a hung tling taktak ṭhan ko. A ceu zau lai a timi hi thlarau bia a si caah hngalh khawh a har ngai ko.

Hi bantukin kan pa kan pu a simi Pu Hei Vung nih a chim chungmi bia pa (4) hna cu an dihlak in an tling ko cang. A ceu lai dingmi le lunglawmhnak mitthli a luan lai dingmi lawng a tang ko cang.
Kan ram ah ceunak tlung sehlaw lunglawmhnak mitthli luang cang ko seh!

CDF-Matupi He Kahdohnak A Chuah Hnu Matupi Khuachung Ah SAC Ralkap An Chuak Ngamlo. A luancia September 19, Matupi khuapawng ah SAC ralkap le CDF-Matupi kar kahdohnak a chuah hnu in kaphnih kar kahdohnak cu atu le tu a cang i SAC ralkap lei a thimi 10 hrawng an si lai tiah CDF-Matupi nih an thanh.

Kaphnih kar i kahdohnak a chuah hlan Matupi khuachung ah SAC ralkap atu le tu leng an chuak na in, kahdohnak a chuah hnu in nihin October 6 tiang ah SAC ralkap hna cu leng ah chuak ngam lo in an umnak sakhan chung ah timhcia tein an um i, cu hlan bantuk in leng zong ah an chuak tilo tiah Matupi khuami nih an chim.

SAC ralkap hna cu leng an chuah hmanh ah a phu le a bubu in an chuak tiah theih a si. SAC ralkap hna cu an sakhan chung lawng ah um in leng an chuah lonak kong he pehtlai in khuami pakhat nih cun “hriam aa tlaih lo mi mipi cu an kan kah thah ngam, an mah vial cu thih an ṭih taktak” tiah a chim. The Chin Post