Misoi Hmang Hlah!!!
—————————
Chinmi hi mah le mah Thlarau ngai in aa ruahmi hna chungin misoi a hmangmi zumtu cheukhat kan um caah a tanglei Baibal cawnpiaknak hin na nun tharchuah dingin kan sawm.
1.Jesuh nih Misoi A Duh Lo
Jesuh nih cun “Pathian nih an soi nakhnga lo Mi va soi hna hlah”( Matthai 7:1 ) a ti. Cun, midang kha va soi hna hlah u law nan nih zong Pathian nih an soi ve hna lai lo”(Luke 6:37) tiah kan hmuh rih.
2.Misoi Hmangmi Theipar:
a. Miriam nih Moses a sawi caah thinghmui hma nih a tlunh. (Number 12:9-10).
b. Misoi hmangmi cu Pathian nih meirul a cuk ter hna I tampi an thi(Number 21:5-6). “Cun mi hna nih cun Pathian le Moses kha an zainawh hna i, “Zeicaahdah ramlak i thih awkah hin Izipt ram in nan kan chuahpi? Zeitintiah rawl a um lo, ti a um lo i, hi rawl ṭhalo hi cu kan fih,” tiah an ti. Khi tikah Bawipa nih meirul kha mi lakah cun a thlah hna i mi kha an cuk hna caah Israel mi tampi an thi.
c. Number 16:1-3, “Korah, Dathan, Abiram, le Peleth i fapa On nih mi kha an pumh hna; Israel mi (250), mizapi hruaitu a simi hna mi minthang deuhdeuh hna moses an doh caah vawlei nih a ei hna.
d. II Siangpahrang 2:22-24 ahcun Hngakchia nih Pathian minung Elisha an nehsawh. “Lu kolh pa, hung kal tuah! Lu kolh pa, hung kal tuah,” tiah an hauh. Cun aa mer i a hmuh hna tikah Bawipa min in chiat a serh hna. Cun ramlak in vom a pi pahnih an ra chuak i pa ngakchia cu (42) an seh hna.
e. Misoi Hmangmi Thlacam A Let Lo: Anmah le anmah kha kan ṭha tiah aa ruat i midang vialte kha zeiah a rel lomi hna sinah Jesuh nih hi tahchunhnak bia hi a chim: “Mi pahnih cu Biakinn i thlacam awkah an hung kal; pakhat pa cu Farasi mi a si i a dang cu ngunkhuai khawltu a si. Farasi pa cu a dir i hi bantukin thla a cam: ‘Maw Pathian, kei cu midang bantukin hak a kaumi, lih a chimmi, nu le pa sualnak a tuahmi, ka si lo caah nangmah cu kan lawmh; cun khi ngunkhuai khawltupa bantuk zong khi ka si lo caah kan lawmh fawn. Zarh khat chungah voi hnih lengmang rawl ka ul i chawva ka hmuhmi vialte cheu hra cheu khat kan pek,’ tiah a ti. Sihmanhsehlaw ngunkhuai khawltupa cu lamhlatpi ah khin a dir i vanlei hmanh zoh ngam loin a ṭang aa cum i, ‘Maw Pathian, kei misual cungah hin zaangfahnak ngei ko,’ tiah a ti. Hihi kan chimh hna: Farasi mipa kha si loin hi pa tu hi a sualnak ngaihthiam in inn ah a ṭinmi cu a si. Zeicahtiah amah le amah aa ngantermi cu ṭhumh an si lai i mi tangah aa dormi cu mi ngan ah ser an si lai,”(Luke 18:9-14) tiah kan hmuh. Fiang tein langhter ka duhmi cu Jesuh nih misoi hmangmi lungput cu a cohlang lo.
Biadonghnak
Paul nih , “Zeizong ka hngal ve ko, tiin aa ruatmi pa nih hin a hngalh awk tlukin a hngal tawn lo”(I korin 8:2) a ti. Misoi hmangmi hi ka thei, ka ngal, midang nakin ka tha bik, ka dik bik ti lungput ngeimi an si. “Khrihfa tha” nunzia si lo. Paul nih a kan cawnpiakmi cu, “Pakhat le pakhat i entainak le mah pumpak thangṭhat kawlnak kha nan lakah umter hlah u. Toidornak lungthin tu kha ngei cio u law midang nakin ka ṭha deuh tiah zeitikhmanh ah vaa ruat hlah u.” (Filipi 2:3) tiah a ti. Zumtu tampi nih kan theih peng awk cu,“A tlinglomi “vawlei” ah a tlinglomi “minung” nih “tlinglo piin” kan i hruai ti hi theih peng kan herh cio”.
Pathian nih kan zapi caah thluachuahnak kan pek piak ko seh. By Rev.Sang Uk Cung(GS, CBA, Kalaymyo)
Leave a Reply