Midawh cu an zia a tha!

“Cu Hmun Cu” (Cover) Biak Hlei Par@ Biak Ku!
=========
Vaurawng hi ka ngai tuk loh. Voi 2 ka ngai le a voihninh ning tein hlasak thiam hna an hlasakmi nih ka lung an ka suk veve. Milla Hniang sakmi hla le music nih ka khuaruah a ka harter. Kha bantuk hla le music ka thei balloh Lai hla le music ah tiah ka tial bal. Tutan zong Biak Hlei Par (Biak Ku) sakmi “Cu Hmun Cu” ti hla nih ka lung a ka khehkhuai. Hitihin asi.

Thangzang khua kha vaurawng tlang aunak in CBCUSA timhtuahmi ralhriam cawknak ah $ pekchanhnak an tuah. Rian ka tuannak hmun i ka bih duakdak ve hna. Rian tuan pah kan ti cu theihmi zazat, theihlomi zazat asi. Ka tuannak hmun cu kan inn in nazi cheu motor mong asi. Rian kai lim i inn lei ah ka lawi. Ka lawi pah in ka phone cun Thangzang khua le vaurawng cu ka hei bih pah hna.

Motor mongh bu cun an bia cu ka ngai. Thangzang Ram Thawng nih $100 in Biak Ku kha “Cu Hmun Cu” timi hla sak ding in a request ti ka hun theih. Zeisuapau ruat lo khin lamchak lamthlang dum kaupipi kha ka hei zoh. Mirang ram dum cu zoh an dawh tuk cumu. Ka tuannak hmun le khuate asi hoi. Tlawmpal luklak ah lam ai tonnak ka phan. Mei a rak sen ngelcel. Traffic light nih a ka kham.

Biak Ku nihcun hla cu a hun sak. Chikhat cu ka lau. Aa, cu nu cu a thiam ko ee. Ahodah si hnga ka hun ti. Ka phone cu ka hun bih. A hla sullam nih le a tha tuk. A aw le a hla kha ai tlak kho tuk. A aw a khiing. A thir pah dedengmang bantuk. A biafang nih a kheh tuk hoi. A sullam ka hun ruah deuhdeuh, ka tui deuhdeuh. Hihi pei kan khua Ngun Te Pa (ka pa ngun te pa) nih hlasak thiam timi cu a awthir ai varh lai, a puam lai a timi bantuk pei asi ko lai hi ka ti.

A mui ka hun zoh. Ai dawh khawh ning. A biangki le a titvun zoh ah methei rau bantuk. Lai nu hmanh ah ka rel pah loh. Traffic light a red mi kha green ah ai thlen hmanh kha ka thei ti loh. A mui le a hla ka ruahnak ah. Ka hnu i a dirmi pakhat nih a motor horn in ” pawt, paw” tiah a ka tumh. Elaw, sorry ka ti le ka motor cu ka mongh. Ka vorhlei kut in ka motor ka mongh pah buin ka kehlei kut in screenshot ka tuah hngap. Inn ka phak ah Vaurawng host (Buanvengtu) Pu Van Kung Ling (Ka Pa Van) kha hi nu hi hodah si tiah viber in ka hei hal. Biak Hlei Par asi a ti.

Tuzan ah a hla kha ka download. Voi zakul deng ka ngaih. Hi hla sa ding hrimhrim ah hrinmi ko ka lawhter. A thiam ka ti tuk. Hla hi ka upa deuhdeuh, ka ngai deuhdeuh ve. A thawtnam ka theih chin lengmang ve. Hi hla nih hin cun ka lung a ka suk cikcek. Bia thatha nakin khuachel ahcun hla le music nih hin ka lung an thlen khawh deuh, an khehkhuai khawh deuh ti hi ka pom chin lengmang fawn.

Cu lio i a hla cang kai chingchiahmi cu, “Pakhat le khat doh ral um ti lonak hmun, harsat buainak chung in zalennak ram. Khat le khat thinlung hliam um ti lonak cu” Note: Midawh cu an zia a tha, Credit: Chan Khar

Be the first to comment

Leave a Reply

Your email address will not be published.


*