Min Aung Hlaing ai chuahsual ve men lai!

Min Aung Hlaing ai chuahsual ve men lai!
========
1941 ah Japan nih ngaihthlem in US ralkap naval base Pearl Harbor cu ral tuknak vanlawng 350 renglo hmang in a rak kah hna. Minung 2335 an rak thah hna pin ah US raltuknak vanlawng, tilawng le hriam tamtuk hringhran an rak hrawk piak hna i an hlawh a tling ngai ti khawh a si.

Sihmanhsehlaw, Japan cu a rak i chuahsual cikcek. Pearl Harbor cu kantei ti ah an rak i ruah nain 1945 ah cun Hiroshima le Nagasaki ah Japan mipi tinghnih hrawng an thih nak le Japan ral an sungh nak ah ai cang. Tutan MAH ralkapthalo hna nih KIO ngaihthlem in an kah mi hna hi an mah cu an i lunghmuih ngai ve ko lai.

An thawnnak, an raltuknak vanlawng le an thiamnak an langhter nak zong a si lai. Sihmanhsehlaw, an i kah sual ve te men lai. Dai te in le nuam te in a um lio ko mi Pearl Harbor kha Japan nih a va kah tik ah, mi cheu nih cun “A bawk mi pawpi a va hlauh a si” an ti phah.

Dai te le nuam te in puai a tuah mi Kachin cu rallokap nih a va thah ko hna. Hi nih hin an mah Kachin lawng a hlau hna lo kawlram tlang cung mi vial te, rawn miphun vialte, mipi ralkap vialte le mi sawhsawh vialte a hlauh dih hna. Cucaah caan tlawmpal ahcun MAH le a ralkap pawl an thih chin nak le an sungh nak ah ai cang te lai ti hi ruah khawh a si. Credit: Biak C Thawng

KIO Kum 62 Tlin Lawmhnak Ah SAC Nih Vanlawng In Bomb An Thlak, Hliamtuar Le A Thimi 30 Hrawng An Si. Kachin Independence Army (KIA), Brigade 9 hmunhma chung, Hpakanh ah Kachin Independence Organization (KIO) kum 62 tlin lawmhnak Oct 23 ah tuah a si i cu zaan 8:30pm hrawngah KIA Brigade 9 umnak A Nang Pa ah hlasaknak an tuah i SAC nih vanlawng pathum in bomb an thlak tiah theih a si.

A hmun a ummi pakhat nih “Jet Fighter pathum in an rak thlak. Thaizing ah tuah dingmi KIO ni caah hlasaknak kan tuah chung lioah an rak thlakmi a si. Hliamtuar le a thimi an tam” tiah a chim. Hliamtuar le a thimi 30 hrawng lakah Kachin miphun hlasak thiam Aurali cu hla a sak lioah bomb nih a khen i a hmun ah a thi colh. Cun Kachin lemcang thiam minthang Lahtaw Zau Ding zong fak ngai in hliam a tuar tiah theih a si.

Hliamtuarmi hna lakah KIA ralbawi cheukhat zong an i tel tiah Kachin News Group nih a ṭial. Hlasaknak an tuahnak hmun cu Hpakanh peng Ginsi khua in mengkhat hrawng a hlatnak ah a si tiah theih a si. Khit Thit Media nih cun hliamtuar le a thimi hi 50 hrawng an si tiah a ṭial.

Hpakant ah ralhraang bomb thlaknak in a thi mi ruak 80 hrawng an hmuh cang, hma faak a pu mi pawl thlop kho lo ding in ralhraang nih an hren peng rih hna. Hpakant peng, KIA Brigade-9 hmun ah Council ralhraang pawl nih vanlawng in bomb an thlak ruang ah nihin chun suimilaam 1:30 tiang ah mithi ruak 58 an hmuh hna i zaanlei sang tiang an kawl than hna tikah ruak 20 leng an hmuhchap hna; Atu tiang ruak an hmuh mi 80 hrawng a si cang tiah tualchung media hna sin in kan theih.

Hma a pu mi 100 leng cu i thlop kho lo dingin ralhraang nih tu zaan suimilaam 7:30 tiang an hren peng rih hna tiah theih a si. Hma a pu mi hna cu Hpakant le Myitkyina sii-inn pawl ah rianrang in thlop an herh nain Council ralhraang pawl nih Hpakant peng, Ginsi khua chuah Gate in hmapu mizaw pawl cu chuak kho lo in an kham ko rih hna tiah theih a si.

“Zinglei ah mi bawmchantu phu pawl nih an va ton hna nain an duh lo. Cucaah KBC in saya te nih cuka gate ahcun an va ton hna. An duh hoi lo caah an rak kir than. Tu zaan khua a muih tiang zeitin hmanh in an duh lo. Ginsi Gate in khatlei kam ah kal khawh a si lo bantuk in hika lei zong rat khawh a si lo. An phih peng rih ko,” tiah mi bawmchantu phu in mi pakhat nih KNG media ah a chim.

Hma pu mizaw pawl chanhchuah khawh nakding ah bawmchantu phu hna nih Hpakant khua chuah in chun nitlak an hngah hna nain luhnak nawl an pek hna lo caah an kir than tiah theih a si. Hpakant khua chung lei zong ah ralhraang council nih faakpi in mi chawklet an check hna tiah theih a si.

SAC Jet Fighter Nih Kachin Rammi Bomb A Thlakmi Hna Cungah Facebook Profile A Nakmi A Thlengtu Ralkap Siibawipa Ralkap Nih An Tlaih. Kachin ramkulh, Hpakan peng A Nang Pa khua ah SAC ralkap Jet Fighter nih bomb an thlak caah minung 80 hrawng an nunnak a liam i, 100 leng hliamhma an putmi cungah Naypyitaw ihkhun 300 sii-inn ah rian a ṭuan liomi SAC ralkap siibawi Major Dr. Kyaw Phone Myint cu a facebook profile ah a nakmi aa tar ruangah SAC ralkap nih nihin October 25 zinglei ah an tlaih, tiah theih a si.

October 23 zan ah KIO kum 62 tlin ni an don zan ah hlasak thiam hna nih ring awn le aw-zai in mizapi an lawmupi hna lioah SAC Jet Fighter nih bomb an thlak hna caah minung 80 hrawng an nunnak a liammi cungah SAC ralkap siibawi Major Dr. Kyaw Phung Myint nih a nakmi profile aa tarnak hi a si. Amah hrimhrim zong nih minung tam tuk an thih caah a nakmi profile kaa tarnak a si, tiah comment ah a ṭial.

“Naypyitaw sii-inn ihkhun 300 ah rian a ṭuan liomi Major Kyaw Phung Myint cu a facebook profile ah a nakmi aa tar caah ralkap nih an tlaihnak a si. Dalan a si lai ti an zumh caah SAC kuttang rianṭuantu lobby hna nih cun thah ding tiang in khua an khang,” tiah Khit Thit Media nih cun an langhter.

SAC Ralkap Tei Khawh Nakding Ca ah Shan Ramkulh Thlanglei Ah Hriamtlai Phu An I Fonh. Hranhram uknak rang deuh in tei khawhnak ding ca ah Shan ramkulh thlang ah hriamtlai phu an i fonh tiah theih a si. Shan ramkulh, thlanglei ah hriam a tlai liomi Force 36 Ranger၊Joe Phyu Guerillas Force၊YE-NGAN Urban Guerillas၊Urban Task Force- Aung Ban le Red Ants Guerillas Force hna cu kan i fonh cang, tiah nizan October 24 ah cathanh an chuah tiah theih a si.

Shan ramkulh, thlanglei ah hriamtlai phu a simi Local PDF le UG phu hna cu hmun khat ah an i ton hnuah atu bantukin an i fonh hi a si, tiah theih a si. An cathanh chungah hmun khat ah kan i fonh ahcun kan ṭhawng deuh lai, cun khat le khat raltuknak ah kan i bawm kho lai i, kan ral kan tei zau lai, tiah an langhter.

“Hranhram uknak rang deuh in kan tei khawhnak ding ahcun lung rual tein hmun khat ah kan ṭanṭi i kan doh a herh. Nang le kei tinak um loin awkhat in kan kal ahcun dohthlennak hi a tawi deuh suaumau ko lai,” tiah Shan ramkulh, thlanglei hriamtlai phu fonh in ṭuanvo ngeitu nih a chim.

SAC Ralkap Nih Kachin Mi, Lemcang Thiam, Hlasak Thiam Hna Le KIA Ralbawi/ Ralkap Hna An Nunnak A Liammi Cungah CJDC Nih Cathanh An Chuah. October 23 zan sml 8:30 hrawngah Kachin ramkulh, Hpakan peng Anantda(အနန့်ဒါ) khua ah tuahmi kum 62 nak Kachin Independence Organization (KIO) ni sunglawi donnak ah Kachin hlasak thiammi hna nih mizapi cu an nuamhpi(ဖျော်ဖြေ) hna lioah SAC ralkap Jet Fighter in bomb an thlakhnawh hna caah tualchung mi, Kachin hlasak thiam, lemcang thiam hna le, KIA ralbawi/ralkap an dihlak 70 hrawng an nunnak a liam i, 100 hrawng hliamhma an pu, ti thawng kan theih cu kan ngaih a chia tuk ve, tiah CJDC nih cathanh an chuah tiah theih a si.

Ralhrang SAC nih hriamnam i bochan in, ram chungmi inn le lo an hrawh, an khangh, thilri an fir, tualchung mi an thah hna pinah biakinn zong an khangh caah sualnak ṭha lo tam tuk an tuah, tiah an langhteter chih.

Ralhrang SAC nih mizapi cu timh ciammam tein an kahdoh hna pinah miphun cihmih timh in sualnak an tuahmi hi kan cohlang kho hrimhrim lo, fak piin kan doh. CJDC nih a herh ning in teirul chamnak kan tuah lai, tiah cathanh an chuah tiah theih a si. Credit: The Chin Post