Min Aung Hlaing nih zungzal uk awk ah aa ngeihmi simankin!

MAH Nih A Pennak Hmun Zungzal Awk Ah Aa Ngeih Mi Simankin Pathum (Part 4)
=====
Chansau Ukpennak Lamthluan Dothnihnak (a); PR thimhnak Mumal le Dundan cu Tlangcungmi nih an zumh I, 2023 thimhnak ah an lut ahcun, Tamada ka si lai ti hi MAH saduhthah cu asi bik. Sihmansehlaw, PR mumal lawngin Tlangcungmi an lung si lo ti kha MAH nih a hngalh caah, Ramkhel lamthluan pakhat le phundang deuh in an kan lemsoi ṭhan.

PR mumal in cun Tlangcungmi duh mi, Kum 75 leng Ramkhelh hnawh mi le Hriamtlaih hnawh mi Federal asi khawh lai lo tiah Tlangcungmi nih kan ti caah asi. PR mumal cu 2008 phunghrampi tang ah tuahmi asi caah Federal asi khawh lo. Federal nan ti hmanh ah adeu asi lai. Tlangcungmi duhmi Federal phun asi lo tiah Tlangcungmi nih authawng cu MAH hnakhaw ah a lut ve.

2008 phunghrampi aum chung cu Mah tein Khuakhan Lairelnak le Tlukruannak a chuah pi mi Federal (Za Uk Pennak) asi khawh lo, Cucaah 2008 phung Hrampi cu Cihmih/ thah a herh tiah Tlangcungmi authawng cu asi. Tlangcungmi Hruaitu hna nih an ti ve mi cu 2008 phunghrampi remh Asiloah a thar in ṭial ti kha asi.

NCA kum 7th Tlinnak Puai ah MAH nih 2008 phunghrampi remh a herh nak cu sau ial tein a chimh. Phunghrampi remh nak kong hi saupi a chimh ballomi MAH asi. DASSK a hnahchuah caah le uknak chut an kan duh caah, Maymyo Military Academy ah Phunghrampi remh awk asi tiah tawi tein a rak ti bal. Cucu remh a duh caah siloin NLD le DASSK sin in uknak chut a duh caah asi. 2008 Phunghrampi remhnak kong ah MAH nih a chimh mi cu:

Tlangcungmi nih nan hal mi le nan duhmi chung in, asi awk le tuah awk a herh mi hna hlawhtlinnak caah, cheukhat Upadi cu kan remh hrimhrim a herh a ti. Kan remh aw Upadi hna cu Tlangcungmi hal mi le duhmi ansi awk asi tiah a ti. A duh nak cu Pohma 261 (Pine Vuancichuk – PM – Prime Minister Mah tein thim khawh nak) cu NLD le DASSK nih remh piak an duh hna lo, Keimah MAH nih kan remh piak hna lai caah, 2023 thimhnak ah lut ve uh tiah an kan lemsoi nak asi. Pohma 261 remh kha Federal a ruah mi MAH le Rallokap an si rua, apoi ngaingai.

Tlangcungmi Palai an tambik nak hi Amyotha Hlutdaw asi. Tlangcung Palai hna nih Amyotha Hlutdaw ah an chuahpi nih Bia cu Pyithuh Hlutdaw nih an duh lo ahcun, a rawk tawn. A chan cu Amyotha Hlutdaw cu Ramkulh le Ram ṭhen nih 12 cio in thlah mi Palai an si. Rallokap 25% an um ve. Pyithuh Hlutdaw cu Pengkulh in thlah mi Palai an si caah, Kawl miphun an tam deuh. Tlangcungmi Mi Palai hi Pyithuh Hlutdaw ah an tlawm ngaingai.

Aruang cu Tlangcung mi cu Pengkulh tlawm te lawng kan ngeih caah asi. Amyotha le Pyithuh Hlutdaw fonh in Pyidaungsu Hlutdaw ti asi. Fainternak: Part 1- Part10 asilai. Rel rak i zuam ve. Part 10 a dih in Email in PDF in kuat khawh na si. Ka sian ko Man lo tein.

MAH Nih A Pennak Hmun Zungzal Awk Ah Aa Ngeih Mi Simankin Pathum (Part 3); Chansau Ukpennak Lamthluan Dotkhatnak, Uknak an lak in Roadmap in kan kal lai tiah MAH nih MRTV ah a thanh. News kip le social media, Journal kip ah an thanh lengmang. TV le biachimhnak poah ah MAH nih a chimh lengmang caah mipi caah thilthar le thil poimawh an si ti lo. Sihmansehlaw, Rallokap Lamthluan 5 chungah, 1nk ah a um mi biafang le MAH nih an tuah mi hi aa khat maw tiah zoh tuah usih.

Rampi Thimhnak Commission a thar in kan tuah lai, Vote (Mee) cazin fel tein kan check lai, tbk tuah awk le tuah a herh mi vialte cu Upadi ning in, kan tuah lai tiah MAH nih a ti. Tuah awk le tuah a herh mi vialte tiah bia hlei a chimh mi aum. Vote cazin check hnu ah tuah awk a ti mi bia kha, thimhnak ah PR mumal hman ding asi ti kha tu lawng ah puut tiah a hung pawt. Tuah awk le tuah a herh mi timi MAH bia hi?

Rallokap nih uknak tlaih zungzal kha 2008 phunghrampi muru cu asi. Cozah asi ding mi cu a tlawm bik vote (51%) a hmuh a herh. Mipi thimh lomi Rallokap kusale (Palai) 25% le Rallokap Party USDP le an hawikom Party rual hna Palai 26% fonh ahcun 51% a tling. Bullet Hla Shwe nih a chim lengmang mi kha hi hi asi.

Cucu 2020 thimhnak ah USDP nih a hlawhtlin ter khawh lo caah, 1 February 2021 ah MAH nih uknak an kan chut hi asi. USDP Party Hotu u Than Htay cu an phuah I, Lainawng pa Khin Zi an kai ter.
Khin Zi cu Thang Sui nakin a laar deuh mi Khin Nyunt tlaihtu pa kha asi. Mithah Lainawng Rallokap Bawi rual le Palik bawi rual nih Lainawng pa tiah an ṭih ngai mi pa Khin Zi asi.

2020 thimhnak ah Rallokap nih Cozah si zungzal timi chunmang a rawk caah First Past The Post – FPTP “မဲများသူနိုင်” timi mumal le dundan kha PR ah thlen lo ahcun asi khawh ti lo. PR mumal thlen lawng ah Rallokap nih Cozah le uktu an si zungzal lai. Rallokap Palai 25% le USDP Palai 26% fonh in Kawlram uk zungzal dih ah MAH nih PR mumal hman hi a duh mi asi. PR Mumal ahcun Party pakhat nih TEI Khawh asi ti lo. Hawikom Party le Palai a herh.

2023 thimhnak ah NLD lut sehlaw, Cozah an tlin khawh ti lailo. Tlangcungmi cu PR in cozah nan siam khawh ve, Hlutdaw ah tampi nan phan lai I, nan duh mi Upadi, Federal Mumal le federal Phunghrampi nan suai khawh lai tiah MAH nih a hlen hna. A duh nak cu Tlangcungmi zawnruah nak le Federal caah asilo. USDP nih 26% hmuh sehlaw Rallokap Palai he fonh in Rallokap nih zungzal uk kha MAH le SAC hmuitinh cu asi. USDP nih 26% a hmuh khawh lo ahcun Hawikom Party sawm an herh.

Cucaah Tlangcungmi Party le hruaitu cu nan duh mi kan pek hna lai tiah PEACE a tuah pi hna. Federal kan pek hna lai a ti riangmang I, 261 kan remh piak mi hna hi Federal cu asi tiah a ti diam hna. NLD nih Tlangcung Party sawm in Cozah dir khawh asi ve ko nain, NLD hlan ah Rallokap nih a lem hmasa hna. Zeitintiah, NLD nih Tlangcungmi hnu a chit I, Rallokap he Reconciliation Mumal in Rallokap he a kawp kha MAH le SAC nih fiang tein an hngalh.

Cuticun 2023 thimhnak a dih hnu ah MAH nih Tamada/ State Chancellor asi lai. MAH nih a ṭuan zuam lo hnu ah Rallokap nih an thlah mi/ an duhmi pa nih Tamada asi zungzal lai. Cucu ruahchan nak he PR mumal hi MAH nih ka hman lai a ti nak asi. Tlangcungmi Federal caah asi hrim lo. Fainternak: Part 1- Part10 asilai. Rel rak i zuam ve. Part 10 a dih in Email in PDF in kuat khawh na si. Ka sian ko Man lo tein. Credit: Jpseph R. Thang

Be the first to comment

Leave a Reply

Your email address will not be published.


*