Min Aung Hlaing Ralhrang nih Daw San Aung Suu Kyi an chiahnak an chimmi cu zaangfahtuk a si!

Daw San Aung Suu Kyi An Kharkhumhnak Hmun Theih A Si Cang
========
Daw Aung San Suu Kyi cu Nay Pyi Daw Prison (thonginn) ah a um mi pee 15 hrawng a kau mi inn pakhat ah SAC ralhrang nih an kharkhumh tiah theih a si. Nai hrawngah thawngpang a leng mi Daw Aung San Suu Kyi an kharkhumh an timi inn ah um loin mah inn fate ah an kharkhumh tiah theih a si ii mah kaa ah cun a mah lawngin an chiah ii thonginn zulhphung ningin a mah lawngin an chiah ko tiah theih a si.

Daw Aung San Suu Kyi, SAC ralhrang nih an kharkhumhnak hmun cu Nay Pyi Daw thonginn, nu pawl chiahnak thonginn in chak lei ah a sii ii mah kaa hmun cu Daw Suu kharkhumhnak caah SAC rlhrang nih an sak thar mi a si tiah theih a si ii a kau hi pee 10×15 (Pee 15 hrawnghrang) RC phun bantuk thonginn a si nak kong,

Mah SAC ralhrang nih Daw Daung San Suu Kyi an kharkhumhnak thonginn cu thiar le thling in an kharkhumh kulh dih tiah theih a si. Mah RC phun bantuk a si mi thonginn cu SAC ralhrang Min Aung Hliang nawl peeknak thongin Pyi Htay Yi vuanci nih a ran khawh chungin a sak ter mi hna a si tiah theih a si.

Mah an kharkhumhnak ah cun Daw Aung San Suu Kyi a ngan damnak zohkhenh dingah nu pakhat an chiah piak tiah theih a si ii a ngan damnak hnga ding caah ni fatiin zohkhenh dingah doctor pakhat an chiah piak ti zongin theih a si. Hmanthlak chung ii a senin kulhmi khi Daw aung San Suu Kyi an chiahnak cu a si.

PawngTae Ah Pa pakhat Tlanglawng Nih A Rial Caah A Nunnak Liam!: Pago ramṭhen nitlaklei PawngTae(ပေါင်းတည်) peng Yangon – Pyi tlanglawng lampi ah June 23 zinglei suimilam 9:00 hrawng ah pa pakhat cu tlanglawng nih a rial caah a nunnak liam, tiah theih a si. Tlanglawng rialnak in nunnak liammi cu PawngṬae (ပေါင်းတည်) peng Kyawngdaw (ကျောင်းတော်) khuakomh GyiMaNoe(ကျီးမနို) khua ah ummi U Ye Htun, kum 67 a si, tiah tualchung mi nih an chim.

“A chungkhar nih an chimning ah cun, a mah hi thluak lei zawtnak a ngeimi a si tiah an chim. A ruak cu SaeṬaNa (စေတနာ) mibawmchantu phu nih an kalpi. Tlanglawng nih a rialning ah hin a paw in rialdawh a si,” tiah tualchung mi pakhat nih a chim. KyawngKung(ကျောင်းကုန်း) khua le TaPayKung(သပြေကုန်း) khua kar mengtung no.127/4 pawng Pyi in Yangon lei ah a kalmi tlanglawng nih U Ye Htun cu a rial tiah theih a si. A ruak cu PawngȚae(ပေါင်းတည်) siizung ah an kuat, tiah theih a si.

Salingyi, TungKyae Khua Ah SAC Ralkap Kut In Tualchung Mi Zeimawzat Nunnak A Liam!: Sagaing ramṭhen, Salingyi(ဆားလင်းကြီး), TungKyae(တုံကျေး) khua ah SAC ralkap nih khuami 30 leng an tlaih hna i, an hrem hna ruangah nunnak a liammi zong an um, tiah tualchung mi nih Yangon Khit Thit Media ah an chim.

Nizaan June 23, zinglei suimilam 11:00 luan hrawng ah Monywa nitlaklei ah SAC ralkap motor 5 leng in minung thazaang 100 leng hrawng an phan. SAC ralkap hna cu KhantShweHlae(ခန့် ရွှေလှေ), TungKyae(တုံကျေး) khua lei ah ke in rallam an sial i chunhnu suimilam 12:30 hrawng ah hriamngan an thlah. SAC ralkap hriamngan thlahmi cu TungKyae(တုံကျေး) khuachung U Chit Tin inn ah a tlak caah cu inn cu a kaang tiah theih a si. SAC ralkap nih an duhnak hmunpoh ah meithal an thlah caah tualchung mi minung 5 hliamhma an tuar i, nunnak a liam mi zong a um, tiah theih a si.

“SAC ralkap hna cu meithal i puahpah in khuachung ah an lut i, tualchung mi Mawng Wai Yan telh in minung 5 cu kuan hliamhma an pu. Nunnak liammi hna min belte fiangin theih a si rih lo. AlayTaw (အလယ် တော) le HtanTawGyi (ထန်းတောကြီး) khua karlak zong ah SAC ralkap nih mi pakhat an thah i, TungKyae ah pakhat, Poah khua ah pakhat tiin SAC ralkap nih an kahthah hna,” tiah tualchung mi pakhat nih a chim.

Cun June 23, zaanlei suimilam 3:00 ah TungKyae (တုံကျေး) khuami minung 30 leng cu SAC ralkap nih tlaih in an hrem hna. Khuachung mizapi umnak inn chung ah lut in, thilri man ngei deuh hna cu an fir, tiah theih a si. Sagaing ramṭhen, Kani peng, Kyauklunggyi PDF (ကြောက်လုံးကြီး) batallion 2 in ralkap pakhat cu bomb puah sualnak in a nunnak a liam, tiah theih a si.

Bomb puah sual ruang i a thi mi cu kum 27 a si mi Naing Lin Htun(နိုင်လင်းထွန်း) a si i, June 23 zinglei ah Alaykyon (အလယ်ကျွန်း) khua in aa thawh ding mi pyosawtee pawl dohnak caah tiin bomb a hmanh lio ah a puak sual, tiah KLG rianngeitu sin in theih a si. Naing Lin Htun(နိုင်လင်းထွန်း) nih cun a fale 2 le a nupi a kaltak hna. Nizaan ah a ruak an vui colh, tiah theih a si.

Kyaiklat Peng Ah Rammi Sinak A Ngei Lo Mi Minung 28 Tlaih An Si!: Ayeyawady ramṭhen, Kyaiklat(ကျိုက်လတ်) peng Kanginkine(ကညင်ကိုင်း) khuakomh Waisun)ဝဲစွန်း) khua pawng tiva kam ah lawng aa cit mi, ram mi sinak ngei lo minung 28 cu June 21ah khan tlaih an si i, an konglam dothlat cuahmah lio a si tiah theih a si.

”Tlaih a tong mi minung 28 hna cu pa 17 le nu 11 an si. Anmah a thlahtu lawng khaltu 3 cu an zaam tiah theih a si,” tiah mit hmutu pakhat nih a chim. Cu kong he pehtlai in palek he aa naihniam mi pakhat nih, “Minung 28 cu Waisun khua pawng ah an tlaih hna i palek sakhan ah an zohfel hna lio a si. Phunghram he aa tlak ning in hmalak an si lai,” tiah a chim. Tlaih a tong mi chung ah hin kum no tete zong an i tel tiah theih a si.

A luancia May 27 zong ah khan Yegyi(ရေကြည်) peng Yenanhtha(ရေနံသာ) checkgate ah ram mi sinak ngei lo mi minung 104 an rak tlaih bal cang hna i, cu chung ah minung 53 cu palek nih taza an cuai hna. Yegyi peng biaceih zung nih kum 2 cio thong tla ding in bia a ceihpiak hna tiah theih a si.

Be the first to comment

Leave a Reply

Your email address will not be published.


*