Min Aung Hlaing ralhrang nih mipi hna cung ah tinhchih in kahdohnak a tuahmi kong!

Min Aung Hlaing ralhrang nih mipi hna cung ah tinhchih in kahdohnak a tuahmi kong!
=========
Rakhine Ramkulh Thla Hnih Chung Ah Tualchung Mi 26 Nak Tlawmlo Nunnak Liam, 116 Nih Hliamhma An Tuar. Rakhine ramkulh chung kahdohnak a fah ruang ah SAC ralkap nih mipi hna cung ah tinhchih in kahdohnak a tuah i September 20 in November 20 tiang thla hnih chung ah Rakhine mipi minung 26 nak tlawnlo an nunnak a liam i, minung 116 nih hliamhma an tuar tiah AA in chim phuannak nawl ngeitu Khine Tu Khah nih a chim.

Kahdohnak chung ah cun SAC ralkap nih Rakhine mipi cawlcanghnak a tuahtu hna, fim cawnnak zung rianṭuantu hna, penguk zung rianṭuantu hna le tualchung mi hna cu AA he pehtlaihnak nan ngei tiah an puh hna caah an ral hna i tlaihkhihnak an tuah hna.

Rakhine mipi tlaihkhih a tongmi 324 chung ah minung 85 cu SAC ralkap nih an thlah ṭhan hna na in, 239 cu an hren rih hna tiah AA in chim phuannak nawl ngeitu nih a chim chih tiah theih a si. Rakhine ramkulh le Paletwa hmunram ah kahdohnak a chuah ṭhan hnu in ralzaam dirhmun a phanmi sing khat leng an phan tiah theih a si.

Thanmoe Taung Sakhan Kahdohnak Ah SAC Ralkap 15 An Thi, Tualchung Mi Pakhat A Nunnak A Liam Hleiah Pahnih Hliamhma An Pu! Karen ramkulh, Thantaungkyi(သံတောင်ကြီး) peng Thantaung chaklei Taungngu(တောင်ငူ)- Thantaung motor lampi cung ummi Thanmoe Taung SAC ralkap sakhan ah kahdohnak a chuak.

SAC ralkap 15 an thih caah vanlawng hmang in kahdohnak an tuah i, tualchung mi pakhat a nunnak a liam hleiah pahnih hliamhma an pu, tiah theih a si. November 26 zing sml 6:30 hrawngah Thantaung Division 3 le Taungngu PDF Battalion 3501 Division 3, le 4 nih Thanmoe Taung um SAC ralkap sakhan kan kah, tiah Pago ramṭhen PDF in ṭuanvo ngeitu nih a chim.

“SAC ralkap sakhan hi khua he ai naih ngaingai. An sakhan chungah ralkap 15 hrawng lawng an um. Cuka sakhan a ummi SAC ralkap 15 cu kan thah dih hna. An sakhan kan lak hnik lioah vanlawng hmang in bomb an thlak caah hnu kan kir. Kanmah lei in a thimi le ai hliammi kan um lo, tiah a chim chap.

PDF ṭangṭi phu nih atu bantuk in SAC ralkap sakhan kan kah hi a voikhatnak a si, tiah Pago ramṭhen PDF in ṭuanvo ngeitu nih cun a chim.

SAC ralkap nih Jet Fighter hmang in bomb an thlak caah Thanmoe Taung khua ah a tlawngmi May Lay cu bomb kuan nih a khen caah a nunnak a liam. Pa pahnih zong hliamhma an pu, cun bomb kuan nih inn cheukhat zong a khen hna, tiah theih a si.

Rakhine Ramkukh Kyauktaw Peng Ah Chungkhar Minung 6 Le An Zuatmi Uico Ruah Lo Piin An Nunnak A Liam. Rakhine ramkulh, Kyauktaw(ကျောက်တော်) peng Thet Htin(သက်ထင်) khua ah chungkhar minung 6 le an zuatmi uico hna cu ruah lo piin an nunnak a liam, tiah tualchung mi hna nih an chim.

Rakhine ramkulh, Kyauktaw peng Thet Htin khua ah Myo miphun Thaw Kyia Aung telh in chungkhar minung 6 cu November 26 ah ruah lo piin an zawt caah Way Kyi Daungh (ဝဲကြီးထောင့်) sii-inn ah an kalpi hna nain nihin November 28 zinglei ah an dihlak in an nunnak a liam, tiah theih a si.

An nunnak a liammi hna cu U Thaw Kyia Aung(kum 54) le a nupi Khine Than Nu(kum 54), an fanu u pa bik San Dar Win(kum 25), an fanu a lai Soe Than(kum 23), an fapa Kyaw Ngein Htun(kum 13), le an pi kum 70 an si, tiah theih a si. “A nunnak a liammi Soe Than hi thla 8 ngakchia pa pakhat a ngeimi a si i, a vapa cu Kachin ram Hpakant ah pum pawcawmnak ca ah rian a ṭuanmi a si.

An fapa cu inn pawngkam um mi hna nih an zohpiak,” tiah a chim chap. Zei ruang ah dah an nunnak a liam timi kong tucu siibawi te nih a phi an chuah kho rih lo. An ruak vui ding kong tu ahcun tualchung mi hna nih an tawlrel cuahmah, tiah theih a si.

SAC Nih Tuluk Ser FTC 2000 G Fighter An Cawk I Namsan Khua A Phanhnak Kong Thawngpang A Len Caah Ṭuanvo Ngeitu Checkhlatnak An Tuah Hna. SAC nih Tuluk ser FTC 2000 G Fighter 6 an cawk i Namsan vanlawng headquarters a phanhnak kong cu, Khit Thit Media nih a luancia November 22 ah an rak langhter. Cuti thawngpang a len ruangah vanlawng lei ṭuanvo ngeitu hna cu SAC nih checkhlatnak an tuah hna, tiah theih a si.

“Namsan vanlawng tual ah Fighter 6 a phanhnak kong thawngpang a len ruangah Min Aung Hlaing a umnak zung nih Namsan vanlawng headquarters uktu pa cu an sik, cu caah headquarters uktu pa nih vanlawng lei ṭuanvo ngeitu hna cu checkhlatnak a tuah chin ve hna pinah an phone zong a checkpiak dih hna,” tiah SAC ralkap vanlawng lei rianṭuantu hna sinin theih a si.

SAC nih Tuluk ser FTC 2000 G Fighter 6 an cawkmi cu atu le atu training an tuah i a ra laimi December 15 SAC vanlei ralkap hna nih an tuahmi puai ah hmuksaknak an tuah te lai, tiah theih a si. Mi ram dang he Kai tu la ti ruam in Jet fighter le Miakpi lawng hi a caw le Jet Fighter le Miakpi nih teinak chuahpi lo e chuahpi sehlaw Vietnam ral ah US a mualpho hnga loh US pi hmanh a mual rak pho khah.

Myaungmya Hluttaw Palai U Wai Lin Aung Cu Kum 26 Thongthlak Ding In Biakhiahnak An Tuahpiak. A luancia kum 2021, December thla lio Kayin ramkulh Laykaekaw Myotit ah tlaihkhih a rak tongmi Myaungmya pyituh hluttaw palai U Wai Lin Aung cu Myawaddy pengkomh biaceihzung nih kum 26 thongthlak ding in nihin November 28 ah biakhiahnak an tuahpiak tiah theih a si.

U Wai Lin Aung cu SAC ralkap nih a luancia 2021, December 14 ah Laykaekaw Myotit ah an rak tlaih i, poh-mah 52(a), 50(a), 50(j) le poh-mah 122 tiin tazacuai a tongmi a si. Pyituh Hluttaw palai si mi U Wai Lin Aung cu tlaihkhih a ton kum khat a rauh hnu ah a tu bantuk in kum 26 thong thlak ding in biakhiahnak an tuahpiak hi a si.

U Wai Lin Aung cu hluttaw palai a si hlan ah Myaungmya Ga-yu-na-shin(ကရုဏာရှင်) mi bawmhchanhnak phu dirhtu a si i, 2020 thimnak lio ah NLD palai in pyituh hluttaw palai a tlingmi a si.

Taze Peng Ah SAC Ralkap Nih Tualchung Mi Inn An Khangh Caah Inn 150 Hrawng A Ciam. Sagaing ramṭhen, Taze peng chaklei ah a ummi Htanpin Seih(ထန်းပင်ဆိပ်) khua ah SAC ralkap hna cu nizan November 27 chun ah rallam an sial i voithum tiang inn an khangh, tiah theih a si.

Htanpin Seih khua cu SAC ralkap nih atu le atu an pal tawnnak khua a si i a hlan zong ah voihnih tiang an rak khangh bal cang. Atu a voithumnak an khangh caah a khua ning in a ciam ti tluk a si ko, tiah tualchung mi hna nih an chim.

“A voithumnak an khanghmi ah hin inn tam tuk a ciam. Va phalh kan duh ko nain SAC ralkap le pyusawhti an um caah kan kal ngam lo. Pyusawhti hi tualchung mi lawngte an si i anmah nih SAC ralkap pawl cu lam an hmuhsak hna,” tiah tualchung mi pakhat nih a chim.

SAC ralkap nih Htanpin Seih khua cu a voithumnak an khangh caah inn 150 hrawng a ciam kho, tiah tualchung mi hna sinin theih a si. Ralhrial bawmchantu pakhat nih,” Htanpin Seih khuami hna cu ralhrial in a himnak hmun ah an i dor. An khua ah an kir ngam rih hna lo. Umnak hmun serisiam piak an hau lai,” tiah a chim.

ZinKyaik Khua Ah Uihrut Nih Ngakchia 10 Telh In Minung 11 A Seh Hna. Mon ramkulh, Zinkyaik(ဇင်းကျိုက်) khua Falat sang ah uihrut nih ngakchia 10 telh in minung 11 a seh hna caah hliamhma an pu, tiah theih a si. November 27 zing sml 9:00 hrawngah Falat sang um Kong Htauk(ကုန်ထုတ်) hlei pawng ummi uihrut pakhat nih lam ah ai chawkmi le ngakchia 10 telh in minung 11 a seh hna, tiah tualchung mi hna sinin theih a si.

“Uihrut nih ngakchia nu a hmai ah a seh dih hnuah a zam i inn chungah a ummi zong a va seh hna. Bazar zong ah a va lut i mi a seh hna pinah Khalauk Ing(ခလောက်အင်း) sang a ummi pakhat zong a seh,” tiah tualchung mi pakhat nih a chim.

Uihrut nih ngakchia 10 le upa pakhat a seh hna i an hmai, an ke le an baan ah a seh hna, tiah theih a si. A luancia September 11 lio zong ah Paung peng Pankone khua in Zinkyaik khua lei ah a zammi uihrut pakhat nih, ai chawkmi le inn chungah a ummi minung 20 leng a rak seh bal cang hna, tiah theih a si. Credit: The Chin Post