Min Aung Hlaing Ralhrang nih sualnak ngei lo mipi 2,689 a thah hna, thih ding in biakhiah mi 142 an um!

SAC nih sualnak ngei lo mipi 2,689 a thah hna, thih ding in biakhiah mi 142 an um!
=======
Myanmar ram ah hramhram in uknak lak a si hnu kum 2 deng chungah SAC ralkap nih sualnak ngei lo mipi 2,689 a thah cang hna i a tlaih/hren mi minung 16,787 tiang an um cang tiah Assistance Association for Political Prisoners (AAPP) nih a thanh.

Atu cazin hi 2021 February 1 in 2023 January 2 tiang AAPP nih a khawmhsuatmi a si i khawmhsuat khawhmi lengah a thimi an tampi rih lai tiah a langhter. Pau Dothlennak chung tuni tiang ah minung 13,300 an tlaih cang hna i cu chungah minung 1,940 cu thawngthlak ding in biakhiah an si.

Dothlennak he pehtlai in an tlaih/hren hna i thah ding tiah bia an khiah mi 100 an um i hriawh in thah ding tiah biak an khiah mi 42 telh in minung 121 cu hriawh in thah ding tiah biakhiah an si caah thah ding tiah biakhiah a simi an zapi te 139 an si cang. Atutiang ah biakamnak he thlah ṭhan a simi 24 an um i an thlah ṭhan cang mi hna 3,464 an si tiah a langhter.

Mandalay ah PDF 16 an tlaih hna; Mandalay ah Mandalay Young Force (MYF) chungtel le Wetlet PDF chungtel minung 16 cu December 31 ah an tlaih hna tiah theih a si. An tlaih mi hna hi bia an hal lio hna a si tiah MYF he aa naihniam mi nih RFA ah a chim.

SAC nih a chuah mi New Light of Myanmar thawngzamh ahcun December 31 zaanlei ah MYF chungtel pawl, Wetlet PDF chungtel pawl le phungki pakhat kan tlaih hna tiah a langhter. Khuachung ah a cawlcang mi dothlennak phu pawl atu bantuk in an tlaih hna hi thawng an pek caah a si tiah 96 Soldier PDF hruaitu Ko Zeya Lwin nih a chim.

An tlaih mi hna hi pa 14 le nu 2 an si i kum 18 le kum 20 zong an i tel. PVC pipe in tuah mi bomrap lung 11, plastic bu in tuah mi bomrap lung 4, hri dawh mi Grenade 2 he kan tlaih hna tiah SAC nih a langhter.

2022 chung Thai ram ah Myanmar rammi 46,000 leng phungning lo in luh ruang ah an tlaih hna. Myanmar ram ah hramhram in uknak lak a si hnu ah ram buainak, eidin harnak ruang ah rammi tampi Myanmar a pawngkam ram ah an lut hna i 2022 chung ah phung he aa kalh ruang ah a tlaih mi hna 46,000 leng an um tiah theih a si.

Thai Royal Army, BGF le Lah-Wah-Kah nih an thanh mi cazin ning ah 2022 January in December tiang ah phungning lo in an rak luh ruang ah tlaih a tong mi Myanmar rammi 46,400 an um tiah JACBA Chairman U Moe Kyo nih DVB ah a chim.

A rak ratpitu puaisa le lam hmuhsaktu Thai miphun le Myanmar rammi 217 zong an tlaih hna bantuk in phung a buar mi palek 83 zong an check hna tiah a chim. Thai cozah nih Myanmar ram in rianṭuantu sing 1 le cheu ka herh hna tiah a thanh i ramhnih hnatlaknak minthut MOU nih a rak lut mi hi 2022 December tiang ah 90,000 leng an lut i acheu cu an covo buar piak mi zong an um. Credit: The Chinland post

Be the first to comment

Leave a Reply

Your email address will not be published.


*