MAL te phu an sazapa Ohn Thwin an hrilh khawh!
========
Kawlram lubik changtu Soe Win i a saza dikdek ralbawi hlun (Brig Gen) Oh Thwin cu nizan ahkhin a hau chungah Inya Urban Force te phu nih teng ko in an va kah. Cu an va kahnak hmun ah cun, Ohn Thwin fanu pasal Ye Tayza (ralkap captain hlun) zong a rak um celngel i a bia tam pah caah an hrilh chih lawlaw ve. Yangon, Hlaing Tsp, Block 12 chung khuasa an si, an ti.
An innpi chungah an chungkhar mi dangdang zong an um tung ko nain, midang tu cu kan that hna lo tiah Inya Urban Force nihcun BBC sinah an iphuan. Ohn Thwin te pafa an thah khawhmi hna cungah Kawl pawl cu lawmhnak in an khat.
Ohn Thwin an thah khawh caah Nay Pyi Daw i ralbawi zik pawl zong a lau in an lau cang tiah an zumh. Min Aung Hlaing cu May Myo an ralkap sianghleirun ah siangngakchia thar don ding phunphai in tlawn ding a si. Nain, cu a khualtlawn ding zong cu an leet. An kal ngam lo, ti si.
Ohn Thwin timi pa cu Kawl ralbawi lakah lungkhong misual ngai pakhat si ve, an ti. Ralkap cun pension la cia si cang nain, MAL te phu caah cun VIP a si zungzal rih i an sazapa bantuk a si, ti si. Cu lawng si loin, 2021 uknak chuh ding kong zong amah nih ruahnak a chuah i ca a rak kuat bal hna, ti si. A fanu pasal Ye Tayza zong a thih hnu cun, a Facebook ah Kawl pawl nih heh tiah nihsawhnak ca in an phomh. Pencillo nih diriam ko in a tongh ve, ti si.
Inya Urban Force မြို့ပြပျောက်ကျားအဖွဲ့ nih an va hrilh hna. Ralhrang uico pawl cu an hraang chin lengmang ko lai. Ohn Thwin an thah hnu in Myay Ni Gone ah vanhlei cung i ai chokmi mino pathum cu ralhrang nih meithal in an kah hna, ti si. Ralbawi hlun pension la cangmi ciocio ah Ohn Thwin cu nikum uknak laaknak kong ah huham ngei si an ti. Mah caah guerrilla force IUF nih thah ding hrimhrim in a inn ah an va fuh i a fanu pasal he an hrilh hna. Min Aung hlaing te phu an lau ngai, ti si.
SAC Ralbawi Hna Caah Ralrin Peknak Thawngchia (Ralbawi Ohn Thwin Cu Ahodah A Si) SAC hruaitu Min Aung Hlaing, Soe Win le ralbawi dang hna telh in ralbawi hlun hna i an hawi, an upa le an boss, Military University a zarh 15 nak in a dihmi Brigadier General Ohn Thwin cu Sept 24, zanlei 2:45pm ah a tupa ralbawi hlun Captain Yee Tay Za he meithal in kah an ton caah an thi. Ralbawi ngan pakhat a rak si bantukin an ruak cu SAC ngeihmi Kan Thar Yar siizung ah an chiah hna.
Ralbawi hlun Ohn Thwin an thahmi thawngpang nih SAC ralbawi hna cu thinphang le thlalau in a tuah hna. Sualnak ngeilo rammi hna duh paoh in a thatmi hna cungah thihnak cu zeitik caan paoh ah a phan kho ti ralrin peknak thawngchia a si.
U Ohn Thwin facebook ah “ka upa” tiin commend a pe tawntu SAC ramleng vuanci Wana Maung Lwin le ramleng pehtlaihnak (International Relations) vuanci Ko Ko Hlaing zong hngilh loin khua an dei ṭheu lai. Ohn Thwin hi zeiruangah an thah? A fiang ngai ko. Nawlngeihnak lak dingin ruahnak a chuahtu pakhat a si caah a si. A duhmi nawlngeihnak laknak ruangah a nunnak a liam.
Nawlngeihnak Lak Dingin Aa Zuam Pengmi A Si? Ohn Thwin cu atu i Deputy Commander-in-Chief Soe Win he aa kom ngaimi an si. Nawlngeihnak lak hlan kumkhat duh lioah khan 2008 phunghrampi i ralkap nih nawlngeihnak lak khawh a si timi zawn kha nawlngekhnak lak ti loin nawlngeihnak tlaih chung tiah hman dingin ruahnak a rak cheuh hna.
March 8, 2020 ah a facebook ah “Lak khawh lo dingin le tlaih chung khawh dingin phunghrampi kan ser. Mipi nih an cohlan ahcun tlaih chung ding a si ko lai. A sullam muru cu a tlau lo” tiah a ṭial. Cuticun MAH nih nawlngeihnak a lak ni Feb 1, 2021 ah “Daung Nan Ciah Khua In Kan In Thlah Hna (ဒေါင်းနန်းကျမှနှုတ်ဆက်ပါ၏)” timi catar cu langhter in “Ka rak save mi hmanthlak te cu atu lawng a tak in a nung” tiah a facebook ah a post ṭhan. A sullam cu MAH nih nawlngeihnak a lakmi kha aa lunghmuih tuk tinak a si.
Hi zawn i “Daung Nan Ciah” timi hi khua min a si nain Ohn Thwin nih a sullam aa lakning cu NLD cozah an tlak lainak kong a si. Daung (ဒေါင်း) cu Awtaw a si i Awtaw cu NLD Logo a si. MAH nih nawlngeihnak a lak zingah Ohn Thwin cu aa lawm tuk i zan ah lawmhnak party ka tuah lai tiah a au ti a si.
Ralkap Dohkalhtu Paoh That Hna U Tiah Forhtu A Si; Ralbawi Ohn Thwin hi SAC uknak a dohkalh i khuapau dohthlennak ah aa telmi mino hna that dih dingin forhtu a si. Mino tampi nih duhlonak langhter in lam an zawh lioah khan Ohn Thwin nih cun “Tampi kan thah hna lawngah an buaimi hi a dai lai. Rianrang tein thah thluahmah an hau” tiah SAC ralbawi hna cu a forh hna.
Suh Kyi A Sersattu A Si; Ohn Thwin hi ralkap a ṭuan lioah holh ṭhalo le bia chiahru chim a hmang tukmi a si caah ralkap sianghleirun an kai lio zongah Min Gaung (မြင်းဂေါင်း) tiah mindeu an rak pek phah. Suh Kyi a huatu le a sersattu zong a si.
June 2, 2018 ah a facebook ah “International Prostitute tiah auhmi ramkip tawzuar nu cu hmaitonh tein ka hmuh cang caah ka thih zongah kaa lawm ko lai” tiah a ṭial. Cu bia a ṭial in kum 4 nak ah hriamtlai hna kut in a nunnak a liam. A thih ah aa lawm maw lawm lo ti cu amah lawng nih a theih lai.
Muslim Dohkalhtu A Si; Ohn Thwin hi South Africa, Maldives, Bangladesh le Sri Lanka ram hna ah 2011 tiang Myanmar ram palai a ṭuanmi a si. Ram pakhat palai a si nain social media ah Muslim dohkalhnak le huatnak bia a thlah lengmang. Muslim a simi upadi thiamsang U Ko Ni thah a ton lio zongah a facebook ah aa lawmhnak kong a rak thlah bal.
Tlangkawmnak; Ralbawi hlun Ohn Thwin cu nawlngeihnak lak dingin ruahnak a chuahtu a si bantukin nawlngeihnak lak ruangah a nunnak a liam. Mipi thah dingin forhtu a si bantukin amah zong thah a tong ve. U Ko Ni thah a ton lioah aa lawmh bantukin amah thah a ton ni ah mizapi an i lawm ve.
Ohn Thwin thah a tonnak nih Naypyidaw i SAC hruaitu hna cu a lauter hna. Ohn Thwin thihnak bantuk hi an cung zongah a tlung kho ve ti kha ralrin a pek hna. Mipi cungah zangfahnak le zawnruahnak ngei loin thahnawnnak, meikhanghnak le sualnak dangdang an tuahmi hna cu nikhat khat ah anmah le an chungkhar zong nih an ton ve te lai.
Palik motor le SAC ralkap motor hmaitonh in an i pah caah palik nu telh in palik 2 an thi. Training kai dingin Yamethin ah private motor he a kalmi palik phu motor pakhat cu Mandalay-Lashio lampi ah SAC ralkap motor pakhat he hmaitonh in an i pah caah palik nu pakhat telhin palik 2 an thi tiah theih a si.
Nizaan, September 24 ah Shan ramkulh Kyaukme(ကျောက်မဲ) pengkulh palik phu in nu palik Hnin Wat Yee Win le palik uktu Aung Cho Lyin nih zulhmi motor cu Mandalay-Lashio lampi Naungcho peng Bantboikone(ဘန့်ဘွေးကုန်း) khuapawng ah SAC ralkap motor he i pahnak a cang.
“Yamethin palik training school ah an kal, PDF ral an ṭih caah mi sawhsawh bantuk in a thli in an kal, lampi ah SAC ralkap he an i pah caah nu palik Hnin Wat Yee Win le palik Aung Cho Lyin an pahnih in an thi, an motor zong a sop dih” tiah Naungcho palik phu hna he naihniam in a ummi pakhat nih a chim.
Nu palik Hnin Wat Yee Win cu Yamethin palik sianginn ah training kai dingin kal aa timh caah palik bawi Aung Cho Lyin nih motor in a thlah lio ah a tubantuk thil an ton hi a si. Palik Hnin Wat Yee Win cu chungkhar he khuasa mi a si i, a pasal zong palik chungtel a si. Motor i pahnak a can lio ah motor chuugah ngakchia 2 zong an i tel tiah theih a si nain, an nun dam kong ah thil sining fiang tein theih a si rih lo. Credit: The Chin Post
Leave a Reply