Min Aung Hliang; KIA, KNU le KNPP cu PDF, CRPH le ramdang he pehtlaihnak an ngei!

KIA, KNU le KNPP cu PDF, CRPH le ramdang he pehtlaihnak an ngei: Min Aung Hliang
======
Kachin Independence Army (KIA), Karen National Union (KNU) le Karenni National Progressive Party (KNPP) hna nih daihnak kong he pehtlai in biaruahnak ah an rak kai lomi cungah ramdang, PDF, le CRPH hna he aa pehtlai tiah SAC lutlai Min Aung Hliang nih a ruahdamh.

May 12, Naypyidaw ah tuah a simi SAC meeting ah a tu bantuk in a chim hi a si. “A hramthok cun kai ding ah an lung a um i kai ṭhan loding in biakhiahnak a tuahmi hi KNU an si. KNU, KIA le KNPP hi kan ram chungah misual phu tiah ruah a simi PDF le CRPH hna he pehtlaihnak an ngeih kha theih khawh a si.

Cun, mah phu thum hna hi ramdang he pehtlaihnak an ngei tiah kan theih. Cucaah, kan biaruahnak chungah kan i tel kho lo tiah an thanhnak a si hi hmuh khawh a si” tiah Min Aung Hliang nih a chim.

Min Aung Hliang nih sawmmi biaruahnak ah a tulio kahdohnak a tuah lomi phu 10 he an I tong lai i kahdohnak a tuahmi a dang phu vialte nih Min Aung Hliang sawmmi biaruahnak ah kai loding in thawng a chuah.

Karenni peng ah SAC ralkap mawṭaw thluan bom puah hnawh a tong, SAC ralkap mawṭaw 5 leng a rawk. Karenni peng ah SAC ralkap mawṭaw thluan cu KNDF Battalion 16 le Karenni Army (KA) hna fonh in bom an puah hnawh lengmang hna caah SAC ralkap mawṭaw 5 nak tlawm lo a rawk i a thimi an tam kho tiah KNDF nih May 12 ah a thanh.

May 7 ah KNDF Battalion 16 le KA fonh in SAC ralkap mawṭaw thluan cu an puah hnawh hna, SAC ralkap mawṭaw 3 a rawk i a thimi an tam, a rawkmi SAC ralkap mawṭaw 3 cu Karenni phufonh nih mei in an khangh tiah theih a si. Cu bantuk in, May 4 ah SAC ralkap mawṭaw thluan cu KNDF Battalion 16 le KA phufonh ṭhiamṭhiam nih bom an puah hnawh i SAC ralkap mawṭaw 2 a rawk, SAC ralkap a thimi an tam tiah KNDF thawngthanhnak in theih a si.

India phan ralzam 39,150 chung ah 3,197 nih UNHCR sin ah humhimnak an hal. Ramkomh Kawlram buaibainak ruang ah India ram ah a zam i a phanmi dihlak hi 39,150 an phan cang tiah UNHCR nih May 4 ah thanhnak a tuah. Cuchung ah, a tlawm bik 3,197 hi UNHCR Delhi zung ah an kal i, Ralzam (refugee sinak) an hal, UNHCR sin ah pehtlaihnak an kan tuah tiah UNHCR nih thla fatin an chuahmi ripawt in theih a si.

Hi ralzam chung in UNHCR Delhi sin ah pehtlaihnak a tuahmi ahhin, 298 cu kum tling lo an si tiah UNHCR nih a langter. UNHCR ripawt chuahmi ning ah, Ralzam a tam deuh hi Mizoram ah an um. Zatuak 65 (%) tluk hi Mizoram i khuate ah siseh, chungkhat sinah siseh, hawikom sin ah an um i, a dang zatuak 35 (%) tluk hi khuami le cozah nih bawmhnak in sermi ralzam dornak hmun ah an um tiah theih a si.

Atu bantuk in, Chin miphun le a dang Kawlram mi pawl nih Mizoram ah zalong tein dornak a petu hi miphun le unau tanhnak lungthin a ngeimi central nih a hruaimi party a silo mi Mizo National Front (MNF) an si caah a si tiah central cozah New Delhi khuaruahning a theihmi nih cun, an ruahnak le hmuhning an chim.

Wide Angle View Of Busy Design Office With Workers At Desks

UNHCR Delhi nih an si khawh chung in an izuamnak le riantuanti phu simi BOSCO tbk. he ralzaam caah an cawlcanghnak an langhter. UNHCR nih cun, Ralzam a rak phanmi kum tling lo nih hin, kanmah telawng in kan rak ra, chungkhat le cingla sin ah kan i benh tiah an chim timi zong a langhter chih fawn.

Nihin tiang ah Ramkomh Kawlram pumpi ahhin, Ralzam 937,000 tluk um a si cang i, cuchung ah 590,000 hi February 1 Ralkap nih hramhram nawlngeihnak lak hnu in a zaammi an si. Cun, 59,000 tluk hi Innpa ram a simi Thailand le India ah a zaami an si, tiah UNHCR nih cun a langhter.

Atu bantuk in, UNHCR Delhi zung ah Ralzam sinak (refugee status) halnak kong he pehtlai in, Ralzam dirkamhnak ah caan saupi a cawlcangmi nih, humhimnak tiang a simi RSD card (refugee sinak card) tiang cu an pek zong an pek ko men hna lai, nain Ramdang lanhnak bel hi cu a har lai dah, a ruang cu Delhi ah caan saupi a hngak cangmi hna le UN le Embassy nih kal ding na si cang tiah an timi tampi zong nihin tiang ah India cozah nih chuahnak nawl (exit permit) a pe duh hna lo tiah an hmuhning The Chinland Post ah an langhter. Asinain, UNHCR nih, humhimnak a pek hna ahcun, cucu lawmh bik ding cu a si ko tiah an lungum an pehchap. Credit: The Chinland Post

Be the first to comment

Leave a Reply

Your email address will not be published.


*