Mindat Khuapi ah Saya/mah te cu ralrin pek an si cang!

Mindat khua saya/mah hna SAC he fonh lo dingin ralrin pek an si!
===========
SAC he aa fonhmi Chin ramkulh Mindat khua Non-CDM siangcachim hna a ziizut an si lai bantuk in SAC awnmi sianginn ah hngakchia ap lo ding le ap a si ahcun a hnulei a phichuak chiatnak pawl tawlrelpiak nan si lai lo tiah CDF-Mindat nih June 3 ah a thanh.

Cheukhat siangcachim pawl cu SAC he fonh in 2022-2023 cacawn kum caah sianginn awn ṭhannak hna an tuah i CDF-Mindat nih SAC he fonh lo ding in ralrin peknak an tuahmi cu zeirel loin SAC he an i fonh ṭhan kha hmuh a si tiah a langhter. Zeibantuk a zizutnak dah tuah an si lai timi bel cu CDF-Mindat nih a fiang in a langhter lo.

Mindat peng chungah SAC kuttang sianginn ah ap lo ding le mipi uknak phu nih dirhmi sianginn lawngah ap ding in nulepa pawl zong CDF-Mindat nih forhfialnak a ngeih hna. Mindat peng ah Mindat peng mipi uknak phu nih caan karlak mipi uknak phung an langhter i mipi sianginn pawl an awn tiah theih a si.

Chin ramkulh minung 20% leng nih eidin harnak an tong! Hramhram in uknak lak a si hnu ah Chin ramkulh cu SAC nih phihkharnak phun li a tuah caah minung 20% leng nih eidin harnak an tong tiah Dr. SaSa nih a chim. “Chin ramkulh minung sing 5 leng chungah 20% leng hi SAC ralkap hramhram thiltuahnak ruangah inn le lo ngei lo le eidin harnak an tong. Ralkap nih hramhram in uknak a lak hlan in Chin ramkulh cu pehzulh in Slow Genocide a buar cang” tiah Dr. Sa Sa nih a chim.

Interim Chin National Consultative Council (ICNCC), National Unity Government (NUG) Ministry of Humanitarian Affairs and Disaster Management (MoHADM) hna June 4 ah tuahmi Chin ramkulh chung bawmhnak kong he pehtlai in biaruahnak ah a chim. Cun, Myanmar ramchung peng le ramṭhen 14 ah Chin ramkulh hi a sifak bik a si caah fimnak, ngandamnak le bawmhnak lei ah herhbaunak tampi a um rih tiah a chim.

Cu tonnak ah Chin ramkulh chungah a ummi peng 9 a simi Mindat, Kanpetlet, Paletwa, Thantlang, Falam, Tedim, Tonzang, Hakha, Matupi in Chin ramkulh chung bawmhnak a chanbaunak le harnak pawl kong biaruahnak an ngei tiah theih a si. Tonnak a kai vemi Mindat khuami 1 nih Mindat ah ralzaam 30,000 an umnak kong le SAC phihkharnak phun li ruangah an tonmi harnak pawl kong a chim.

“Paracetamol tlang 10 nak tam nan phor lai lo, cite, shushal, cauk, khedan zong phorhdan riikhiah piak a si. Hriamngan nih a khen ruangah kum 11 a simi Mindat hngakchia 1 cu a orhlei ke tanpiak a si i a kehlei phei zong a hliam. Khuami hna nih an pawcawmnak caah a biapi bik in an zuatmi sia 20 leng zong ralkap nih an tlaih i lam ah an ei hna. Sia pakhat i a tulio a man hi sing 10-15 kar a si” tiah a chim.

NUG le MoHADM nih 2022 March thla tiang ram pumpi in bawmhnak an pekmi rianṭuannak kong report peknak zong an tuah.
2021 February 1 in ralkap nih hramhram in uknak a lak hnu thok in Myanmar minung 54 million chung in a cheu nih eidin harnak an tong tiah a chim.

A cunglei cazin chung in minung 14.4 million nih bawmhnak an herh i minung 13.2 million nih Food Security, minung 2.5 million nih ngandamnak, minung 5.4 nih fimnak lei bawmhnak an herh rih ko tiah theih a si. Tonnak ah NUG, Dr. Win Myat Aye, Dr. SaSa ICNCC chungtel pawl, NGOs rianngeitu pawl, Chin ramkulh peng 9 in palai pawl an kai kho tiah theih a si.

Nawlngeihnak Laak Hnu In Minung 3165 Cu Thah An Si i, Nuai 1 Leng Ral An Zaam. SAC nih nawlngeihnak an laak hnu February 2021 in March 2022 tiang ah minung 3165 cu thah an si i, peng 86 ah inn 19,635 khangh an si cang, tiah Media Monitor Collective nih cathanh a chuah.

SAC ralkap nih ramkulh le ramṭhen chung um peng 86 in khua 400 leng ah cun meikhanghnak an tuah i, Sagaing ramṭhen ah inn 12,687, Magwe ramṭhen ah inn 4304, Chin ramkulh ah inn 1376, Kayah ramkulh ah inn 360, Shan ramkulh thlanglei ah inn 329, Kayin ramkulh ah inn 166, Shan ramkulh chaklei ah inn 137, Mandalay ramṭhen chung ah inn 118, Kachin ramkulh ah inn 58, Tanintaryi ramṭhen ah inn 37, Mon ramkulh ah inn 30, Bago ramṭhen nitlaklei ah inn 26, Yangon ramṭhen ah inn 4, Bago nichuahlei ah inn 3 hna cu an ciam dih, tiah theih a si.

SAC ralkap nih khua an hrawh ruangah minung 1,21,0846 cu inn le lo kaltak in a himnak hmun ah an zaam. SAC ralkap nih khuate hna cu an duh poh in an kah tawn caah minung 1112 hliam an tuar tiah an langhter fawn. Khuate lei zong ah sualnak ngei lo minung 16,251 an tlaih hna i , minung 1353 cu ralkham ah an hman hna, tiah Media Monitor Collection nih cathanh a chuah ning in theih a si. Credit: The Chinland Post, The Chin Post

Be the first to comment

Leave a Reply

Your email address will not be published.


*