Mindat Peng, Vuamtu Khua Cu Ralhrang Nih Hriamngan In An Kah!

Mindat peng Vuamtu(ဝမ္မသူး) khua cu ralhrang nih hriamngan in an kah hna caah mizapi cu a himnak hmun ah ṭhial an herh ti in nihin February 15 ah khua uktu nih cathanh an chuah. Rallam a sialtu ralhrang phu hna nih Mindat peng Vuamtu(ဝမ္မသူး) khua cu i tinh in, hriamngan in an kah hna i, cuka khua he meng 18 tluk aa hlatnak Mindat khuachung um mi 274 battalion zong nih a langhlat kahnak hriamngan he an kahbawmh fawn hna, tiah theih a si.

Nihin February 15, zinglei suimilam 10:00 hrawng ah ralhrang phu hna le CDF cu Vuamtu (ဝမ္မသူး) khuahlun Kyawng Nu thlang ah an i kap, tiah Mindat peng uknak hruaitu nih cathanh an chuah. Vuamtu(ဝမ္မသူး) khua pawng hrawng ralzaam hna nih a himnak hmun ah i dor a herh kong zong Mindat peng uknak hruaitu nih an cathanh ah an langhter.

Falam Kalnak Lam Ah Ralhrang Motor Bomb Puah An Tong: Falam kalnak lam ah ralhrang phu hna motor cu bomb puahhnawh an ton caah ralhrang chungtel minung 10 an thi, tiah theih a si. Mizapi vengtu ralkap phu lei hliamtuar an a um lo, tiah Civic Defense Militia-CDM-Siyin page nih cathanh an chuah. Nihin February 15, zinglei ah Falam lei in a ṭummi ralhrang phu hna motor cu CDM Siyin le PDF Zoland phufonh nih bomb in an doh hna. Cu kahdohnak ah cun ralhrang lei in minung 10 an thi i hliamhma tuar zong an tam, tiah theih a si. Mizapi vengtu ralkap phufonh lei cu hliamtuar um lo tein hnu an tolh kho, tiah Civic Defense Militia-CDM-Siyin page nih cathanh an chuah.

 

Be the first to comment

Leave a Reply

Your email address will not be published.


*