Monywa Peng Nyaung Phyo Pin Sakhan Cu PDF Nih An Kah Caah SAC Ralkap Chungtel 10 An Thah Hna!
========
Sagaing ramṭhen, Monywa peng Nyaung Phyo Pin(ညောင်ဖြူပင်) palik sakhan cu PDF ṭangṭi phu hna nih nizaan October 2 zing sml 2:00 hrawng ah kan kah i SAC ralkap chungtel 10 an thi, 5 hliamhma an pu tiah Myinchan Pengkomh Battalion 3 in ṭuanvo ngeitu nih a chim.
Sagaing le Myinchan PDF hna i bawm in Nyaung Phyo Pin palik sakhan cu kan kah i ruah a sur tuk caah an sakhan cu kan la kho lo, tiah a chim chap. “An sakhan cu ṭha tuk in an sakmi a si pinah kan kah hna lioah ruah a sur tuk i an sakhan cu kan la kho lo. Cu kahdohnak ah SAC ralkap chungtel 10 an thi, a hnu ah 2 an thi chap, tiin thawng kan theih” tiah Myinchan pengkomh Battalion 3 in ṭuanvo ngeitu nih cun a chim.
Nyaung Phyo Pin palik sakhan kahdohnak ah Myinchan pengkomh Battalion 3, Myalatt PDF Taungthar, Seven People Defense Force ၊ Scorpions people defense Force၊ Sagaing ramṭhen Battalion 1၊ MSPDF ၊ Natogyi Regional Defense Force hna i bawm in an kah hna, tiah theih a si.
AA le SAC Ralkap Kar Kahdohnak Ruangah Ralzaam 20,000 Hrawng An Karh! AA le SAC ralkap kar kahdohnak a cangmi ruangah a luancia August thla in Rakhine le Chin ramkulh thlanglei ah ralzaam 20,000 hrawng an karh tiah UNOCHA nih cathanh an chuah. A luancia August thla in minung 17,400 hrawng nih an umnak hmun an kaltak i cu hlan ah ralzaam dirhmun a rak phanmi hna he cun ralzaam 91,000 leng tiang an karh cang tiah UNOCHA nih October 1 ah cathanh an chuah.
Ramchung dihlak huap in ralzaam dihlak nuai 1.3 leng an si cang, raltuknak ruangah le buaibainak ruangah minung 2400 tluk hrawng nunnak a liam i, cu chung ah cun ngakchia 188 an i tel tiah theih a si.
Ramchung le ramkip mi bawmchantu phu hna nih harnak a tongmi hna sin ah an herhmi bawmhnak pek dingin an i zuamko nain, ralzaam harnak tongmi hna umnak tiang bawmhchanhnak pek a har chin cang tiah an cathanh chuahmi ah cun an langhter.
Ponnakyun ah AA nih SAC ralkap 2 an tlaih hna! Rakhine ramkulh Ponnagyun peng October 1, zaanlei suimilam 3:00 ah zu dawr pakhat chungah a ṭhumi SAC ralkap kuttang um palik 2 cu AA nih an tlaih hna tiah tualchung mi nih an chim. AA kut in tlaih a tongmi palik 2 cu Punnakyun(ပုဏ္ဏားကျွန်း) palik sakhan in ṭat-kyat-gyi Zaw Lin Oo(kum 40) le duh-palik bawi Hlah Thein(kum 38) an si tiah min langhter a duhlo mi tualchung mi pakhat nih a chim.
“An pahnih in Guwah(ဂူဝ) phungki biaknak pawng zu dawr ah zu an dih lio ah hriamtlai minung 9 hrawng nih auh in an kalpi hna. Palik pahnih tlaih a tongmi hna cu khuachung ah a min a langsar ngaimi an si i SAC ralkap sin ah thawngpang a pe tawntu an si” tiah a chim chap.
SAC Chungtel Asimi Nih Mah Tungtai He Aitlakmi Khiing Ngeih Cio Dingin Min Aung Hlaing Nih A Fial Hna. SAC chungtel asimi hna nih mah le tungtai hoih cio in khiing rih zaan ngeih cio dingin an hruaitu Min Aung Hlaing nih fialnak ca a pek hna tiah theih a si.
September 30 ni ah Min Aung Hlaing nih ramkulh, ramṭhen le Naypyidaw hruaitu kip sinah atubantukin fialnak a tuah hna hi a si tiah theih a si. SAC ah rian pek mi hna nih mah tungtai he ai tlakmi khiing rih zaan ngeih lawngah ngandamnak he aitlak i umtu thunder kongah a tlamtling ding a si caah Body Mass Index-BMI he ai tlak khawh chung tlak dingin i tuaktaan cio dingah Min Aung Hlaing nih a fial hna hi a si.
SAC hruaitu Min Aung Hlaing hi meeting an tuahnak hmun ah a lungchuak thil le a duh paoh a chim lengmang tawntu a si. Kan nu he kan i zuamnak thawngin atubantuk dirhmun kan phanhnak a si, ka nupi hi cutluk cun a felmi a si tibantuk konglam, mah le mah faknak a chim lengmang tu a si.
Launglon Kahdohnak Ah Pyusawhti 2 An Thi, Meithal Zuun 2 An Lak. Tanintharyi ramṭhen Launglon peng Kyauknimaw khua le Kyaukmattat khuapawng ah phaisa khawlh nak in a rak kirmi Pyusawhti pawl cu September ni 29 ah kahdoh an rak tong tiah theih a si.
Cu kahdohnak ah cun a hmun ah Pyusawhti 2 cu hmakhatte ah an thi i 2 hliam an tuar, cu hliam a tuarmi pyusawhti 2 cu an thi ṭhan tiah kan theih tiah Launglon tualchung hriamtlaiphu nih cathanh an chuah. Kahdohnak ah Pyusawhti a thimi an dihlak 4 an si i kanmah LLPDF lei in pakhat nih hliam a tuar. Hriamnam Carban meithal zuunkhat, kutser meithal pakhat le AK kuan bawm 6 le SAC lukhuh pakhat kan lak tiah an thanh.
Nihin October 1 ah Hakha thar Nahau tlang ummi Pu Biak Cung cu bomb aa lamhsual caah a ke ah hliamhma a pu, tiah theih a si. “Nihin zanlei slm 4:00 hrawng ah Hakha thar Nahau tlang ummi Pu Biak Cung cu Fanghawk a kawlnak ah SAC ralkap nih an hmanhmi bomb aa lamh sual caah a ke ah hliamhma a pu,” tiah tualchung mi pakhat nih a chim.
Fanghawk a kawl lioah an inn pawng(Van Ṭhio khuachuahnak pawng) ah SAC ralkap nih an hmanhmi bomb aa lamh sual hi a si. A fengbeo cung deuh in tan a hau lai. Pu Biak Cung cu miding fel ngai a si pinah chungkhar nih an bochan tuk mi a si, tiah theih a si.
Min langhter a duh lomi pakhat nih, “SAC ralkap nih Hakha kiangkap ah bomb an hmanh dih. A bik in Hakha thar le cawbuk lei kam hi ralrin taktak a hau,” tiah a chim.
Kawlram ah Elon Musk nih Starlink Bunh Dawh Asi Cang. Myanmar Democracy Activists/ ramchung mipi hna cu Min Aung Hlaing nih internet a duh tik caan poh ah aphih hna. Atu zong hmun tampi ah internet an hmang kho ti lo. MAH nih internet a phih ruangah ramchung mipi tamtuk harnak an tong, mipi hriamtlai zong harnak an tong.
Internet line, phone line a phih ruangah an duh poh in mipi cungah fahnak an pek hna, an thah hna, an hrem hna. Cu vialte thawngpang cu vawleicung mirumbik Elon Musk sinah National Unity Government’s communications minister U Htin Lin Aung nih achim.
National Unity Government’s communications minister U Htin Lin Aung nih Elon sinah nawlnak a tuahmi cu, zeikhom sisehlaw kanram mipi an temtuar tuk cang, kan harsatnak le ralhrang riantuannak vialte vawlei pi nih an hmuh khawhnak hna Starlink kan pe hram ve ko tiah a ti. Atu hi Elon nih Ukraine le Iran ah a tuah piak cuahmah lio hna asi.
Ukraine le Iran adih in Myanmar hi kan tuah piak ve tiah a nawl. Mah nawlnak hi tlamtlin dawh asi. Elon nih Starlink a kan pek ahcun mi vialte internet, phone line tibantuk ah harnak a tong ti lai lo pinah ralhrang thiltuah mi vialte cu fawi tein vawlei pi nih a theih khawh cang lai. Elon Musk nih a timi cu, “Myanmar mipi nan harsatnak kan hromhpi hna,” tiah a chim.
Relchap, N.Korea Cu S. Korea President Yoon Suk Yeol Nih Ralrin A Pek, N. Korea nih ngiarnak a tuahmi le aa hrocernak hi American le ṭangṭi ram hawikom hna nih ṭha tein kan sersiam lai i a phi kan kawl lai, tiah S. Korea president Yoon Suk Yeol nih nihin October 1 ah a chim.
N. Korea nih nuclear hriamnam a hman ahcun S. Korea le American nih fak bikmi dantatnak kan tuah lai, tiah ralrinnak a pek. Nihin October 1 “S. Korea Ralkap Ni” ni sunglawi cu S. Korea ram thlanglei ralkap headquater ah ah an tuah i, atu bantukin President Yoon Suk Yeol nih a chim hi a si.
N. Korea cu vawleicung ram tampi nih an soisel cuahmah ko bu ah nuclear hriamnam le Missile bomb serchuahnak le hneksaknak a tuah cuahmah rih ko, tiah S.Korea president nih cun a mawhchiat. Korea ram chungah a dikmi daihnak hmuhkhawhnak caah nuclear hriamnam hrawh ding hi N. Korea nih a tawlrel ding a si, tiah a chim.
Russia President Putin nih Ukraine ram hmun 4 cu Russia hmunram a si cang tiah a thanh mi kongah American le NATO nih an cohlang lo!! Moisku, Kremlin ah, Russia nih a lakmi Ukraine ram cu, kanmah ram a si cang tinak minsen thutnak puai cu, nizaan September 30 ah an tuah tiah theih a si. Cu puai ah cun, Russia nih a thimmi hruaitu hna nih, hi ram hmun 4 cu Russia hmunram a si cang tiah minthunhnak an ngeih.
Russia nih Ukraine ram hmun 4 a lakmi hna cu, Donetsk, Luhansk, Kherson le Zaporizhzhia hna an si. Putin nih Ukraine ram hmun 4 cu kan hnunram a si cang tiah a thanh hnuin Ukaraine cu seh thilri dollar 13 billion man bomh rih ding le Ukraine ram a latu Russia telhin, Russia lei ah a tangmi ram hna zong caan tlawmpal ah dan pek dingin American President Joe Biden nih cun a chim.
Ukraine Ram Thlanglei Ah Russia Nih Tualchung Mi Motor An Kah Caah Minung 23 An Nunnak A Liam, Ukraine ram thlanglei Zaporizhzhia hmunram ah har tongmi bawmhchanh dingin a kalmi motor cu, Russia ralkap nih rocket in an kah hna caah tualchung mi 23 an nunnak a liam, tiah Ukraine nawlngeitu hna nih an chim. Nizaan September 23 zinglei ah Ukraine ram Zaporizhzhia hmun khuapi ah kahdohnak a chuak ṭhan i minung 28 hliamhma an pu, an dihlak in civil mi lawngte an si, tiah theih a si.
Russia ralkap nih rocket in an kahmi motor chung ummi hna cu Russia nih an lak cangmi hmun ah har tongmi va bawmhchanh dingin a kalmi mi bawmchantu an si, tiah theih a si. Cu kahdohnak cu Russia nih kanmah kan si lo, Ukraine ralkap an si, tiah an puh hna.
Russia President Vladimir Putin nih, Ukraine ram chung ah zeimawzat hmunhma an lak cangmi hna cu Russia ram he i fonh ding in biachimnak a ngeih lai ah Russia ralkap nih atu bantukin Ukraine rammi 23 an kah thah hna hi a si. Ukraine ram chung ummi Zaporizhzhia le Kherson khua hna cu Russia President Vladimir Putin nih September 29 ah zalong tein um khawhnak nawl a pek cang hna, tiah theih a si.
Laung She Pengah SAC Ralkap Bomb Puahhnawh An Tong I Ralkap 2 An Thi, Magway ramṭhen, Laung She(လောင်းရှည်) peng Setutayar-Laungshi(စေတုတ္တရာ) lam cungah rallam a sialmi SAC ralkap pawl cu, bomb puahhnawh an ton caah ralkap 2 an thi, tiah Laung She Region People’s Defence Force nih an thanh. Nizaan September 30 zing sml 10:30 ah motor 1, cycle 7 le SAC ralkap 30 leng cu, bomb lung 8 in an puahhnawh hna. SAC ralkap cu Setutayar in a kalmi an si i, Kah Pah Sah 25 ralkap sakhan in a chuakmi an si, tiah theih a si.
“Kah Pah Sah 25 in a chuakmi SAC ralkap motor 1, cycle 7 le ralkap 30 leng cu, bomb lung 8 in kan puahhnawh hna caah motor cu kal kho ti loin a dir. Cuka ahcun kaphnih kar kahdohnak a chuak i, hriamngan in an kan kah ko nain kanmah lei a thimi le aa hliammi um lo tein hnu kan kir kho,” tiah Laung She Region People’s Defence Force in ṭuanvo ngeitu pakhat nih a chim. SAC ralkap pawl cu Laung She khua chungah lut an lut kho ti lo i, motor pakhat nih a rak don hna. Kut le ke a kiakmi SAC ralkap pawl tu cu mizaw phorhnak motor nih a rak don hna, tiah theih a si.
Sagaing Peng Sataung(ဆားတောင်) Palik Sakhan Cu PDF Nih An Kah Caah Palik 4 An Thah Hna, Sagaing ramṭhen, Sagaing peng Shwe Bo-Mandalay lam cung um Sataung(ဆားတောင်) palik sakhan cu, nihin October 1 zinglei ah kan kah i palik 4 an thi, tiah PAFD nih cathanh an chuah. Nihin zing sml 5:30 hrawng ah Sataung khua um palik sakhan cu, PDF ṭangṭi phu hna nih 40mm le meithal in an kah caah palik 4 an thih hi a si.
Sataung palik sakhan cu Sagaing peng Shwe Bo pengkomh Walet ramri ah a ummi a si. Atu kar hrawng cu PDF nih Shwe Bo-Mandalay lampi cu caan karlak chung an kham caah mi tlung kal an um lo, tiah tualchung mi hna nih an chim. Sataung palik sakhan kahdohnak ah People’s Army To Fight Dictatorship(PAFD) Companny DK PDF(MMU)၊ People’s knight Defense Force Myinmu (PKDF-MMU)၊ TAUNGTHA People Defense Force (TTAPDF)၊ D.B.B.F-MMU / Phoenix(SGG) hna i bawm in an kah, tiah theih a si.
Monywa Sipuazi Bank (စီးပွါးရေးဘဏ်) Ah A Ummi SAC Ralkap Kahdoh An Tong, 6 An Thi!!, Sagaing ramthen, Monywa sipuazi bank(စီးပွါးရေးဘဏ်) ah security a hngakmi SAC ralkap hna cu, Chindwin Attack Forcenih an kahdoh hna i SAC ralkap 6 an thi tiah Chindwin Attack Force nih an thanh. SAC ralkap hna hi zeitik dah an i thlahdorh bik caan a si ti cu tha tein kan i ngait i, cuti an daithlan lio ah kan kah hna tiah Chindwin Attack Force in ralkap pakhat nih a chim.
Cu kahdohnak cu, Monywa People, Defense Force Bataillon 2,3,4 nih an tuahmi a si.
Tachileik-Kyaingtone(ကျိုင်းတုံ) Motor Lampi Ah Motor Pakhat Horkuang Ah A Tlak Caah Minung 4 An Thi, 2 Hliamhma An Pu, Shan ramkulh, nichuah lei Tachileik pengkonh, Nayawng(နားယောင်း) khuakomh Pakha Nwe(ပါးခါးနွဲ့) khua pawng Kyaingtone-Tachileik motor lam kam horkuang ah civil motor pakhat cu, nihin October 1 zinglei ah a tla i, ngakchia 1 telh in minung 3 an nunnak a liam, tiah theih a si.
“Nihin zing sml 6:00 hrawngah minung 6 phortu Vigo motor pakhat cu Nanma(နမ်းမ) horkuang ah a tla. Motor khaltu nih rang tuk in a khalh caah horkuang chung a tlak hi a si. Ngakchia 1 le upa 3 an nunnak a liam i, minung 2 hliamhma an pu,” tiah mi bawmchantu pakhat nih a chim. Tachileik-Kyaingtone kar lam hi tlangcung motor lam a si pinah nawncek a tam i lam a nal ngaingai ko nain horkuang ah motor a tla i, a thimi hi cu an um bal hraw rih lo, atu hi a voikhatnak a si, tiah tualchung mi hna nih an chim. Credit; The Chin Post
Leave a Reply