Mipi Ralkap pawl nih abiapi taktak mi thawngthanhnak an tuah!

Kahdohnak Chuak Kho Peng A Si Caah Gangaw-Kyaw Motor Lampi Hman Lo Ding
=====
Gangaw-Kyaw motor lampi cu zeitik caan poh ah kahdohnak a chuak kho peng mi a si caah, hman rih lo ding in Htilin PDF nih nihin May 15 ah an thanh. Htilin pengchung um mi mizapi nih cathanh chuahthar mi a um hlan chung poh cu Gangaw-Htilin lampi cu hman hrimhrim lo ding in PDF Htilin nih an thanh. Cathanh chuah mi zul duh lo mi khualtlawng hna nih harnak le sunghnak an ton ah cun ṭuanvo kan la lai lo, tiah an thanh chih.

Htilin pengchung ah internet line a um lonak thlariat leng a si cang i, pengkulh chung in a hrapkhat lei lawng ah phone line a um, SAC ralkap nih rallam an sial poh ah phone line cu an thah fawn. May 12 in thlakhat chung ah phone le internet line a um lo a si ahcun Htilin pengchung tower tung hna cu kan hrawh/phur dih lai, tiah Htilin PDF nih an thanh.

Cinduai Khua Kal Ding Mortor Le Cycle Cu Caan Rikhiah Um Loin Kan Kham Lai Tiah CDF–Kanpetlet Nih A Thanh. Chin ramkulh, Kanpetlet peng ah um mi Chinduai khua ah SAC ralkap kuttang rianṭuan ding kong an tawlrel cuahmah tiah kan theih caah, Cinduai khua lei kal ding Mortor le cycle poh cu May 15 ni thok in caan rikhiah um loin kan kham lai, tiah CDF–Kanpetlet nih cathanh an chuah.

An cathanh chung ah Cinduai khua um mi tam deuh hi CDM tuah loin SAC ralkap kuttang rianṭuan an tam tuk, tiah an langhter. Kanpetlet khua mi pakhat nih, “Cinduai khua hi thlakhat ah voi hnih lawng khua chung luhnak nawl an pek hna. Facang, chiti le cite tibantuk lawng luhnak nawl an pek hna, minung va luhchuah tibantuk an onh lo. Phone line zong a ngah lo. Hiti luhchuah an phihnak hi thlahnih hrawng a si cang,” tiah a chim.

Chin ramkulh ah Tender rian zeihmanh nan tlai lai lo i, nan ṭuan lai lo, tiah CJDC nih voihnih tiang ralrin peknak cathanh an chuah cang. Kanpetlet peng chung ah zei bantuk Company rian hmanh nan ṭuan lai lo, tiah nihin May 15 ah CDF–Kanpetlet nih cathanh an chuah ve. Cucaah Cinduai khua lei kal ding Mortor le Cycle poh cu May 15 thawk in caan rikhiah um loin kan kham. Kan cathanh nan ngaih lo i, nan zulh lo ahcun CDF–Kanpetlet nih ṭuanvo kan in lak hna lai, tiah an langhter.

Myinmu Peng Bomb Puahnak Ah SAC Ralkap 18 An Thi + Yinmarpin Kahdohnak Ah SAC Ralkap 10 An Thi. Sagaing ramṭhen, Myinmu peng Bumingyikin(ဘိုးမင်းကြီးကင်း) le Gwaypintaw(ဂွေးပင်တော) khua kar ah SAC ralkap motor run cu Myaung Bu Taught Tun (MBTT) nih nizaan May 14 ah bomb puahhnawh in an doh hna i, Cu bomb puahnak ah cun SAC ralkap motor 2 an rawk i, SAC ralkap 18 an thih lengah minung 10 nih fak ngai in hliam an tuar, tiah MBTT nih an thanh. SAC ralkap motor run 6 cu Myinmu in ChawngOo lei an kal lio ah bomb lunghnih puahhnawh an si, tiah theih a si.

SAC ralkap hna cu MBTT, 11 Brothers Revolution Force- Myaung, Myaung peng TGR, Bu Nay Toe pah-kah-phah, Burmese Guerrilla Force-BGF Myinchain le Saw Bwar Gyi (MPDF) phufonh nih an kahdoh hna, tiah theih a si.

Yinmarpin Kahdohnak Ah SAC Ralkap 10 An Thi: Sagaing ramṭhen Yinmarpin peng, Yinmarpin-Ngawngpingyi (ညောင်ပင်ကြီး) lampi ah SAC ralkap motor run cu bomb puahhnawh in doh an ton caah SAC ralkap 10 an thi i, hliamhma pu zong an um, tiah Chindwin Ganung Yaza(ချင်းတွင်းဂဠုန်ရာဇာ) pah-kah-phah nih nihin May 15 ah an thanh. Tuzinglei(May 15) suimilam 5:00 ah SAC ralkap motor 8 cu Yinmarpin in an chuah lei ah Sanpiah khua, Taya khua le Hnawyoe khua inn 25 cu an khangh leng ah khua mi pakhat cu an thah, tiah theih a si.

Zinglei suimilam 9:00 ah, bomb hmanh mi cu SAC ralkap nih an hmuh caah thianhhlimhnak an tuah i, culio ah bomb cu a puah caah SAC ralkap 10 an thi; hliamhma pu zong an um, tiah Chindwin Ganung Yaza(ချင်းတွင်းဂဠုန်ရာဇာ) pah-kah-phah nih a thanh.

Cu bomb puahnak ah cun Yinmarpin Local PDF, Monywa Trust OF Force, Triple Two, Alpha Special Force, Salingyi Regional Defense Force, Myauk Tamar People Defense Force (MYPDF) le Chindwin Ganung Yaza(ချင်းတွင်းဂဠုန်ရာဇာ) pah-kah-phah CGYDF phufonh hna an i tel, tiah theih a si. Kahdohnak ah SAC ralkap nih hriamngan le hriamhme an hman nain, tualchung hriamtlai phufonh lei hliam tuar um lo in hnu an tolh kho, tiah theih a si.

Hungary Ram A Voi Khatnak Nu President Nih Biakamnak A Tuah: Hungary ram ah a voi khatnak bik nu President Katalin Novák nih nizan May 14 ah Bible i tlaih in biakamnak a tuah. Hungary ram mi dihlak hna nih an i ruahchan mi le lungthin khat in an ṭanrualnak upat in cu biakam tuahnak ah cun Katalin Novák nih biakamnak a tuah.

An rampi thantar an thlai dih in Hungary Parliament Speaker nih Katalin Novák cu, President si ding in biakamhnak an tuah mi tiamserhnak catlang relnak a ngeihter. Kum 44 a si mi Katalin Novák cu a luancia May 10 ahkhan Hungary ram ah a voikhatnak President si ding in Hungary parliament nih a thim. Credit: The Chin Post

Be the first to comment

Leave a Reply

Your email address will not be published.


*