Mipi ralkap phu nih Sipin motor an chuh hna, lung a hmuih tuk hringhran!

Mipi ralkap phu nih Sipin motor an chuh hna, lung a hmuih tuk hringhran!
==========
Kalaymyo Sipin Motor Cu Chitkhat Kan Hlan Chung Tiah Kalay Area Hriamtlai Phu Nih Cathanh Chuah! Kalaymyo ah Sipin motor (3) cu Kalay Civil Armed Force nih caan karlak kan hlan chung i, mipi cozah a dir than tikah kan up than te lai tiah March 31 ah cathanh an chuah.

Hnawm hlonnak Sipin motor (3) cu March 29 ah Se Gyi hlei pawngah anmah nih an chuh hna hi a si. Kalay Civil Armed Force i cathanh an chuahmi ningin mipi cozah a chuah than khawh nakhnga raltuknak ah kan herh caah hramhram in uknak latu ralhrang kuttang ah riantuantu Non-CDM zohkhenhmi hnawm hlonnak motor (3) cu caan karlak kan hlan chung tiah an langhter.

Federal Democracy a chuah than hnu, mipi cozah sinah kan up than te lai tiah an langhter chih. Atu bantukin Sipin motor an chuhsak ruangah Kalaymyo ဒကစ lutlaibik nih Tahan Barzar le pawngkam inn vialte cu mei kan khangh dih lai tiah amah he naihniammi Tahan mi pakhat sinah a chim tiah theih a si.

Pehzulh in hramhram uknak latu ralhrang riantuannak ah thazaang a petu Non-CDM hmanmi motor cu caan karlak kan hlan chung ruangah mipi i hlonmi hnawm charnak a hnursuan ahcun kanmah Kalay Civil Armed Force santlaihlo ruangah a si lai caah rak kan theihthiam/ngaithiam hram u tiah ngaihthiam kan in nawl hna.

Nihin ni tiangah mipi nih harnak nan tonnak nakhnga lo, raldohnak cu a si khawh chungin ralring taktakin cawlcanghnak kan tuah i, hramhram in uknak latu ralhrang i riantuanmi a tlamtlin nakhnga lo timhciam tein kan doh hramhrammi lawng a si i, mipi sawhsawh cungah siseh (ralhrang ralkap a dirhkamtu mipi cungah siseh) zeihmanh harsatnak le fahnak zong kan pek rih lo tiah cathanh an chuahmi ahcun an langhter.

Khua Chungah Hriamngan (3) Tla In An Puah Caah Ngakchia Telh In Minung (3) Nih Hliam An Tuar! Kalay peng chung Sakanh khua chungah nihin April (1) chun sml 1:30 hrawngah hriamngan (3) tla in an puah ruangah kum hnih ngakchia (1) telh in kum 40 leng nuva pahnih nih hliam an tuar tiah theih a si.

Innhmun chungah hriamngan an tlak ruangah vanpang cu bauh viar hratin innchung ah a ummi kum 40 leng inn ngeitu pa i orhlei phei ah hliam a ngah pinah a thaisungnu i kut ah hliam a ngah ve. A vawihnihnak hriamngan cu pawngkam innhmun pakhat chungah tla in a puah caah kum (2) ngakchia phei ah hliam a tuar.

A vawithumnak cu minung umlonak inn luanglu cungah tla in a puah caah inn cunglei a rawk. Hriamngan hna cu khuazei leikap in kahmi a si timi theihfian a si lo nain Taung Phi Lar tlang cungah umnak sakhan tuahtu SAC ralhrang ralkap i kahmi a si lai tiah pawngkam ummi nih an zumh.

Nam Saupi Aa Tlaihmi Misual Phu Nih Kalaymyo Zatlangbu Zungpi Chungum Motorbike (2) An Laak/Fir! Nam saupi aa tlaihmi misual phu nih Kalaymyo, Taungzalat sang, Central Chin Pawlpi-Kalay zung chungum 125 motorbike (2) cu March 29 zaan ah an fir tiah theih a si.

Misual phu hna nih thir taannak le nam saupi an i bainak cu CCTV nih a record manh tiah theih a si. SAC ralhrang ralkap nih nawlngeihnak a laak hnuin Kalaymyo ah motorbike a tlaumi a tam chin lengmang pinah chun zongah lam kamah dirtermi motorbike hna cu an tlau lengmang tiah theih a si. Credit: The Federal Times

Be the first to comment

Leave a Reply

Your email address will not be published.


*